'വെളുത്ത നടിമാരോട് മാത്രം പ്രിയം': തെന്നിന്ത്യൻ സിനിമയ്ക്കെതിരെ രാധിക ആപ്തെ

OCTOBER 28, 2026, 1:18 AM

വെള്ളിത്തിരയിലെ സ്വാഭാവിക അഭിനയശൈലി കൊണ്ടും ശക്തമായ നിലപാടുകൾ കൊണ്ടും എന്നും ആരാധകരെ വിസ്മയിപ്പിച്ചിട്ടുള്ള താരമാണ് രാധിക ആപ്തെ. എന്നാൽ തെന്നിന്ത്യൻ സിനിമകളിൽ നിന്ന് വർഷങ്ങളായി താരം വിട്ടുനിൽക്കുന്നതിനുള്ള യഥാർത്ഥ കാരണം എന്താണെന്ന ചോദ്യത്തിന് ഒടുവിൽ വ്യക്തമായ മറുപടി നൽകിയിരിക്കുകയാണ് ഈ പ്രമുഖ ബോളിവുഡ് നടി.

പ്രധാനമായും നിറത്തിന്റെ അടിസ്ഥാനത്തിൽ വടക്കേന്ത്യൻ നടിമാരെ സൗത്ത് ഇന്ത്യൻ സിനിമകളിൽ തിരഞ്ഞെടുക്കുന്ന പ്രവണതയും ഭാഷാപരമായ തടസ്സങ്ങളുമാണ് ഇതിന് കാരണമായതെന്ന് താരം വ്യക്തമാക്കുന്നു.

കൂടുതൽ വെളുത്ത നിറമുള്ളവരെ തിരഞ്ഞുപിടിച്ച് അഭിനയിപ്പിക്കുന്നതിലും, ഭാഷയറിയാത്ത നടിമാർക്ക് പകരം പ്രാദേശിക ഭാഷ സംസാരിക്കുന്ന കഴിവുള്ള സൗത്ത് നടിമാർക്ക് അവസരം നൽകാത്തതിലുമുള്ള തന്റെ എതിർപ്പാണ് ഇതിലേക്ക് നയിച്ചതെന്ന് രാധിക കൂട്ടിച്ചേർത്തു.

ഭാഷ കൃത്യമായി അറിയാതെ ഒരു കഥാപാത്രത്തോട് പൂർണ്ണമായി നീതി പുലർത്താൻ കഴിയില്ലെന്ന തിരിച്ചറിവും തീരുമാനത്തിന് പിന്നിലുണ്ടായിരുന്നു. പല ഭാഷകളിൽ അഭിനയിച്ചെങ്കിലും സംഭാഷണങ്ങൾ കാണാതെ പഠിച്ച് പറയുന്നതിനപ്പുറം സന്ദർഭത്തിനനുസരിച്ച് മെച്ചപ്പെടുത്താൻ ഭാഷാജ്ഞാനം അത്യാവശ്യമാണെന്ന് രാധിക ഓർമ്മിപ്പിച്ചു. കൂടാതെ, സൗത്ത് ഇന്ത്യൻ സിനിമാ മേഖലയിലെ പുരുഷാധിപത്യ പ്രവണതകളെയും സ്ത്രീ കഥാപാത്രങ്ങളെ ചിത്രീകരിക്കുന്ന രീതികളെയും മുൻപ് താരം വിമർശിച്ചിരുന്നു.

എങ്കിലും, ഷൂട്ടിംഗ് സെറ്റുകളിലെ സൗഹൃദപൂർവ്വമായ അന്തരീക്ഷത്തെയും തന്നെ കുടുംബത്തിലെ അംഗത്തെപ്പോലെ പരിചരിച്ച ആളുകളുടെ നന്മയെയും താരം ഓർത്തെടുത്തു. പല കാര്യങ്ങളും സൗഹൃദത്തിന്റെ പേരിൽ ചെയ്യേണ്ടി വന്നിട്ടുണ്ടെങ്കിലും അവിടെയുള്ള മനുഷ്യരുടെ സൌമ്യമായ പെരുമാറ്റം സന്തോഷം നൽകുന്നതായിരുന്നുവെന്നും നിലവിൽ നെറ്റ്ഫ്ലിക്സ് ചിത്രമായ 'അക്ക'യുടെ റിലീസിനായി കാത്തിരിക്കുന്ന രാധിക ആപ്തെ വ്യക്തമാക്കി.