ആഴ്‌സണലിന് തിരിച്ചടിയായി മിക്കൽ മെറിനോയുടെ പരിക്ക്, ആറാഴ്ചയോളം പുറത്തിരിക്കേണ്ടിവന്നേക്കും

FEBRUARY 2, 2026, 7:21 AM

ലീഡ്‌സ് യുണൈറ്റഡിനെതിരായ ആഴ്‌സണലിന്റെ ഉജ്ജ്വല വിജയത്തിന് പിന്നാലെ ടീമിന് തിരിച്ചടിയായി മധ്യനിര താരം മിക്കൽ മെറിനോയുടെ പരിക്ക്. മെറിനോയുടെ പാദത്തിലെ എല്ലിന് ഒടിവുണ്ടായതായി സംശയിക്കുന്നതായി പരിശീലകൻ മിക്കൽ ആർട്ടെറ്റ സ്ഥിരീകരിച്ചു.

29കാരനായ സ്പാനിഷ് താരം ഈ സീസണിൽ ആഴ്‌സണലിനായി 33 മത്സരങ്ങളിൽ കളിച്ചിട്ടുണ്ട്.
പരിക്കിന്റെ തീവ്രതയും താരം എത്രനാൾ പുറത്തിരിക്കേണ്ടി വരുമെന്നും കൃത്യമായി അറിയാൻ വിദഗ്ധ പരിശോധനകൾ ആവശ്യമാണെങ്കിലും, ഏകദേശം 6 ആഴ്ചകളോളം മെറിനോയ്ക്ക് വിശ്രമം വേണ്ടി വരുമെന്നാണ് റിപ്പോർട്ടുകൾ സൂചിപ്പിക്കുന്നത്.

ലീഡ്‌സിനെതിരായ മത്സരത്തിന് തൊട്ടുമുൻപുള്ള പരിശീലനത്തിനിടെ പരിക്കേറ്റ ബുക്കായോ സാക്കയെയും ആഴ്‌സണലിന് ഈ മത്സരത്തിൽ നഷ്ടമായിരുന്നു. ടീമിലെ പ്രധാന താരങ്ങൾ പരിക്കിന്റെ പിടിയിലായതോടെ മധ്യനിരയിൽ താൽക്കാലികമായി മറ്റു താരങ്ങളെ ഉൾപ്പെടുത്താനുള്ള നീക്കത്തിലാണ് ആർട്ടെറ്റ. സീസൺ നിർണ്ണായക ഘട്ടത്തിലേക്ക് കടക്കുമ്പോൾ മെറിനോയെപ്പോലെയുള്ള ഒരു താരത്തിന്റെ അഭാവം ആഴ്‌സണലിന് വലിയ വെല്ലുവിളിയാണ്.