'നോ കിസ്സിംഗ്' പോളിസി വേണ്ടെന്ന് വെച്ചു, ആദ്യ ചുംബനരംഗം തന്നെ അസ്വസ്ഥയാക്കി'; നടി കാജോൾ

APRIL 23, 2026, 10:57 PM

മൂന്ന് പതിറ്റാണ്ടോളം നീണ്ട സിനിമാ ജീവിതത്തിൽ താൻ കാത്തുസൂക്ഷിച്ച കർശനമായ നിയമങ്ങളിൽ മാറ്റം വരുത്തി ബോളിവുഡ് നടി കാജോൾ.

തന്റെ അഭിനയ ജീവിതത്തിൽ ഇതുവരെ പിന്തുടർന്നിരുന്ന 'നോ കിസ്സിംഗ്' പോളിസി മാറ്റിവെച്ചാണ് താരം 2023-ൽ പുറത്തിറങ്ങിയ 'ദ ട്രയൽ - പ്യാർ, കാനൂൻ, ധോക്ക' എന്ന വെബ് സീരീസിൽ പ്രത്യക്ഷപ്പെട്ടത്.

ഇതിൽ സഹനടൻ ജിഷു സെൻഗുപ്തയുമായുള്ള ചുംബനരംഗത്തെക്കുറിച്ച് താരം അടുത്തിടെ ഒരു പോഡ്‌കാസ്റ്റിൽ മനസ്സ് തുറന്നു. ഈ രംഗം വെറുമൊരു ആകർഷണത്തിന് വേണ്ടിയല്ല, മറിച്ച് കഥാപാത്രത്തിന്റെ സ്വഭാവത്തിന് അത് ഒഴിച്ചുകൂടാനാവാത്തതുകൊണ്ടാണ് താൻ സമ്മതിച്ചതെന്ന് കാജോൾ വ്യക്തമാക്കി.

യൂട്യൂബ് വ്യക്തിത്വമായ ലില്ലി സിംഗിന്റെ പോഡ്‌കാസ്റ്റിലാണ് കാജോൾ തന്റെ തീരുമാനത്തിന് പിന്നിലെ കാരണം വിശദീകരിച്ചത്. നൊയോനിക സെൻഗുപ്ത എന്ന കഥാപാത്രത്തിന്റെ ചിന്തകളും ആഗ്രഹങ്ങളും വിശ്വാസങ്ങളും പ്രകടിപ്പിക്കാൻ ആ രംഗം അനിവാര്യമായിരുന്നു.

എന്നാൽ ഈ രംഗം ചിത്രീകരിക്കുന്നതിന് മുൻപ് താൻ വലിയ അസ്വസ്ഥത അനുഭവിച്ചിരുന്നുവെന്നും കാജോൾ വെളിപ്പെടുത്തി. സെറ്റിൽ നിൽക്കുമ്പോൾ പോലും താൻ ഇത് ചെയ്യുമോ അതോ 'കട്ട്' പറയുമോ എന്ന കാര്യത്തിൽ തനിക്ക് തന്നെ ഉറപ്പില്ലായിരുന്നു.

ഒടുവിൽ അതൊരു പ്രൊഫഷണൽ തീരുമാനമായി എടുക്കുകയായിരുന്നുവെന്ന് താരം പറഞ്ഞു. പ്രമുഖ സീരീസായ 'ദ ഗുഡ് വൈഫിന്റെ' ഇന്ത്യൻ പതിപ്പായ 'ദ ട്രയലിന്റെ' രണ്ടാം സീസൺ ഇപ്പോൾ ജിയോ ഹോട്ട്സ്റ്റാറിൽ സ്ട്രീം ചെയ്യുന്നുണ്ട്.