റയൽ തോറ്റു, ലെവാന്റയെ തോൽപ്പിച്ച് ബാഴ്‌സലോണ വീണ്ടും ഒന്നാമത്

FEBRUARY 24, 2026, 2:51 AM

മാഡ്രിഡ് : കഴിഞ്ഞ രാത്രി ഒസാസുനയിൽ നിന്ന് റയൽ മാഡ്രിഡ് തോൽവിയേറ്റുവാങ്ങിയതിന് പിന്നാലെ മറുപടിയില്ലാത്ത മൂന്നുഗോളുകൾക്ക് ലെവാന്റയെ തോൽപ്പിച്ച് ബാഴ്‌സലോണ സ്പാനിഷ് ലാ ലിഗ ഫുട്‌ബോളിൽ ഒന്നാം സ്ഥാനത്തേക്ക് തിരിച്ചെത്തി.

ഒന്നിനെതിരെ രണ്ടുഗോളുകൾക്കാണ് ഒസാസുന റയലിനെ വീഴ്ത്തിയത്. 38-ാം മിനിട്ടിൽ അന്റേ ബുദ്മിർ പെനാൽറ്റിയിലൂടെ നേടിയ ഗോളിന് ഒസാസുന മുന്നിലെത്തിയിരുന്നു. 73-ാം മിനിട്ടിൽ വിനീഷ്യസ് ജൂനിയറിലൂടെ റയൽ സമനില പിടിച്ചെങ്കിലും 90-ാം മിനിട്ടിൽ റൗൾ ഗാർഷ്യ നേടിയ ഗോൾ റയലിന്റെ തോൽവി ഉറപ്പാക്കി. ഇതിന് പിന്നാലെ ബാഴ്‌സ സ്വന്തം തട്ടകത്തിൽ വച്ച് ലെവാന്റെയെ തോൽപ്പിക്കുകയായിരുന്നു. നാലാം മിനിട്ടിൽ മാർക്ക് ബെമൽ,32-ാം മിനിട്ടിൽ ഫ്രെങ്കീ ഡിയോംഗ്, 81-ാം മിനിട്ടിൽ ഫെർമിൻ ലോപ്പസ് എന്നിവരാണ് ബാഴ്‌സയ്ക്ക് വേണ്ടി സ്‌കോർ ചെയ്തത്.

ഒരൊറ്റപ്പോയിന്റ് വ്യത്യാസത്തിലാണ് ബാഴ്‌സ റയലിനെക്കാൾ മുന്നിലുള്ളത്. ബാഴ്‌സയ്ക്ക് 25 മത്സരങ്ങളിൽ നിന്ന് 61 പോയിന്റും റയലിന് 25 മത്സരങ്ങളിൽ നിന്ന് 60 പോയിന്റുമാണുള്ളത്.