ഐ.പി.എൽ ചരിത്രത്തിൽ അപൂർവനേട്ടം സ്വന്തമാക്കി ആർ.സി.ബി പേസർ ഭുവനേശ്വർ കുമാർ. ഐ.പി.എല്ലിൽ 200 വിക്കറ്റുകൾ സ്വന്തമാക്കുന്ന ആദ്യ പേസ് ബൗളർ എന്ന അപൂർവ റെക്കോർഡാണ് ഭുവി സ്വന്തമാക്കിയത്.
ചിന്നസ്വാമി സ്റ്റേഡിയത്തിൽ ചെന്നൈ സൂപ്പർ കിംഗ്സിനെതിരായ മത്സരത്തിൽ ചെന്നൈ താരം ആയുഷ് മാത്രെയെ പുറത്താക്കിയാണ് ഭുവനേശ്വർ ഈ നേട്ടത്തിലെത്തിയത്. 192 മത്സരങ്ങളിൽ നിന്നാണ് ഭുവി 200 വിക്കറ്റ് തികച്ചത്. ചെന്നൈക്കെതിരെ നാലോവറിൽ 41 റൺസ് വഴങ്ങി ഭുവി മൂന്ന് വിക്കറ്റെടുത്തിരുന്നു.
ഐ.പി.എൽ ചരിത്രത്തിൽ 200 വിക്കറ്റ് സ്വന്തമാക്കുന്ന രണ്ടാമത്തെ ബൗളറും ആദ്യ പേസറുമാണ് ഭുവനേശ്വർ കുമാർ. പഞ്ചാബ് കിംഗ്സ് സ്പിന്നറായ യുസ്വേന്ദ്ര ചാഹലാണ് (224 വിക്കറ്റ്) ഐ.പി.എല്ലിൽ 200 വിക്കറ്റ് തികച്ച ആദ്യ ബൗളർ. കൊൽക്കത്ത നൈറ്റ് റൈഡേഴ്സിനായി 191 മത്സരങ്ങളിൽ നിന്ന് 193 വിക്കറ്റുകൾ വീഴ്ത്തിയ സുനിൽ നരെയ്നാണ് ഐ.പി.എൽ ചരിത്രത്തിൽ വിക്കറ്റ് വേട്ടയിൽ മൂന്നാം സ്ഥാനത്ത്. ഒരു ടീമിനായി ഏറ്റവും കൂടുതൽ വിക്കറ്റ് നേടുന്ന താരം എന്ന റെക്കോർഡ് നിലവിൽ നരെയ്ന്റെ പേരിലാണ്.
പേസ് ബൗളർമാരുടെ പട്ടികയിൽ ജസ്പ്രീത് ബുംറ, ഡ്വെയ്ൻ ബ്രാവോ എന്നിവരെ പിന്നിലാക്കിയാണ് ഭുവനേശ്വറിന്റെ കുതിപ്പ്. ബുംറയ്ക്കും ബ്രാവോയ്ക്കും നിലവിൽ 183 വിക്കറ്റുകൾ വീതമാണുള്ളത്. 2013 മുതൽ മുംബൈ ഇന്ത്യൻസിനൊപ്പമുള്ള ബുംറ 147 മത്സരങ്ങളിൽ നിന്നാണ് ഈ നേട്ടത്തിലെത്തിയത്. ഐ.പി.എല്ലിൽ നിന്ന് വിരമിച്ച ബ്രാവോ 161 മത്സരങ്ങളിൽ നിന്നാണ് 183 വിക്കറ്റുകൾ സ്വന്തമാക്കിയത്.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
