ക്രിസ്റ്റ്യാനോ റൊണാൾഡോ–ജോർജിന വിവാഹം ഈ വാരം? റിപ്പോർട്ടുകൾക്ക് പിന്നാലെ ആകാംക്ഷയിൽ ആരാധകർ

AUGUST 3, 2026, 10:08 PM

ലിസ്ബൺ: പോർച്ചുഗൽ ഫുട്ബാൾ ഇതിഹാസം ക്രിസ്റ്റ്യാനോ റൊണാൾഡോയും പങ്കാളിയായ സ്പാനിഷ്-അർജന്റീനിയൻ മോഡലും ഇൻഫ്ലുവൻസറുമായ ജോർജിന റൊഡ്രിഗസും ഈ വാരം വിവാഹിതരാകുമെന്ന റിപ്പോർട്ടുകൾ ശ്രദ്ധ നേടുന്നു. ഒരു പോർച്ചുഗീസ് മാധ്യമത്തിന്റെ റിപ്പോർട്ട് പ്രകാരം, ആഗസ്റ്റ് 8-നാണ് വിവാഹച്ചടങ്ങുകൾ നിശ്ചയിച്ചിരിക്കുന്നത്. 2025 ഓഗസ്റ്റിൽ ഇരുവരും വിവാഹനിശ്ചയം നടത്തിയിരുന്നുവെന്ന വിവരവും പുറത്തുവന്നിട്ടുണ്ട്.

റിപ്പോർട്ടുകൾ പ്രകാരം, റൊണാൾഡോയുടെ ജന്മനാടായ പോർച്ചുഗലിലെ മഡെയ്റ ദ്വീപിലെ ഫുൻഷാൽ കത്തീഡ്രലിലായിരിക്കും വിവാഹച്ചടങ്ങ് നടക്കുക. തുടർന്ന് മഡെയ്റയിലെ ആഡംബര പഞ്ചനക്ഷത്ര ഹോട്ടലായ സവോയ് പാലസിൽ വിവാഹാഘോഷങ്ങൾ സംഘടിപ്പിക്കുമെന്നാണ് വിവരം. അതിഥികൾക്കായി ഹോട്ടലിലെ നിരവധി ഫ്ലോറുകളും പ്രത്യേക ബാർ ഏരിയകളും ബുക്ക് ചെയ്തിട്ടുണ്ടെന്നും പ്രാദേശിക മാധ്യമങ്ങൾ റിപ്പോർട്ട് ചെയ്യുന്നു.

ചടങ്ങിന്റെ സ്വകാര്യത ഉറപ്പാക്കുന്നതിനായി ഫോട്ടോഗ്രഫി ഉൾപ്പെടെയുള്ള കാര്യങ്ങളിൽ കർശന നിയന്ത്രണങ്ങൾ ഏർപ്പെടുത്തിയിട്ടുണ്ടെന്നും റിപ്പോർട്ടുകളുണ്ട്. എന്നാൽ വിവാഹത്തെക്കുറിച്ചോ ചടങ്ങിന്റെ വിശദാംശങ്ങളെക്കുറിച്ചോ ക്രിസ്റ്റ്യാനോ റൊണാൾഡോയോ ജോർജിന റൊഡ്രിഗസോ ഇതുവരെ ഔദ്യോഗികമായി പ്രതികരിച്ചിട്ടില്ല.

41-കാരനായ റൊണാൾഡോയും 32-കാരിയായ ജോർജിനയും കഴിഞ്ഞ ഒമ്പത് വർഷമായി ഒരുമിച്ചാണ്. ഇരുവർക്കും അഞ്ച് മക്കളുണ്ട്. നിലവിൽ സൗദി അറേബ്യൻ ക്ലബ്ബായ അൽ നസറിന്റെ താരമായ റൊണാൾഡോ കുടുംബത്തോടൊപ്പം സൗദി അറേബ്യയിലാണ് താമസം. ജോർജിനയെ പരിചയപ്പെടുന്നതിന് മുമ്പ് റഷ്യൻ മോഡൽ ഐറിന ഷെയ്ക്കുമായി റൊണാൾഡോ അഞ്ചുവർഷത്തോളം പ്രണയത്തിലായിരുന്നു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്