ഇന്ത്യൻ സൂപ്പർ ലീഗിന്റെ 2025-26 സീസൺ ആരംഭിക്കാൻ പോവുകയാണ്.  നിശ്ചിതത്വങ്ങൾക്കൊടുവിൽ ഫെബ്രുവരി 14ന് ടൂർണമെന്റ് ആരംഭിക്കാനിരിക്കെ കേരള ബ്ലാസ്റ്റേഴ്‌സിന് വലിയ തിരിച്ചടികളാണ് നേരിടുന്നത്. ഇതിനോടകം ടീമിന്റെ എല്ലാ വിദേശ താരങ്ങളും ക്ലബ്ബ് വിട്ടുകഴിഞ്ഞു. ഇപ്പോഴിതാ മറ്റൊരു അപ്രതീക്ഷിത തിരിച്ചടികൂടി കേരള ബ്ലാസ്റ്റേഴ്‌സിന് നേരിട്ടിരിക്കുകയാണ്.

കേരള ബ്ലാസ്റ്റേഴ്‌സിലെ മലയാളി സൂപ്പർ താരങ്ങളും മലയാളികളുമായ മുഹമ്മദ് അസറും മുഹമ്മദ് അയ്മനും ക്ലബ്ബ് വിട്ടിരിക്കുകയാണ്. ഐ.എസ്.എൽ ആരംഭിക്കാൻ ദിവസങ്ങൾ മാത്രം ശേഷിക്കെയാണ് ഈ പടിയിറക്കം എന്നതാണ് എടുത്തു പറയേണ്ടത്. കേരള ബ്ലാസ്റ്റേഴ്‌സിന്റെ ഔദ്യോഗിക പേജിൽ പോസ്റ്റിട്ടാണ് ഇരുവരും പടിയിറക്കം ഔദ്യോഗികമായി പ്രഖ്യാപിച്ചത്.
'ഞങ്ങൾക്ക് എങ്ങനെ തുടങ്ങണം എന്ന് അറിയില്ല. കാരണം ഞങ്ങളെ ഞങ്ങളാക്കിയ ക്ലബ്ബാണ് കേരള ബ്ലാസ്റ്റേഴ്‌സ്.

ചെറുപ്പം മുതലേയുള്ള ഞങ്ങളുടെ ആഗ്രഹമായിരുന്നു കേരള ബ്ലാസ്റ്റേഴ്‌സിനായി നമ്മുടെ ആരാധകർക്ക് മുന്നിൽ കലൂർ സ്റ്റേഡിയത്തിൽ കളിക്കണമെന്ന്. വളരെ സന്തോഷമുണ്ട്. എന്നും ഞങ്ങൾ ഈ ക്ലബ്ബിനോടും ആരാധകരോടും കടപ്പെട്ടിരിക്കും. ഈ ഒരു തീരുമാനം വളരെ പ്രയാസത്തോടെയാണ് എടുത്തത്.

ഫുട്‌ബോളിൽ പുതിയ അവസരങ്ങൾ വരുമ്പോൾ അത് സ്വീകരിക്കാതെ മറ്റ് വഴികളില്ല. നിങ്ങൾ തന്ന സനേഹം ഇനിയും ഞങ്ങൾക്ക് ഉണ്ടാവുമെന്ന് പ്രതീക്ഷിക്കുന്നു. ഈ തീരുമാനത്തിൽ ഞങ്ങളെ ഏറ്റവും പിന്തുണച്ചത് കേരള ബ്ലാസ്റ്റേഴ്‌സ് എഫ്‌സിയാണ്. ഒരിക്കൽ കൂടി കേരള ബ്ലാസ്റ്റേഴ്‌സിന് നന്ദി പറയുന്നു. മഞ്ഞപ്പടയോടും ഞങ്ങൾ നന്ദി അറിയിക്കുന്നു' എന്നാണ് കേരള ബ്ലാസ്റ്റേഴ്‌സ് പേജിലൂടെ ഇരുവരും ആരാധകരെ അറിയിച്ചത്.

സപോർട്ടിങ് ക്ലബ്ബ് ഡൽഹിയിലേക്കാണ് ഇരുവരും കൂടുമാറ്റം നടത്തിയിരിക്കുന്നത്. മുൻ കേരള ബ്ലാസ്റ്റേഴ്‌സ് പരിശീലക സംഘത്തിലെ പ്രധാനിയായിരുന്ന തോമസ് ഷോർസ് ഇപ്പോൾ ഡൽഹിക്കൊപ്പമാണ്. തങ്ങളുടെ വളർച്ചയിൽ നിർണ്ണായക പങ്കുവഹിച്ച പരിശീലകനൊപ്പം വീണ്ടും ചേരാനുള്ള നീക്കമാണ് ഇപ്പോൾ ഇവർ നടത്തിയിരിക്കുന്നത്. 2023ൽ അയ്മന്റേയും അസറിന്റേയും കരാർ 202526 സീസൺവരെ പുതുക്കി നൽകിയിരുന്നു.

ഇപ്പോൾ കരാർ അവസാനിച്ചതോടെ ക്ലബ്ബ് വിടാനുള്ള തീരുമാനത്തിലേക്ക് ഇരുവരും എത്തുകയായിരുന്നു. രണ്ട് പേരും കളിക്കാതിരുന്നാൽ കേരള ബ്ലാസ്റ്റേഴ്‌സിന്റെ പദ്ധതികളെ അത് ഐഎസ്എല്ലിൽ പ്രതികൂലമായി ബാധിക്കുമെന്നുറപ്പ്. പരിശീലകനായി ഡേവിഡ് കറ്റാല തന്നെ തുടർന്നേക്കും. ഇത്തവണ എന്താവും കറ്റാലയുടെ പദ്ധതിയെന്നതാണ് ഇനി കണ്ടറിയേണ്ടത്. സ്പാനിഷ് പരിശീലകനായ കറ്റാലക്ക് ഇത്തവണ തന്ത്രം മെനയാൻ ഒരു വിദേശ താരം പോലും ബ്ലാസ്റ്റേഴ്‌സിൽ ഇല്ലെന്നതാണ് എടുത്തു പറയേണ്ടത്.

വിദേശ താരങ്ങളില്ല! കേരള ബ്ലാസ്റ്റേഴ്‌സിന്റെ സ്റ്റാർട്ടിങ് 11 എങ്ങനെ? ഐ.എസ്.എല്ലിൽ ഞെട്ടിക്കാൻ മഞ്ഞപ്പട തയ്യാർ; പ്രതീക്ഷയോടെ ആരാധകർ
കേരള ബ്ലാസ്റ്റേഴ്‌സ് എഫ്‌സിയിൽ ശേഷിച്ചിരുന്ന രണ്ട് വിദേശ താരങ്ങളുടേയും പടിയിറക്കം ഇന്നലെ ഔദ്യോഗികമായി കേരള ബ്ലാസ്റ്റേഴ്‌സ് ആരാധകരെ അറിയിച്ചു. കോൽഡോ ഒബിയേറ്റയും ദുഷാൻ ലാഗറ്ററുമാണ് അവസാനമായി ക്ലബ്ബ് വിട്ടത്. ഇരു താരങ്ങളുമായുള്ള കരാർ പരസ്പര ധാരണയോടെ അവസാനിപ്പിച്ചതായി ക്ലബ്ബ് ഔദ്യോഗികമായി അറിയിച്ചു.

കോൽഡോ ഒബിയേറ്റ ഇന്ത്യക്ക് പുറത്തുള്ള ക്ലബിലേക്ക് ചേക്കേറും. ക്ലബ്ബിനായി താരം പുലർത്തിയ പ്രൊഫഷണലിസത്തിനും സമർപ്പണത്തിനും കേരള ബ്ലാസ്റ്റേഴ്‌സ് നന്ദി രേഖപ്പെടുത്തി. ദുഷാൻ ലാഗറ്ററുമായുള്ള കരാറും ക്ലബ്ബ് പരസ്പര സമ്മതപ്രകാരം റദ്ദാക്കി. ബ്ലാസ്റ്റേഴ്‌സിനായി അദ്ദേഹം നൽകിയ സംഭാവനകൾക്ക് ക്ലബ്ബ് നന്ദി അറിയിക്കുന്നു. ഇരുവരുടെയും ഭാവി കരിയറിന് കേരള ബ്ലാസ്റ്റേഴ്‌സ് എഫ്.സി എല്ലാവിധ ആശംസകളും നേർന്നു.

എന്തായാലും ഇത്തവണ കേരള ബ്ലാസ്റ്റേഴ്‌സിന് കാര്യങ്ങൾ എളുപ്പമാവില്ലെന്നുറപ്പ്. ഐഎസ്എല്ലിൽ ഇത്തവണ കോഴിക്കോടേക്ക് തട്ടകം മറ്റിയാണ് ബ്ലാസ്റ്റേഴ്‌സ് കളിക്കുന്നത്. ഇന്ത്യയുടെ യുവതാരങ്ങളിൽ പലരും ബ്ലാസ്റ്റേഴ്‌സിനൊപ്പമുണ്ട്. ഇവരെ വെച്ച് ക്ലബ്ബ് എന്ത് അത്ഭുതമാവും കാട്ടുകയെന്നതാണ് ഇനി കാത്തിരുന്ന് കണ്ട് അറിയേണ്ടത്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്