നദാലിന്റെ പോരാട്ടങ്ങൾ അറിഞ്ഞപ്പോൾ മനസ്സ് തകർന്നു; ഹൃദയസ്പർശിയായ കുറിപ്പുമായി ധനുഷ്

JUNE 9, 2026, 9:59 PM

ചെന്നൈ: ടെന്നീസ് ഇതിഹാസം റാഫേൽ നദാലിനെ വിമർശിച്ചതിൽ ഖേദം പ്രകടിപ്പിച്ച് നടൻ ധനുഷ്. നെറ്റ്ഫ്ലിക്സിൽ പുറത്തിറങ്ങിയ റാഫ ഡോക്യുമെന്ററി കണ്ടതിന് പിന്നാലെ സമൂഹമാധ്യമങ്ങളിലൂടെ പങ്കുവെച്ച കുറിപ്പിലാണ് ധനുഷ് തന്റെ വികാരങ്ങൾ തുറന്നുപറഞ്ഞത്.

തന്റെ ജീവിതത്തിൽ ഏറ്റവും കൂടുതൽ സമയം കണ്ട കായികതാരങ്ങളിൽ ഒരാളാണ് റാഫേൽ നദാൽ എന്ന് ധനുഷ് കുറിച്ചു. മത്സരങ്ങൾക്കിടെ നദാൽ പോയിന്റുകൾ നഷ്ടപ്പെടുത്തുകയോ തോൽക്കുകയോ ചെയ്യുമ്പോൾ ടെലിവിഷന് മുന്നിലിരുന്ന് താൻ നിരാശയും ദേഷ്യവും പ്രകടിപ്പിച്ചിരുന്നുവെന്നും താരം സമ്മതിച്ചു.

എന്നാൽ നദാൽ തന്റെ കരിയറിനിടെ നേരിട്ട ശാരീരികവും മാനസികവുമായ വെല്ലുവിളികൾ ഡോക്യുമെന്ററിയിലൂടെ മനസ്സിലാക്കിയ ശേഷമാണ് അദ്ദേഹത്തിന്റെ പോരാട്ടത്തിന്റെ ആഴം തിരിച്ചറിഞ്ഞതെന്ന് ധനുഷ് പറഞ്ഞു.

“താങ്കൾ ഇത്രയധികം വേദനയും ബുദ്ധിമുട്ടുകളും സഹിച്ചാണ് ഓരോ മത്സരത്തിനും ഇറങ്ങിയിരുന്നതെന്ന് എനിക്കറിയില്ലായിരുന്നു. അതറിയാതെ, തോൽവികളുടെ സമയങ്ങളിൽ ‘വാമോസ് റാഫ, നിനക്ക് ഇതിലും നന്നായി കളിക്കാമായിരുന്നു’ എന്ന് ഞാൻ പറഞ്ഞിട്ടുണ്ട്. ആ നിമിഷങ്ങളെയോർത്ത് ഇപ്പോൾ ഖേദമുണ്ട്,” എന്നാണ് ധനുഷ് കുറിച്ചത്.

പരിക്കുകളെയും ദീർഘകാല ആരോഗ്യപ്രശ്നങ്ങളെയും അതിജീവിച്ചാണ് നദാൽ തന്റെ കരിയറിലെ നേട്ടങ്ങൾ സ്വന്തമാക്കിയതെന്നും അദ്ദേഹം ചൂണ്ടിക്കാട്ടി. നൊവാക് ജോക്കോവിച്ചിനും റോജർ ഫെഡറർക്കും അനുകൂലമായ നിരവധി റെക്കോർഡുകൾ ഉണ്ടായേക്കാമെങ്കിലും, തന്റെ കാഴ്ചപ്പാടിൽ എക്കാലത്തെയും മികച്ച താരം റാഫേൽ നദാൽ തന്നെയാണെന്ന് ധനുഷ് വ്യക്തമാക്കി.

“എന്നെ സംബന്ധിച്ചിടത്തോളം ചാരത്തിൽ നിന്ന് ഉയിർത്തെഴുന്നേൽക്കുന്ന ഫീനിക്‌സ് പക്ഷിയെപ്പോലെ വീണ്ടും വീണ്ടും തിരിച്ചുവന്ന റാഫേൽ നദാൽ തന്നെയാണ് യഥാർത്ഥ GOAT,” എന്നാണ് ധനുഷിന്റെ കുറിപ്പിലെ ശ്രദ്ധേയമായ പരാമർശം.