നടി റെബ മോണിക്ക ജോണിന് പെൺകുഞ്ഞ്; സന്തോഷവാർത്ത പങ്കുവെച്ച് താരം

JULY 29, 2026, 6:09 AM

കൊച്ചി: നടി റെബ മോണിക്ക ജോണും ഭർത്താവ് ജോമോൻ ജോസഫും ജീവിതത്തിലെ പുതിയ സന്തോഷം ആരാധകരുമായി പങ്കുവെച്ചു. ഇരുവർക്കും പെൺകുഞ്ഞ് ജനിച്ചതായി റെബ സമൂഹമാധ്യമത്തിലൂടെയാണ് അറിയിച്ചത്. ജൂലൈ 22-നാണ് കുഞ്ഞ് ജനിച്ചതെന്നും 'കിയാര ജോസഫ്' എന്നാണ് മകൾക്ക് പേരിട്ടിരിക്കുന്നതെന്നും താരം വ്യക്തമാക്കി.

കുഞ്ഞ് ജനിച്ച ശേഷമുള്ള പുതിയ ജീവിതവുമായി പൊരുത്തപ്പെട്ടുവരുന്നതിനാലാണ് സന്തോഷവാർത്ത പങ്കുവെക്കാൻ കുറച്ച് വൈകിയതെന്നും റെബ ഇൻസ്റ്റഗ്രാമിൽ കുറിച്ചു. ജീവിതത്തിലേക്ക് വെളിച്ചമായി എത്തിയ കുഞ്ഞിനെ അടുത്തറിഞ്ഞും ഓരോ നിമിഷവും ആസ്വദിച്ചുമാണ് കഴിഞ്ഞ ദിവസങ്ങൾ കടന്നുപോയതെന്നും താരം പറഞ്ഞു.

ഗർഭകാലം തന്റെ ജീവിതത്തിലെ ഏറ്റവും മനോഹരമായ അനുഭവങ്ങളിലൊന്നായിരുന്നുവെന്നും ഒരു സ്ത്രീയുടെ ശരീരത്തിനുള്ളിൽ പുതിയൊരു ജീവൻ വളരുന്നത് അത്ഭുതകരമായ അനുഭവമാണെന്നും റെബ പങ്കുവെച്ചു. കഴിഞ്ഞ ഒൻപത് മാസവും കുഞ്ഞ് തനിക്ക് സ്നേഹവും കരുതലും മാത്രമാണ് സമ്മാനിച്ചതെന്നും ഇപ്പോൾ അവൾ തങ്ങളുടെ കൈകളിലുണ്ടെന്നും താരം കുറിച്ചു.

ഇനി മകൾക്ക് ലോകം പരിചയപ്പെടുത്താനും ഒരുമിച്ച് മനോഹരമായ ഓർമകൾ സൃഷ്ടിക്കാനുമാണ് തങ്ങൾ കാത്തിരിക്കുന്നതെന്നും ഈ പുതിയ ജീവിതയാത്രയിൽ എല്ലാവരുടെയും സ്നേഹവും അനുഗ്രഹവും ഉണ്ടാകണമെന്നുമാണ് റെബയുടെ അഭ്യർഥന.

'ജേക്കബിന്റെ സ്വർഗ്ഗരാജ്യം', 'ഫോറൻസിക്' തുടങ്ങിയ ചിത്രങ്ങളിലൂടെ ശ്രദ്ധ നേടിയ റെബ, തമിഴിൽ വിജയ് നായകനായ 'ബിഗിൽ' എന്ന ചിത്രത്തിലൂടെയും ശ്രദ്ധേയയായി. 2022-ലാണ് റെബയും ജോമോൻ ജോസഫും വിവാഹിതരായത്. ആദ്യ കുഞ്ഞിനെ വരവേൽക്കാനിരിക്കുകയാണെന്ന വിവരം നേരത്തേ ഇരുവരും സമൂഹമാധ്യമങ്ങളിലൂടെ പങ്കുവെച്ചിരുന്നു.

റെബയുടെ പോസ്റ്റിന് പിന്നാലെ സിനിമ-ടെലിവിഷൻ രംഗത്തെ നിരവധി താരങ്ങളും ആരാധകരും ആശംസകളുമായി എത്തി.