'ഏകഭാര്യത്വം സൗകര്യപ്രദവും ബഹുഭാര്യത്വം രസകരവുമാണ്, എന്റെ ജീവിതത്തോട് പുരുഷന്മാർക്ക് അസൂയ'; കമൽഹാസൻ

JUNE 30, 2026, 11:00 PM

ഇതിഹാസ നടനും സംവിധായകനുമായ കമൽഹാസന്റെ സിനിമാജീവിതം പോലെത്തന്നെ അദ്ദേഹത്തിന്റെ വ്യക്തിജീവിതവും എപ്പോഴും മാധ്യമങ്ങളിലും ജനങ്ങൾക്കിടയിലും വലിയ രീതിയിൽ ചർച്ചചെയ്യപ്പെട്ടിട്ടുള്ള ഒന്നാണ്. എന്നാൽ തന്റെ കലാജീവിതത്തിന് പ്രാധാന്യം നൽകുന്നതിന് പകരം, ആളുകൾ തന്റെ വ്യക്തിപരമായ കാര്യങ്ങളിലും പ്രണയബന്ധങ്ങളിലും അമിതമായി ശ്രദ്ധ ചെലുത്തുന്നതിൽ തനിക്കുള്ള അതൃപ്തി താരം ഒരിക്കൽ പരസ്യമായി പ്രകടിപ്പിച്ചിരുന്നു. തനിക്ക് ചുറ്റുമുള്ളവർ ഇത്തരം ഗോസിപ്പ് ചർച്ചകളിൽനിന്ന് മാറിനടക്കേണ്ട സമയമായെന്നാണ് ഒരു അഭിമുഖത്തിൽ അദ്ദേഹം തുറന്നടിച്ചത്.

താൻ സിനിമയിൽ ചെയ്യുന്ന കാര്യങ്ങൾക്കാണ് ബഹുമാനം ലഭിക്കേണ്ടതെന്നും അല്ലാതെ സ്ക്രീനിന് പുറത്തുള്ള കാര്യങ്ങൾക്കല്ലെന്നും കമൽഹാസൻ വ്യക്തമാക്കി. "കമൽഹാസൻ വിവാഹങ്ങൾ കൊണ്ടല്ല പ്രശസ്തൻ, ജോലി നന്നായി ചെയ്യുന്നതുകൊണ്ടാണ്. ആർക്കും വിവാഹം കഴിക്കാം. എന്നാൽ കഥകൾ അവതരിപ്പിക്കുക, നിർമ്മാതാവാകുക, സിനിമ സംവിധാനം ചെയ്യുക, എഴുതുക എന്നിവയെല്ലാം വലിയ കാര്യങ്ങളാണ്," എന്ന് അദ്ദേഹം ഓർമ്മിപ്പിച്ചു.

നർത്തകിയായ വാണി ഗണപതി (1978–1988), നടി സരിക ഠാക്കൂർ (1988–2004) എന്നിവരുമായുള്ള അദ്ദേഹത്തിന്റെ വിവാഹബന്ധങ്ങൾ വേർപിരിയലിലാണ് കലാശിച്ചത്. പിന്നീട് നടി ഗൗതമിയുമായി ഒരു ദശകത്തിലേറെ ലിവിങ് റിലേഷനിലായിരുന്ന അദ്ദേഹം, കരിയറിന്റെ തുടക്കകാലത്ത് നടി ശ്രീവിദ്യയുമായും വലിയ അടുപ്പം പുലർത്തിയിരുന്നു.

തന്റെ ബന്ധങ്ങളെക്കുറിച്ച് ആളുകൾ എപ്പോഴും സംസാരിക്കുന്നതിന് പിന്നിലെ കാരണവും താരം രസകരമായി വിശദീകരിച്ചു. തന്റെ ജീവിതത്തോട് പുരുഷന്മാർക്ക് തോന്നുന്ന അസൂയ കൊണ്ടാണ് അവർ അങ്ങനെ സംസാരിക്കാൻ ശ്രമിക്കുന്നതെന്നും തന്റെ ജീവിതത്തിലുണ്ടായിരുന്ന സ്ത്രീകളെ താൻ ആത്മാർത്ഥമായി സ്നേഹിച്ചിരുന്നുവെന്നും അദ്ദേഹം പറഞ്ഞു.

ഏകഭാര്യത്വം സൗകര്യപ്രദവും ബഹുഭാര്യത്വം രസകരവുമാണെന്നും എന്നാൽ താൻ എപ്പോഴും സൗകര്യപ്രദമായ ജീവിതം നയിക്കാനാണ് ഇഷ്ടപ്പെടുന്നതെന്നും പറഞ്ഞ താരം, ജീവിതത്തിൽ കള്ളം പറയുന്നതിൽ വിശ്വസിക്കുന്നില്ലെന്നും വ്യക്തമാക്കി. താൻ വിവാഹ കാര്യങ്ങളിൽ ഒരു വിദഗ്ദ്ധനല്ലെന്നും അതുകൊണ്ട് ഇനി തന്നെക്കുറിച്ചുള്ള ചർച്ചകൾ ഒരു നടൻ എന്ന നിലയിൽ മാത്രമായിരിക്കണമെന്നും പറഞ്ഞാണ് കമൽഹാസൻ വാക്കുകൾ അവസാനിപ്പിച്ചത്.