യേ ലൈവ്: കാനി വെസ്റ്റ് ആദ്യമായി ഇന്ത്യയിൽ, ഷോ മാർച്ച് 29-ന്

FEBRUARY 17, 2026, 10:06 PM

ആഗോള സംഗീത ഇതിഹാസം കാനി വെസ്റ്റ് ആദ്യമായി ഇന്ത്യയിൽ എത്തുന്നു. പിങ്ക് വില്ല റിപ്പോർട്ട് ചെയ്തതനുസരിച്ച്, ഡൽഹിയിലെ ജവഹർലാൽ നെഹ്‌റു സ്റ്റേഡിയത്തിൽ മാർച്ച് 29-ന് നടക്കുന്ന യേ ലൈവ് (Ye Live) എന്ന സ്റ്റേഡിയം ഷോയിലാണ് താരം അണിനിരക്കുന്നത്.

വർഷങ്ങളായി ആരാധകർ കാത്തിരുന്ന ഈ പ്രഖ്യാപനം ഫെബ്രുവരി 16-നാണ് ഔദ്യോഗികമായി പുറത്തുവന്നത്. ജവഹർലാൽ നെഹ്‌റു സ്റ്റേഡിയത്തിൽ നടക്കുന്ന പ്രകടനത്തിനായി വിപുലമായ ക്രമീകരണങ്ങളാണ് സംഘാടകർ ഒരുക്കുന്നത്. വലിയ തോതിലുള്ള സ്റ്റേജിങ്, സിനിമാറ്റിക് ദൃശ്യങ്ങൾ, മികച്ച ശബ്ദവിന്യാസം എന്നിവ ഷോയുടെ പ്രത്യേകതകളായിരിക്കും.

അമേരിക്കൻ സംഗീതരംഗത്തെ ഏറ്റവും സ്വാധീനമുള്ള കലാകാരന്മാരിൽ ഒരാളായ കാനി വെസ്റ്റ്, ഇതാദ്യമായാണ് ഇന്ത്യയിൽ ഒരു തത്സമയ കച്ചേരി നടത്തുന്നത്. കഴിഞ്ഞ കുറച്ചു വർഷങ്ങളായി താരം വളരെ അപൂർവ്വമായേ ലൈവ് ഷോകളിൽ പങ്കെടുത്തിട്ടുള്ളൂ എന്നതും ഈ ഷോയുടെ പ്രാധാന്യം വർദ്ധിപ്പിക്കുന്നു. ടിക്കറ്റുകൾ ബുക്ക് ചെയ്യുന്നതിന് സോമറ്റോയുടെ District ആപ്പ് ഉപയോഗിക്കാവുന്നതാണ്.