ലോക ടെസ്റ്റ് ചാമ്പ്യൻഷിപ്പ് പോയിന്റ് പട്ടികയിൽ വൻ കുതിപ്പുമായി ബംഗ്ലാദേശ്

AUGUST 17, 2026, 3:50 AM

ഓസ്‌ട്രേലിയക്കെതിരായ ഒന്നാം ടെസ്റ്റിലെ ചരിത്ര ജയത്തിന് പിന്നാലെ ലോക ടെസ്റ്റ് ചാമ്പ്യൻഷിപ്പ് പോയിന്റ് പട്ടികയിൽ വൻ കുതിപ്പുമായി ബംഗ്ലാദേശ്.

ഓസ്‌ട്രേലിയയിലെ ആദ്യ ടെസ്റ്റ് വിജയം ആഘോഷിച്ച ബംഗ്ലാദേശ്, പോയിന്റ് ശതമാനം കുത്തനെ ഉയർത്തിയാണ് നാലാം സ്ഥാനം സുരക്ഷിതമാക്കിയത്. ഡാർവിനിലെ മർറാര ക്രിക്കറ്റ് ഗ്രൗണ്ടിൽ നടന്ന മത്സരത്തിൽ 9 വിക്കറ്റിനായിരുന്നു ബംഗ്ലാദേശിന്റെ ജയം. ഒന്നാം ഇന്നിങ്‌സിൽ 228 റൺസിന്റെ കൂറ്റൻ ലീഡ് വഴങ്ങിയ ഓസ്‌ട്രേലിയയെ രണ്ടാം ഇന്നിങ്‌സിൽ 284 റൺസിന് പുറത്താക്കിയ ബംഗ്ലാദേശ് വിജയലക്ഷ്യമായ 57 റൺസ് വെറും ഒരു വിക്കറ്റ് മാത്രം നഷ്ടപ്പെടുത്തി ലക്ഷ്യത്തിലെത്തി.

ഡാർവിനിലെ ചരിത്ര വിജയത്തോടെ 40 പോയിന്റും 66.67പോയിന്റ് ശതമാനവുമായാണ് ബംഗ്ലാദേശ് നാലാം സ്ഥാനം സുരക്ഷിതമാക്കിയത്. ലോക ടെസ്റ്റ് ചാമ്പ്യൻഷിപ്പിന്റെ ഭാഗമായി കളിച്ച 5 ടെസ്റ്റിൽ 3 ജയവും ഒരു സമനിലയും ഒരു തോൽവിയുമാണ് ബംഗ്ലാദേശിനുള്ളത്. അതേസമയം, സ്വന്തം നാട്ടിൽ നാണംകെട്ട തോൽവി വഴങ്ങിയെങ്കിലും 84 പോയിന്റും 77.78 പോയിന്റ് ശതമാനവുമായി ഓസ്‌ട്രേലിയ തന്നെയാണ് ഇപ്പോഴും ഒന്നാം സ്ഥാനത്ത്.

എന്നാൽ ബംഗ്ലാദേശിനെതിരായ തോൽവിയോടെ ഓസ്‌ട്രേലിയയുടെ പോയിന്റ് ശതമാനം 87.50ൽ നിന്ന് 77.78 ആയി ഇടിഞ്ഞു. 2025-27 ലോക ടെസ്റ്റ് ചാമ്പ്യൻഷിപ്പിൽ കളിച്ച ഒമ്പത് ടെസ്റ്റുകളിൽ ഓസീസിന്റെ രണ്ടാമത്തെ മാത്രം തോൽവിയാണിത്. രണ്ടു തോൽവികളും സ്വന്തം നാട്ടിലായിരുന്നു.

ഇന്ത്യയുടെയും ശ്രീലങ്കയുടെയും സാധ്യതകൾ :

9 മത്സരങ്ങളിൽ നാലു തോൽവിയും നാലു ജയവും ഒരു സമനിലയും അടക്കം 52 പോയിന്റും 48.15 പോയിന്റ് ശതമാനവുമായി ഇന്ത്യ പോയിന്റ് പട്ടികയിൽ നിലവിൽ അഞ്ചാം സ്ഥാനത്താണ്. ഗാലെയിൽ ശ്രീലങ്കയ്‌ക്കെതിരെ നടക്കുന്ന ഒന്നാം ടെസ്റ്റ് ജയിച്ചാൽ ഇന്ത്യയുടെ പോയിന്റ് ശതമാനം 53.33 ആയി ഉയരുമെങ്കിലും അഞ്ചാം സ്ഥാനം മാറ്റമില്ലാതെ തുടരും. മറുവശത്ത്, ഇന്ത്യക്കെതിരായ ആദ്യ ടെസ്റ്റിൽ വിജയിച്ചാൽ ശ്രീലങ്കയ്ക്ക് ഇന്ത്യയെ പിന്തള്ളി അഞ്ചാം സ്ഥാനത്തേക്ക് (53.33 ) കുതിക്കാം. ഇതോടെ ഇന്ത്യ ആറാം സ്ഥാനത്തേക്ക് തള്ളപ്പെടും. ഇനി ഗാലെ ടെസ്റ്റ് സമനിലയിൽ അവസാനിച്ചാൽ ഇന്ത്യ അഞ്ചാം സ്ഥാനത്തും ശ്രീലങ്ക ആറാം സ്ഥാനത്തും തുടരും.