കാനഡയിൽ മെനിഞ്ചോക്കോകൽ ഔട്ട്ബ്രേക്ക്; മരണനിരക്ക് 14 ശതമാനം, വാക്സിനേഷൻ ഊർജ്ജിതമാക്കാൻ നിർദ്ദേശം

APRIL 6, 2026, 4:31 AM

ഒട്ടാവ: കാനഡയിൽ അതിതീവ്ര ബാക്ടീരിയൽ അണുബാധയായ ഇൻവേസീവ് മെനിഞ്ചോക്കോകൽ ഡിസീസ് (IMD) പടരുന്നു. കഴിഞ്ഞ പത്ത് വർഷത്തിനിടയിലെ ഏറ്റവും ഉയർന്ന നിരക്കിലാണ് നിലവിൽ രോഗബാധ റിപ്പോർട്ട് ചെയ്യുന്നത്.

മസ്തിഷ്കത്തെയും സുഷുമ്നാ നാഡിയെയും പൊതിഞ്ഞിരിക്കുന്ന ചർമ്മത്തിലുണ്ടാകുന്ന വീക്കം (മെനിഞ്ചൈറ്റിസ്), രക്തത്തിലെ അണുബാധ (സെപ്സിസ്) തുടങ്ങിയ മാരകമായ അവസ്ഥകളിലേക്ക് ഈ രോഗം നയിക്കാം. ശിശുക്കളിലും യുവാക്കളിലുമാണ് മരണനിരക്ക് കൂടുതലായി കണ്ടുവരുന്നത്.

2021-ൽ രാജ്യത്താകെ 48 കേസുകൾ മാത്രമായിരുന്നത് 2024-ൽ 132-ഉം, 2025-ൽ 155-ഉം ആയി ഉയർന്നു. 2012-ന് ശേഷമുള്ള ഏറ്റവും വലിയ വർദ്ധനവാണിത്. ഈ വർഷം ഇതുവരെ 63 കേസുകൾ സ്ഥിരീകരിച്ചു കഴിഞ്ഞു.

മാനിറ്റോബ, ഒന്റാറിയോ, ക്യൂബെക്ക് തുടങ്ങിയ പ്രവിശ്യകളിലാണ് രോഗബാധ രൂക്ഷമായിരിക്കുന്നത്. കാനഡയിൽ ഈ രോഗം ബാധിക്കുന്നവരിൽ 14 ശതമാനത്തോളം പേർ മരണപ്പെടുന്നുണ്ടെന്നും അതിജീവിക്കുന്നവരിൽ 20 ശതമാനം പേർക്ക് കേൾവിശക്തി നഷ്ടപ്പെടുകയോ അംഗവൈകല്യം സംഭവിക്കുകയോ ചെയ്യുന്നുണ്ടെന്നും ആരോഗ്യ മന്ത്രാലയത്തിന്റെ കണക്കുകൾ വ്യക്തമാക്കുന്നു.

ലക്ഷണങ്ങൾ: കടുത്ത പനി, തലവേദന, ഛർദ്ദി, കഴുത്തിന് കാഠിന്യം.

വ്യാപനം: ഒരാൾ ചുമയ്ക്കുമ്പോഴോ തുമ്മുമ്പോഴോ പുറത്തുവരുന്ന കണങ്ങളിലൂടെയോ ഉമിനീരിലൂടെയോ രോഗം പടരാം.

പ്രതിരോധം: രോഗവ്യാപനം തടയാൻ വിവിധ പ്രവിശ്യകൾ വാക്സിനേഷൻ നയങ്ങളിൽ മാറ്റം വരുത്തിയിട്ടുണ്ട്. മെനിഞ്ചോക്കോകൽ എ, സി, ഡബ്ല്യു, വൈ എന്നീ ഉപവിഭാഗങ്ങൾക്കെതിരായ വാക്സിനുകൾ നിലവിൽ ലഭ്യമാണ്.

ജാഗ്രത: രോഗലക്ഷണങ്ങൾ കണ്ടാലുടൻ ചികിത്സ തേടണമെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു. പശ്ചിമ കാനഡയിൽ 'മെനിഞ്ചോക്കോകൽ ഡബ്ല്യു' എന്ന വകഭേദമാണ് പടരുന്നതെങ്കിൽ നോവ സ്കോട്ടിയ പോലുള്ള ഇടങ്ങളിൽ 'ബി' വകഭേദമാണ് ഭീഷണി ഉയർത്തുന്നത്.

മെനിഞ്ചോക്കോകൽ ബാക്ടീരിയ സാധാരണയായി പത്തിൽ ഒരാളുടെ ശരീരത്തിൽ ദോഷകരമല്ലാത്ത രീതിയിൽ കാണപ്പെടാറുണ്ടെങ്കിലും, ചിലരിൽ ഇത് രക്തത്തിലേക്കും തലച്ചോറിലേക്കും പടർന്ന് ജീവന് ഭീഷണിയാകുന്നു. പ്രവിശ്യാടിസ്ഥാനത്തിൽ പ്രതിരോധ കുത്തിവെപ്പുകൾ ഊർജ്ജിതമാക്കാനാണ് അധികൃതരുടെ തീരുമാനം.