മുംബൈ: ഐപിഎൽ ആവേശത്തിനിടെ രാജസ്ഥാൻ റോയൽസ് ക്യാപ്റ്റൻ റിയാൻ പരാഗ് വിവാദച്ചുഴിയിൽ. പഞ്ചാബ് കിങ്‌സിനെതിരായ മത്സരത്തിനിടെ ഡ്രസ്സിങ് റൂമിലിരുന്ന് ഇ-സിഗരറ്റ് (വേപ്പിംഗ്) ഉപയോഗിച്ച താരത്തിനെതിരെ ബിസിസിഐ ഔദ്യോഗികമായി അന്വേഷണം ആരംഭിച്ചു.

മത്സരത്തിന്റെ പതിനാറാം ഓവറിൽ തത്സമയ സംപ്രേക്ഷണത്തിനിടെയാണ് പരാഗ് ഇ-സിഗരറ്റ് ഉപയോഗിക്കുന്ന ദൃശ്യങ്ങൾ ക്യാമറയിൽ പതിഞ്ഞത്. ബിസിസിഐയുടെ അച്ചടക്ക നിയമങ്ങളുടെ ലംഘനത്തിന് പുറമെ, ഇന്ത്യയിൽ നിലവിലുള്ള ക്രിമിനൽ നിയമപ്രകാരവും താരം നടപടി നേരിടേണ്ടി വന്നേക്കാം.

2019-ൽ നടപ്പിലാക്കിയ 'പ്രൊഹിബിഷൻ ഓഫ് ഇലക്ട്രോണിക് സിഗരറ്റ്സ് ആക്ട്' (PECA) പ്രകാരം ഇന്ത്യയിൽ ഇ-സിഗരറ്റുകളുടെ ഉപയോഗവും വിതരണവും പൂർണ്ണമായും നിരോധിച്ചതാണ്. ഈ നിയമം ലംഘിക്കുന്നവർക്ക് ഒരു വർഷം വരെ തടവോ ഒരു ലക്ഷം രൂപ പിഴയോ ശിക്ഷ ലഭിക്കാൻ സാധ്യതയുണ്ട്.

സ്റ്റേഡിയം പരിസരത്തും ഡ്രസ്സിങ് റൂമിലും പുകവലി ബിസിസിഐ കർശനമായി നിരോധിച്ചിരിക്കെ, ഒരു ടീം നായകൻ തന്നെ ഇത്തരത്തിൽ പെരുമാറിയത് ഗൗരവകരമായാണ് അധികൃതർ കാണുന്നത്. ഒരു കായിക താരം ഇത്തരം പ്രവൃത്തികളിൽ ഏർപ്പെടുന്നത് യുവതലമുറയ്ക്ക് തെറ്റായ സന്ദേശം നൽകുമെന്ന വിമർശനവും ശക്തമാണ്.

നേരത്തെ ഡഗ്ഔട്ടിൽ മൊബൈൽ ഫോൺ ഉപയോഗിച്ചതിന് രാജസ്ഥാൻ ടീം മാനേജർക്ക് ബിസിസിഐ പിഴ ചുമത്തിയിരുന്നു. ഇതിന് പിന്നാലെ ക്യാപ്റ്റൻ തന്നെ വിവാദത്തിൽപ്പെട്ടത് ടീമിന് വലിയ തലവേദനയായിരിക്കുകയാണ്. ആരോഗ്യത്തിന് അതീവ അപകടകാരിയായ ഇ-സിഗരറ്റ് ഉപയോഗിച്ച വിഷയത്തിൽ ബിസിസിഐ ഉടൻ തന്നെ രാജസ്ഥാൻ റോയൽസിനോടും പരാഗിനോടും വിശദീകരണം തേടും. അന്വേഷണം പൂർത്തിയാകുന്നതുവരെ പരാഗിനെ നായകസ്ഥാനത്ത് നിന്ന് മാറ്റണമെന്ന ആവശ്യവും ആരാധകർക്കിടയിൽ നിന്ന് ഉയരുന്നുണ്ട്.

What’s happening in the ipl ?#PBKS#RR@IPL @BCCI
Riyan parag is using vape 😱😱😱😓 pic.twitter.com/xVXhb0LKZW

— Vansh Goyal (@vanshgoyal0674) April 28, 2026

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്