'സിൽക്ക് സ്മിതയുടെ കഴുത്തില്‍ ആദ്യമായി താലികെട്ടിയത് ഞാൻ'; താര സുന്ദരിയുമായുള്ള ഓർമ്മകൾ പങ്കിട്ട് മധുപാൽ

MARCH 27, 2024, 11:05 AM

നടനെന്ന നിലയിലറും ഒരു എഴുത്തുകാരനും സംവിധായകനുമെന്ന നിലയിലും പ്രിയങ്കരനാണ് മധുപാല്‍. ഇപ്പോഴിതാ ഇന്ത്യൻ സിനിമയുടെ മാദക സൗന്ദര്യമെന്ന് അറിയപ്പെടുന്ന കലാകാരി സില്‍ക്ക് സ്മിതയെ കുറിച്ച്‌ മധുപാല്‍ പറഞ്ഞ കാര്യങ്ങളാണ് വൈറലാകുന്നത്.

ഒരു അഭിമുഖത്തിൽ ആണ് സില്‍ക്ക് സ്മിതയ്ക്ക് ഒപ്പമുള്ള ഷൂട്ടിങ് അനുഭവം മധുപാല്‍ ഓർത്തെടുത്തത്. 'സില്‍ക്ക് സ്മിത എന്റെ കൂടെ കുറച്ചുനാള്‍ അഭിനയിച്ച സ്ത്രീയാണ്. അവർ എന്നോട് കുറേ കാര്യങ്ങള്‍ പറഞ്ഞു. അവരുടെ ജീവിതവുമായി ബന്ധപ്പെട്ടതായിരുന്നു. അവരുടെ ഏറ്റവും വലിയ ആഗ്രഹമായിരുന്നു സിനിമയിലെങ്കിലും ഒരു വധുവായിട്ട് വരണമെന്നുള്ളത്. അത് എന്റെ കൂടെയാണ് സാധിച്ചത്. ഞാനായിരുന്നു അവരുടെ കഴുത്തില്‍ താലികെട്ടിയത്. എന്റെ കൈ പിടിച്ച്‌ അവർ പറഞ്ഞിരുന്നു ജീവിതത്തില്‍ ഒരിക്കലും ഇങ്ങനൊരു സീനുണ്ടാകുമോയെന്ന് തോന്നിയിട്ടില്ല. പക്ഷെ സിനിമയിലെങ്കിലും ഇങ്ങനൊരു സീൻ വേണമെന്ന് ആഗ്രഹിച്ചിരുന്നുവെന്ന്. അത് ചെയ്തതിന് താങ്ക്‌സ് പറഞ്ഞുകൊണ്ടാണ് അവർ എന്നോട് സംസാരിച്ചത്' എന്നാണ് മധുപാൽ പറഞ്ഞത്.

പള്ളിവാതുക്കല്‍ തൊമ്മിച്ചനെന്ന സിനിമയില്‍ മധുപാലിന്റെ ഭാര്യ വേഷം ചെയ്തത് സില്‍ക്ക് സ്മിതയായിരുന്നു. അധികം വൈകാതെ താരം മരണപ്പെടുകയും ചെയ്തു.