കെ-പോപ്പിലൂടെ ഗ്ലാമർ അരങ്ങേറ്റം; അച്ഛന്റെയും അമ്മയുടെയും തനിപ്പകർപ്പായി ഷിലോ ജോളി, വീഡിയോ വൈറൽ!

APRIL 5, 2026, 4:04 AM

ഹോളിവുഡ് താരദമ്പതികളായിരുന്ന ഏഞ്ചലീന ജോളിയുടെയും ബ്രാഡ് പിറ്റിന്റെയും മകൾ ഷിലോ ജോളി (Shiloh Jolie) ഒരു സംഗീത വീഡിയോയിലൂടെ കലാരംഗത്ത് സജീവമാകുന്നു. പ്രശസ്ത കെ-പോപ്പ് (K-pop) താരം ദായങ്ങിന്റെ (DAYOUNG) 'വാട്ട്‌സ് എ ഗേൾ ടു ഡൂ' (What’s a Girl To Do) എന്ന മ്യൂസിക് വീഡിയോയിലാണ് പത്തൊൻപതുകാരിയായ ഷിലോ പ്രത്യക്ഷപ്പെടുന്നത്. വീഡിയോയുടെ ടീസർ പുറത്തിറങ്ങിയതോടെ സോഷ്യൽ മീഡിയയിൽ വലിയ ചർച്ചകൾക്കാണ് തുടക്കമിട്ടിരിക്കുന്നത്.

പുറത്തുവന്ന ടീസറിൽ തികച്ചും വ്യത്യസ്തമായ ലുക്കിലാണ് ഷിലോ എത്തുന്നത്. മനോഹരമായി പിന്നിയ മുടിയും ഗ്ലോസി മേക്കപ്പുമായി ഡാൻസ് ഫ്ലോറിലേക്ക് ഇറങ്ങാൻ തയ്യാറെടുക്കുന്ന ഷിലോയുടെ ദൃശ്യങ്ങൾ ആരാധകർ ഏറ്റെടുത്തു കഴിഞ്ഞു. നൃത്തത്തിന് ഏറെ പ്രാധാന്യമുള്ള ഈ വീഡിയോയിലൂടെ ഷിലോ തന്റെ പ്രകടനം പുറത്തെടുക്കുമെന്നാണ് സൂചന. ഏപ്രിൽ 7-നാണ് വീഡിയോ ഔദ്യോഗികമായി റിലീസ് ചെയ്യുന്നത്.

ടീസർ പുറത്തുവന്നതിന് പിന്നാലെ ഷിലോയുടെ മാതാപിതാക്കളുമായുള്ള സാദൃശ്യത്തെക്കുറിച്ചാണ് ഭൂരിഭാഗം പേരും സംസാരിക്കുന്നത്. "ബ്രാഡ് പിറ്റിന്റെയും ഏഞ്ചലീനയുടെയും ഡിഎൻഎ മാജിക് തന്നെ", "രണ്ടുപേരുടെയും പെർഫെക്റ്റ് കോമ്പിനേഷൻ" എന്നിങ്ങനെ പോകുന്നു ഇൻസ്റ്റാഗ്രാമിലെയും യൂട്യൂബിലെയും കമന്റുകൾ. മാധ്യമശ്രദ്ധയിൽ നിന്ന് വിട്ടുനിൽക്കുന്ന ഷിലോയെ പെട്ടെന്ന് ഇത്തരമൊരു ഗ്ലാമർ വേഷത്തിൽ കണ്ടതിന്റെ ആവേശത്തിലാണ് ആരാധകർ.

നേരത്തെയും ചില ക്രിയേറ്റീവ് പ്രോജക്റ്റുകളിൽ ഷിലോ സാന്നിധ്യമറിയിച്ചിട്ടുണ്ട്. ഫാഷൻ ഡിസൈനർ ഇസബെൽ മാരന്റിന്റെ ഒരു പരിപാടിയിൽ സംഗീതജ്ഞ ലുല്ലയുടെ പ്രകടനത്തിന് കൊറിയോഗ്രാഫി നിർവ്വഹിച്ചത് ഷിലോ ആയിരുന്നു. ആ പരിപാടിയുടെ രേഖകളിൽ 'ഷി ജോളി' (Shi Joli) എന്ന ചുരുക്കപ്പേരിലാണ് അവൾ അറിയപ്പെട്ടത്. തന്റെ സ്വകാര്യത കാത്തുസൂക്ഷിക്കാൻ താരം പലപ്പോഴും ഈ പേരാണ് ഉപയോഗിക്കാറുള്ളത്.

ഹോളിവുഡ് താരങ്ങളുടെ മക്കൾ അഭിനയത്തിലേക്കും മോഡലിംഗിലേക്കും ചുവടുവെക്കുന്നത് പതിവാണെങ്കിലും, ഒരു കെ-പോപ്പ് വീഡിയോയിലൂടെയുള്ള ഷിലോയുടെ അരങ്ങേറ്റം ഏറെ പുതുമയുള്ളതാണ്. ഈ വീഡിയോയിലൂടെ അവൾ ഒരു മികച്ച നർത്തകിയായി മാറുമോ എന്ന് കാത്തിരുന്നു തന്നെ കാണണം.