റൊണാൾഡോയുടെ ജീവിതത്തിൽ ഏറെ പ്രാധാന്യമുള്ള ഒരു സ്ഥലമാണ് ഈ വിവാഹത്തിനായി അദ്ദേഹം തിരഞ്ഞെടുത്തതെന്ന പ്രത്യേകതയുമുണ്ട്. 2026-ലെ ഫിഫ ലോകകപ്പിന് ശേഷം വേനൽക്കാലത്തായിരിക്കും ഇരുവരും വിവാഹിതരാവുക എന്നാണ് പുറത്തുവരുന്ന സൂചനകൾ. മഡെയ്‌റയിലെ ചരിത്രപരമായ ഫഞ്ചൽ കത്തീഡ്രലിൽ (Funchal Cathedral) വെച്ചായിരിക്കും ചടങ്ങുകൾ നടക്കുക. 1514-ൽ സ്ഥാപിച്ച ഈ കത്തീഡ്രൽ ദ്വീപിലെ ഏറ്റവും പഴക്കം ചെന്ന ആരാധനാലയങ്ങളിൽ ഒന്നാണ്.റൊണാൾഡോ ജനിച്ച ആശുപത്രിയിൽ നിന്ന് ഏകദേശം രണ്ട് മൈൽ മാത്രം ദൂരമുണ്ട് ഈ കത്തീഡ്രലിലേക്ക്. മാത്രമല്ല, അദ്ദേഹം തന്റെ ഫുട്ബോൾ ജീവിതം ആരംഭിച്ച നാഷണൽ ഡാ മഡെയ്‌റ ക്ലബ്ബിന്റെ മൈതാനവും അടുത്താണ്. ഈ വൈകാരിക അടുപ്പം കൊണ്ടാണ് താരം ജന്മനാട്ടിലെ ഈ വേദി തിരഞ്ഞെടുത്തതെന്നാണ് റിപ്പോർട്ടുകൾ സൂചിപ്പിക്കുന്നത്. കത്തീഡ്രലിലെ ചടങ്ങുകൾക്ക് ശേഷം അടുത്തുള്ള ഒരു ആഡംബര ഹോട്ടലിൽ വിവാഹ സൽക്കാരം നടക്കുമെന്നും വിവരമുണ്ട്.ഏകദേശം ഒരു ദശാബ്ദത്തോളമായി ഒന്നിച്ചുള്ള ജീവിതമാണ് റൊണാൾഡോയും ജോർജീനയും നയിക്കുന്നത്. 2016-ൽ സ്‌പെയിനിലെ ഒരു ഗുച്ചി സ്റ്റോറിൽ വെച്ചാണ് ഇരുവരും കണ്ടുമുട്ടിയത്. ഈ വർഷം ഓഗസ്റ്റിൽ തങ്ങളുടെ വിവാഹനിശ്ചയം കഴിഞ്ഞ വിവരം ജോർജീന സ്ഥിരീകരിച്ചിരുന്നു. അഞ്ച് മക്കളോടൊപ്പമുള്ള ഈ താരദമ്പതികളുടെ വിവാഹത്തിനായി ലോകമെമ്പാടുമുള്ള ആരാധകർ ആകാംഷയോടെ കാത്തിരിക്കുകയാണ്.