'മനസ് മരവിച്ച അവസ്ഥയിലായിരുന്നു'; എസ്. ജാനകിയുടെ സംസ്കാരച്ചടങ്ങിൽ പങ്കെടുക്കാതിരുന്നതിന്റെ കാരണം വ്യക്തമാക്കി ശ്വേത മോഹൻ

JULY 15, 2026, 1:19 AM

കൊച്ചി: ഇതിഹാസ ഗായിക എസ്. ജാനകിയുടെ സംസ്കാരച്ചടങ്ങിൽ പങ്കെടുക്കാതിരുന്നതിനെ തുടർന്ന് സാമൂഹ്യമാധ്യമങ്ങളിൽ വിമർശനം നേരിട്ട ഗായിക ശ്വേത മോഹൻ സംഭവത്തിൽ വിശദീകരണവുമായി രംഗത്തെത്തി. അന്ന് വിദേശ സംഗീതപരിപാടിയുടെ ഭാഗമായി ലണ്ടനിലായിരുന്നതിനാലാണ് ചടങ്ങിൽ പങ്കെടുക്കാൻ കഴിയാതിരുന്നതെന്ന് ശ്വേത വ്യക്തമാക്കി.

ഇളയരാജയുടെ സംഗീതപരിപാടിക്കിടയിൽ എസ്. ജാനകി ആലപിച്ച ഒരു ഗാനം അവതരിപ്പിക്കുന്നതിനിടെ വികാരാധീനയായതിന്റെ വീഡിയോയും ശ്വേത സമൂഹമാധ്യമങ്ങളിൽ പങ്കുവെച്ചു. ഗാനത്തിനിടെ ശബ്ദം ഇടറിയതോടെ ഇളയരാജ വേദിയിൽ ആശ്വസിപ്പിക്കുന്ന ദൃശ്യങ്ങളും വീഡിയോയിൽ കാണാം.

ജാനകിയമ്മയുടെ വിയോഗവാർത്ത അറിഞ്ഞതിന്റെ ആഘാതത്തിൽ മനസ് തളർന്ന അവസ്ഥയിലായിരുന്നുവെന്നും, അത്തരം മാനസികാവസ്ഥയിലും വേദിയിൽ അവരുടെ പാട്ട് ആലപിക്കേണ്ടി വന്നത് ഏറെ പ്രയാസകരമായ അനുഭവമായിരുന്നുവെന്നും ശ്വേത കുറിച്ചു.

എസ്. ജാനകിയുടെ നിര്യാണം സംഗീതലോകത്തിന് തീരാനഷ്ടമാണെന്നും, വ്യക്തിപരമായി തനിക്ക് അതീവ വേദനയുണ്ടാക്കിയ സംഭവമാണെന്നും ശ്വേത പ്രതികരിച്ചു.

ഇതിഹാസ ഗായികയ്ക്ക് ഔദ്യോഗിക ബഹുമതികളോടെയായിരുന്നു അന്ത്യാഞ്ജലി അർപ്പിച്ചത്. അവസാനമായി ഒരു നോക്ക് കാണാൻ ആയിരക്കണക്കിന് ആരാധകരും സംഗീതലോകത്തെ പ്രമുഖരും ഒഴുകിയെത്തിയിരുന്നു. ഗായികമാരായ കെ.എസ്. ചിത്ര, സുജാത മോഹൻ എന്നിവരടക്കമുള്ള നിരവധി പേർ ചടങ്ങിൽ പങ്കെടുത്ത് ആദരാഞ്ജലി അർപ്പിച്ചിരുന്നു.