2026-ലെ ഓസ്‌കാർ പുരസ്കാര നിശയ്ക്ക് മുന്നോടിയായി നാമനിർദ്ദേശം ചെയ്യപ്പെട്ട താരങ്ങൾക്കായി സംഘടിപ്പിച്ച വിരുന്ന് (Oscars Luncheon) ഹോളിവുഡിൽ ശ്രദ്ധേയമാകുന്നു. ചൊവ്വാഴ്ച ബെവർലി ഹിൽസിലെ ബെവർലി ഹിൽട്ടണിൽ നടന്ന പരിപാടിയിൽ 24 വിഭാഗങ്ങളിൽ നിന്നായി 230-ഓളം താരങ്ങൾ പങ്കെടുത്തു. എല്ലാ വർഷവും പ്രധാന പുരസ്കാര ചടങ്ങിന് മുൻപായി താരങ്ങൾക്ക് പരസ്പരം കാണാനും ഒന്നിച്ച് ഗ്രൂപ്പ് ഫോട്ടോകൾ എടുക്കാനുമായി സംഘടിപ്പിക്കുന്ന ഒരു പാരമ്പര്യ ചടങ്ങാണ്  ഈ വിരുന്ന്.

ചടങ്ങിൽ എമ്മ സ്റ്റോണും തിമോത്തി ചാലമേറ്റും ഒരേ ടേബിളിലിരുന്ന് സൗഹൃദം പങ്കിടുന്നതിന്റെ വീഡിയോകൾ സോഷ്യൽ മീഡിയയിൽ വൈറലായിട്ടുണ്ട്. 'പുവർ തിങ്‌സ്' താരം എമ്മ സ്റ്റോൺ ഒരു ടക്‌സീഡോ സ്റ്റൈൽ വസ്ത്രമണിഞ്ഞപ്പോൾ, നീല നിറത്തിലുള്ള ഫോർമൽ സ്യൂട്ടിലാണ് തിമോത്തി എത്തിയത്. ഇരുവരും മറ്റ് അതിഥികളോട് സംസാരിക്കുന്നതും ചിരിച്ചുകൊണ്ട് ക്യാമറയ്ക്ക് പോസ് ചെയ്യുന്നതും ആരാധകരുടെ ശ്രദ്ധ പിടിച്ചുപറ്റി.

ഈ വർഷത്തെ നാമനിർദ്ദേശങ്ങളിലൂടെ എമ്മയും തിമോത്തിയും ചരിത്രം കുറിച്ചിട്ടുണ്ട്. ഒരേ ചിത്രം തന്നെ മികച്ച ചിത്രമായും (Best Picture), അതിലെ അഭിനയത്തിന് പുരസ്കാരത്തിന് അർഹയാകുകയും ചെയ്യുന്ന നേട്ടം രണ്ടുതവണ സ്വന്തമാക്കുന്ന ഏറ്റവും പ്രായം കുറഞ്ഞ വ്യക്തിയായി 37-കാരിയായ എമ്മ സ്റ്റോൺ മാറി. 'ബുഗോണിയ' (Bugonia), 'പുവർ തിങ്‌സ്' എന്നീ ചിത്രങ്ങളിലൂടെയാണ് താരം ഈ അപൂർവ്വ നേട്ടം സ്വന്തമാക്കിയത്. അതേസമയം, 30-കാരനായ തിമോത്തി ചാലമേറ്റ് ഒരേ വർഷം തന്നെ മികച്ച നടനും മികച്ച ചിത്രത്തിനുമുള്ള (ചിത്രം: മാർട്ടി സുപ്രീം) നാമനിർദ്ദേശം ലഭിക്കുന്ന ഏറ്റവും പ്രായം കുറഞ്ഞ വ്യക്തിയെന്ന റെക്കോർഡും സ്വന്തമാക്കി.

ലിയോനാർഡോ ഡികാപ്രിയോ, മൈക്കൽ ബി. ജോർദാൻ, എൽ ഫാനിംഗ്, ജേക്കബ് എലോർഡി, കേറ്റ് ഹഡ്‌സൺ, യോർഗോസ് ലാന്തിമോസ് തുടങ്ങി ഹോളിവുഡിലെ വമ്പൻ നിര തന്നെ ഈ വിരുന്നിൽ അണിനിരന്നു. കഴിഞ്ഞ വർഷം തെക്കൻ കാലിഫോർണിയയിലുണ്ടായ കാട്ടുതീയെത്തുടർന്ന് ഈ ചടങ്ങ് റദ്ദാക്കിയിരുന്നു. അതിനാൽ വലിയൊരു ഇടവേളയ്ക്ക് ശേഷമുള്ള ഈ ഒത്തുചേരൽ താരങ്ങൾക്കും ആവേശമായി.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്