ഉറുഗ്വെയുടെ മുഖ്യപരിശീലകനായി ഡിയേഗോ ഫോർലാനെ നിയമിച്ചു

AUGUST 9, 2026, 3:56 AM

ഉറുഗ്വെ ഫുട്‌ബോൾ അസോസിയേഷൻ ദേശീയ ടീമിന്റെ മുഖ്യപരിശീലകനായി ഡിയേഗോ ഫോർലാനെ നിയമിച്ചതായി ഔദ്യോഗികമായി പ്രഖ്യാപിച്ചു.

2026 ലോകകപ്പിൽ ടീമിന്റെ ദയനീയ പ്രകടനവും പ്രതീക്ഷയ്‌ക്കൊത്ത ഫലം നേടാനാകാതിരുന്നതുമാണ് പരിശീലക മാറ്റത്തിന് വഴിവെച്ചത്.

ഉറുഗ്വെയുടെ എക്കാലത്തെയും മികച്ച ഫുട്‌ബോൾ താരങ്ങളിലൊരാളായ ഫോർലാൻ, 2010 ലോകകപ്പിൽ അഞ്ച് ഗോളുകൾ നേടി ഗോൾഡൻ ബോൾ സ്വന്തമാക്കിയിരുന്നു. ദേശീയ ടീമിനായി 100ലധികം മത്സരങ്ങൾ കളിച്ച അദ്ദേഹം വർഷങ്ങളോളം ഉറുഗ്വെയുടെ മുന്നേറ്റനിരയിലെ നിർണായക സാന്നിധ്യമായിരുന്നു. കളിക്കാരനായുള്ള സമ്പന്നമായ അനുഭവം ഇപ്പോൾ പരിശീലകസ്ഥാനത്തേക്ക് എത്തുകയാണ്.

ലോകകപ്പിലെ നിരാശാജനക പ്രകടനത്തിന് ശേഷം ടീമിൽ വലിയ മാറ്റങ്ങൾ അനിവാര്യമാണെന്ന വിലയിരുത്തലിന്റെ അടിസ്ഥാനത്തിലാണ് ഫോർലാനെ ചുമതല ഏൽപ്പിച്ചത്. യുവതാരങ്ങൾക്ക് കൂടുതൽ അവസരം നൽകിയും ആക്രമണാത്മക ഫു്ടബോൾ ശൈലി തിരിച്ചുകൊണ്ടുവന്നും ഉറുഗ്വെയെ വീണ്ടും ലോക ഫുട്‌ബോളിലെ ശക്തരാക്കുക എന്നതാണ് അദ്ദേഹത്തിന് മുന്നിലുള്ള പ്രധാന വെല്ലുവിളി.

ദേശീയ ടീമിന്റെ പരിശീലകസ്ഥാനത്തേക്കുള്ള ഫോർലാന്റെ നിയമനം ഉറുഗ്വെ ആരാധകർ ആവേശത്തോടെയാണ് സ്വീകരിച്ചിരിക്കുന്നത്. ഒരു കാലത്ത് മൈതാനത്ത് രാജ്യത്തെ വിജയങ്ങളിലേക്ക് നയിച്ച ഇതിഹാസം ഇനി ടച്ച്‌ലൈനിൽ നിന്ന് അതേ ദൗത്യം നിറവേറ്റുമോയെന്നാണ് ഫുട്‌ബോൾ ലോകം ഉറ്റുനോക്കുന്നത്.