കൊച്ചുമകന്റെ വാശിക്ക് മുന്നില്‍ പൂരിയുണ്ടാക്കി തെലങ്കാന മുഖ്യമന്ത്രി; മനസ് കവര്‍ന്ന് രേവന്ത് റെഡ്ഡിയുടെ കുക്കിങ് വീഡിയോ

JULY 11, 2026, 4:45 AM

പൊതുയോഗങ്ങളിലെ ഗര്‍ജ്ജനങ്ങളും രാപ്പകലില്ലാത്ത ഔദ്യോഗിക തിരക്കുകളും മാറ്റിവെച്ച് അടുക്കളയില്‍ പാചകക്കാരന്റെ കുപ്പായമണിഞ്ഞിരിക്കുകയാണ് തെലങ്കാന മുഖ്യമന്ത്രി എ. രേവന്ത് റെഡ്ഡി. കൊച്ചുമകന്‍ റയാന്‍ഷിന്റെ കൊതി മാറ്റാന്‍ ലൈവായി പൂരി ചുട്ടെടുക്കുന്ന മുഖ്യമന്ത്രിയുടെ പുതിയ വീഡിയോ ഇപ്പോള്‍ സോഷ്യല്‍ മീഡിയയില്‍ വൈറലായിരിക്കുകയാണ്.

അടുക്കളയിലെ സ്ലാബിന് മുകളില്‍ കൊച്ചുമകനെ ഇരുത്തി, പൂരി ഓരോന്നായി പരത്തി തിളച്ച എണ്ണയിലിട്ട് മൊരിച്ചെടുക്കുന്ന രേവന്ത് റെഡ്ഡിയെയാണ് വീഡിയോയില്‍ കാണാന്‍ സാധിക്കുന്നത്. അപ്പൂപ്പന്‍ ഉണ്ടാക്കിത്തന്നാല്‍ മാത്രമേ പൂരി കഴിക്കൂ എന്ന കൊച്ചുമകന്റെ കുഞ്ഞുവാശിക്ക് മുന്നില്‍ മറ്റ് വഴികളൊന്നുമില്ലായിരുന്നുവെന്ന് അദ്ദേഹം ഇന്‍സ്റ്റഗ്രാമില്‍ കുറിച്ചു. പൂരിക്ക് കൃത്യമായ വട്ടമില്ലെങ്കിലും കുഞ്ഞു കൈകളില്‍ ഒരുപിടി മാവുമായി അടുക്കളയില്‍ ചിരി പടര്‍ത്തിയ ഈ നിമിഷങ്ങള്‍ തന്റെ തിരക്കുപിടിച്ച പൊതുജീവിതത്തിനിടയിലെ ഏറ്റവും വിലപ്പെട്ട ഓര്‍മ്മയാണെന്നും അദ്ദേഹം കൂട്ടിച്ചേര്‍ത്തു.

"తాత.. నువ్వు పూరీలు వేస్తేనే తింటా" అని మనవడు అడిగితే తప్పుతుందా? పక్కన మనవడు, చేతిలో పిడికెడు పిండి, దోసిట్లో నవ్వులు, గుండ్రంగా లేని డజన్ పూరీలు... బిజీ బిజీగా సాగుతున్న ప్రజా జీవితంలో.. మనవడితో కలిసి పూరీలు వేస్తూ గడిపిన ఈ కొన్ని క్షణాలు, మధుర జ్ఞాపకాలు..#Family pic.twitter.com/TXDbufWCdY
— Revanth Reddy (@revanth_anumula) July 9, 2026

വലിയൊരു ജനതയെ നയിക്കുന്ന ഭരണാധികാരിയെങ്കിലും കൊച്ചുമകന് മുന്നില്‍ വെറുമൊരു സാധാരണ അപ്പൂപ്പനായി മാറിയ മുഖ്യമന്ത്രിയുടെ ലളിതമായ ഈ കുടുംബ നിമിഷത്തെ നെഞ്ചിലേറ്റുകയാണ് നാടൊട്ടുക്കുമുള്ള സോഷ്യല്‍ മീഡിയ പ്രേക്ഷകര്‍.