"രണ്ടു വർഷമായി ഞാൻ വിവാഹിതനാണ്, വൈകാതെ അച്ഛനാകും"; ജോൺ ബോയേഗ

OCTOBER 14, 2026, 12:09 AM

സ്വകാര്യജീവിതം എന്നും ക്യാമറക്കണ്ണുകളിൽ നിന്ന് മറച്ചുവെച്ചിരുന്ന ഹോളിവുഡ് താരം ജോൺ ബോയേഗ, തന്റെ ജീവിതത്തിലെ ഏറ്റവും വലിയ സന്തോഷവാർത്തകൾ ആരാധകരുമായി പങ്കുവെച്ചിരിക്കുകയാണ്.ഹോളിവുഡ് താരം ജോൺ ബോയേഗ താൻ വിവാഹിതനായെന്ന വാർത്തയും, തനിക്കൊരു ആൺകുഞ്ഞ് പിറക്കാൻ പോകുന്നുവെന്ന സന്തോഷവും വെളിപ്പെടുത്തി.

'ദി ഗാർഡിയൻ' പത്രത്തിന് നൽകിയ പ്രത്യേക അഭിമുഖത്തിലാണ് 43-കാരനായ താരം തന്റെ വ്യക്തിജീവിതത്തിലെ വലിയ നേട്ടങ്ങൾ തുറന്നുപറഞ്ഞത്. ബാല്യകാല സുഹൃത്തിന്റെ വേർപാടിനെ ആസ്പദമാക്കി നിർമ്മിച്ച 'ഡാമിലോള: ദി അൺടോൾഡ് സ്റ്റോറി' എന്ന ഡോക്യുമെന്ററിയുടെ റിലീസിന് മുന്നോടിയായാണ് താരം സംസാരിച്ചത്.

തങ്ങൾ രഹസ്യമായി വിവാഹിതരായിട്ട് ഇപ്പോൾ ഏകദേശം രണ്ട് വർഷത്തോടടുക്കുന്നു എന്ന് ബോയേഗ വെളിപ്പെടുത്തി.തങ്ങൾ ഒരു ആൺകുഞ്ഞിനായുള്ള കാത്തിരിപ്പിലാണെന്നും താരം കൂട്ടിച്ചേർത്തു.

"കുടുംബജീവിതത്തിന്റെ കാര്യത്തിൽ എന്റെ ജീവിതം ഇപ്പോൾ തികച്ചും പൂർണ്ണമാണ്. ശരിയായ സമയത്താണ് ഇതെല്ലാം സംഭവിച്ചിരിക്കുന്നത്," ബോയേഗ പറഞ്ഞു. തന്റെ ഭാര്യ ആരാണെന്ന് ബോയേഗ ഔദ്യോഗികമായി വെളിപ്പെടുത്തിയിട്ടില്ലെങ്കിലും, നടി ലഷോന്റെ ഹെക്കാർഡുമായി അദ്ദേഹം പ്രണയത്തിലാണെന്ന ഊഹാപോഹങ്ങൾ ശക്തമാണ്. ഇൻസ്റ്റാഗ്രാമിൽ ഇരുവരും പരസ്പരം മാത്രമാണ് ഫോളോ ചെയ്യുന്നത് എന്നതും, ഹെക്കാർഡിന്റെ ബയോയിൽ "ടേ ബോയേഗ" എന്ന് മാറ്റി എഴുതിയിട്ടുള്ളതും ഇതിന് തെളിവായി ആരാധകർ ചൂണ്ടിക്കാണിക്കുന്നു.

തന്റെ വിവാഹമോതിരത്തെക്കുറിച്ചുള്ള കൗതുകകരമായ കഥയും ബോയേഗ അഭിമുഖത്തിൽ പങ്കുവെച്ചു. രണ്ടുതരം വിവാഹമോതിരങ്ങൾ തനിക്കൊപ്പമുണ്ട്. "പെട്ടെന്നുണ്ടായ തോന്നലിന്റെ പുറത്ത് വാൾമാർട്ടിൽ പോയി വാങ്ങിയതാണ് ഈ കാണുന്ന ടു-ടോൺ ബാൻഡ് മോതിരം. മോതിരം വിരലിൽ വേണമെന്ന് പെട്ടെന്ന് ആഗ്രഹം തോന്നിയപ്പോഴാണ് ഞങ്ങൾ വാൾമാർട്ടിലേക്ക് പോയത്," അദ്ദേഹം ചിരിയോടെ പറഞ്ഞു.

പരമ്പരാഗത ശൈലിയിലുള്ള വലിയ നൈജീരിയൻ വിവാഹാഘോഷങ്ങൾ ഇതുവരെ നടത്തിയിട്ടില്ലെന്നും, എന്നാൽ ഭാവിയിൽ അത് വലിയ രീതിയിൽ ആഘോഷിക്കാൻ തങ്ങൾക്ക് ആഗ്രഹമുണ്ടെന്നും അദ്ദേഹം പറഞ്ഞു. "ബന്ധം തുടങ്ങി തുടക്കത്തിൽ ആഘോഷിക്കുന്നതിനേക്കാൾ, ഉറച്ചൊരു ബന്ധത്തെ പിന്നീട് വലിയ രീതിയിൽ ആഘോഷിക്കുന്നതിനാണ് ഞങ്ങൾക്ക് താത്പര്യം. അത് നടത്തുമ്പോൾ ഞങ്ങൾ നൈജീരിയയെത്തന്നെ സ്തംഭിപ്പിക്കും!" താരം കൂട്ടിച്ചേർത്തു. പിതാവാകാൻ പോകുന്നതിന്റെ സന്തോഷം പങ്കുവെച്ച ബോയേഗ, ഒരു രക്ഷിതാവെന്ന നിലയിൽ കുഞ്ഞിന്റെ വളർച്ചയിൽ എപ്പോഴും ഒപ്പമുണ്ടാകുകയും സ്നേഹത്തോടെയും ഉത്തരവാദിത്തത്തോടെയും പെരുമാറുക എന്നതിനുമാണ് താൻ മുൻഗണന നൽകുന്നതെന്നും വ്യക്തമാക്കി.