''കർമ്മം മധുരം"; ജസ്റ്റിൻ ട്രൂഡോയ്ക്കൊപ്പമുള്ള ചിത്രം പങ്കുവെച്ച് കാറ്റി പെറി

APRIL 7, 2026, 9:39 PM

പോപ്പ് താരം കാറ്റി പെറിയും കാനഡ മുൻ പ്രധാനമന്ത്രി ജസ്റ്റിൻ ട്രൂഡോയും തമ്മിലുള്ള പ്രണയം സോഷ്യൽ മീഡിയയിൽ തരംഗമാകുന്നു. ട്രൂഡോയ്ക്കൊപ്പമുള്ള മനോഹരമായ ഒരു ചിത്രം പങ്കുവെച്ചുകൊണ്ട് കാറ്റി പെറി തന്നെയാണ് ഈ ബന്ധം പരസ്യമാക്കിയത്. തന്റെ പ്രശസ്തമായ 'ലെജൻഡറി ലവേഴ്‌സ്' (Legendary Lovers) എന്ന ഗാനത്തിലെ വരികൾക്കൊപ്പമാണ് താരം ചിത്രം പോസ്റ്റ് ചെയ്തത്.

കറുത്ത വസ്ത്രമണിഞ്ഞ് നിൽക്കുന്ന തങ്ങളുടെ ചിത്രം പങ്കുവെച്ചുകൊണ്ട് "കർമ്മം ഇത്രയും പ്രതിഫലം നൽകുമെന്ന് ഞാൻ കരുതിയില്ല" എന്നാണ് കാറ്റി പെറി കുറിച്ചത്. തന്റെ ക്യാമറ റീലിൽ നിന്നുള്ള മറ്റ് ചില ചിത്രങ്ങളും മകൾ ഡെയ്‌സി ഡവ് ബ്ലൂമിനൊപ്പമുള്ള നിമിഷങ്ങളും താരം ഇതോടൊപ്പം പങ്കുവെച്ചിട്ടുണ്ട്.

കഴിഞ്ഞ വർഷം മുതൽ ഇരുവരും പ്രണയത്തിലാണെന്ന അഭ്യൂഹങ്ങൾ ഉണ്ടായിരുന്നെങ്കിലും ഇപ്പോൾ പുറത്തുവന്ന ചിത്രം ആരാധകർക്ക് വലിയ ആവേശമാണ് നൽകിയിരിക്കുന്നത്. 2025 ജൂലൈയിൽ കാറ്റി പെറിയുടെ മോൺട്രിയൽ സംഗീത പരിപാടിക്കിടെയാണ് ഇരുവരും ആദ്യമായി ഒന്നിച്ച് കാണപ്പെട്ടത്.

പിന്നീട് ഒക്ടോബറിൽ പാരീസിൽ വെച്ച് നടന്ന കാറ്റിയുടെ ജന്മദിനാഘോഷത്തിലും ഇവർ ഒന്നിച്ച് പങ്കെടുത്തു. 2025 ഡിസംബറിൽ ജപ്പാനിൽ നിന്നുള്ള ചിത്രങ്ങൾ പങ്കുവെച്ചുകൊണ്ട് ഇവർ തങ്ങളുടെ ബന്ധം ഔദ്യോഗികമായി സ്ഥിരീകരിച്ചിരുന്നു. ഇപ്പോൾ ജസ്റ്റിൻ ട്രൂഡോ കാറ്റിയുടെ ഇൻസ്റ്റാഗ്രാം ഫീഡിലെ സ്ഥിരം സാന്നിധ്യമായി മാറിയിരിക്കുകയാണ്.

ഹോളിവുഡ് താരം ഒർലാൻഡോ ബ്ലൂമുമായി 10 വർഷത്തെ ബന്ധത്തിന് ശേഷം 2025 ജൂലൈയിലാണ് കാറ്റി പെറി വേർപിരിഞ്ഞത്. ഇവർക്ക് അഞ്ചു വയസ്സുള്ള ഒരു മകളുണ്ട്. അതേസമയം, 18 വർഷത്തെ വിവാഹജീവിതത്തിന് ശേഷം 2023-ലാണ് ജസ്റ്റിൻ ട്രൂഡോ സോഫി ഗ്രെഗോയറുമായി വേർപിരിഞ്ഞത്. രണ്ട് കുട്ടികളുടെ പിതാവാണ് അദ്ദേഹം.