ചൂടും അന്തരീക്ഷ മലിനീകരണവും ചർമ്മത്തിന് വില്ലൻ; അകാല വാർദ്ധക്യം തടയാൻ ശ്രദ്ധിക്കേണ്ട കാര്യങ്ങൾ

APRIL 27, 2026, 5:15 AM

ആഗോളതലത്തിൽ പ്രകടമാകുന്ന കാലാവസ്ഥാ വ്യതിയാനം മനുഷ്യന്റെ ചർമ്മത്തെയും ദോഷകരമായി ബാധിക്കുന്നുവെന്ന് ആരോഗ്യവിദഗ്ധർ. താപനിലയിലെ വർദ്ധനവ്, അൾട്രാവയലറ്റ് (UV) രശ്മികളുടെ ആധിക്യം, അന്തരീക്ഷ മലിനീകരണം, ഈർപ്പത്തിലുണ്ടാകുന്ന മാറ്റങ്ങൾ എന്നിവ ചർമ്മത്തിൽ കറുത്ത പാടുകൾ, അകാല വാർദ്ധക്യം, മുഖക്കുരു തുടങ്ങിയ പ്രശ്നങ്ങൾക്ക് കാരണമാകുന്നതായി 'സോളി സ്കിൻ' സ്ഥാപകയും ഡെർമറ്റോളജിസ്റ്റുമായ ഡോ. നിരൂപമ പർവാണ്ട ചൂണ്ടിക്കാട്ടുന്നു. കാലാവസ്ഥാ വ്യതിയാനത്തെ നേരിടാൻ ചർമ്മസംരക്ഷണത്തിൽ വരുത്തേണ്ട മാറ്റങ്ങളെക്കുറിച്ച് അവർ വിശദീകരിക്കുന്നു.

സൺസ്ക്രീൻ ഒഴിവാക്കരുത്

ചർമ്മത്തിന് ഏറ്റവും കൂടുതൽ നാശം വരുത്തുന്നത് അൾട്രാവയലറ്റ് രശ്മികളാണ്. ഇത് ചർമ്മത്തിന്റെ പ്രായം വർദ്ധിപ്പിക്കുകയും ചുളിവുകൾക്കും കറുത്ത പാടുകൾക്കും കാരണമാവുകയും ചെയ്യുന്നു. ഇതിനെ പ്രതിരോധിക്കാൻ ദിവസവും ചുരുങ്ങിയത് SPF 30+ ഉള്ള സൺസ്ക്രീൻ ഉപയോഗിക്കണം. കുറഞ്ഞത് രണ്ട് വിരലുകളുടെ അളവിൽ സൺസ്ക്രീൻ മുഖത്തും കഴുത്തിലും പുരട്ടേണ്ടത് അത്യാവശ്യമാണ്. ദീർഘനേരം വെയിലത്ത് ഇരിക്കുന്നവർ ഓരോ 2–3 മണിക്കൂർ കൂടുമ്പോഴും സൺസ്ക്രീൻ വീണ്ടും പുരട്ടാൻ ശ്രദ്ധിക്കണം.

മലിനീകരണവും ചർമ്മവും

അന്തരീക്ഷത്തിലെ അതിസൂക്ഷ്മ കണികകൾ (PM2.5) ചർമ്മത്തിലേക്ക് ആഴ്ന്നിറങ്ങുകയും കോശങ്ങൾക്ക് നാശമുണ്ടാക്കുകയും ചെയ്യുന്നു. ഇത് ചർമ്മത്തിലെ കൊളാജൻ നശിക്കാനും വീക്കമുണ്ടാകാനും കാരണമാകും. ഇതിനെ ചെറുക്കാൻ വിറ്റാമിൻ സി (Vitamin C), നിയാസിനാമൈഡ് (Niacinamide) എന്നിവ അടങ്ങിയ ആന്റിഓക്സിഡന്റുകൾ ഉപയോഗിക്കുന്നത് ഫലപ്രദമാണ്. വിറ്റാമിൻ സി കറുത്ത പാടുകൾ കുറയ്ക്കുമ്പോൾ, നിയാസിനാമൈഡ് ചർമ്മത്തിന്റെ സ്വാഭാവിക പ്രതിരോധം ശക്തമാക്കുന്നു.

ഈർപ്പവും ജലാംശവും

അന്തരീക്ഷത്തിലെ ഈർപ്പത്തിലുണ്ടാകുന്ന മാറ്റങ്ങൾ ചർമ്മം വരണ്ടുപോകാനോ അമിതമായി എണ്ണമയമുള്ളതാകാനോ കാരണമാകും. ഹൈലൂറോണിക് ആസിഡ് (Hyaluronic acid), സെറാമൈഡ്സ് (Ceramides), ഗ്ലിസറിൻ എന്നിവ അടങ്ങിയ ഉൽപ്പന്നങ്ങൾ ഉപയോഗിക്കുന്നത് ചർമ്മത്തിലെ ജലാംശം നിലനിർത്താൻ സഹായിക്കും.

കൂടാതെ, വീര്യം കുറഞ്ഞ ക്ലെൻസറുകൾ ഉപയോഗിച്ച് ചർമ്മം വൃത്തിയാക്കാൻ ശ്രദ്ധിക്കണം; അമിതമായി കഴുകുന്നതും കഠിനമായ കെമിക്കലുകൾ ഉപയോഗിക്കുന്നതും ചർമ്മത്തിന്റെ സ്വാഭാവിക കവചത്തെ തകർക്കുമെന്നും ഡോക്ടർ മുന്നറിയിപ്പ് നൽകുന്നു.

പ്രധാന നിർദ്ദേശങ്ങൾ: