2027-ൽ ഇന്ത്യയിലേക്ക് ഫോർമുല വൺ തിരിച്ചെത്തുന്നു

APRIL 13, 2026, 4:24 AM

2027-ൽ ഇന്ത്യയിൽ ഫോർമുല വൺ റേസ് സംഘടിപ്പിക്കാൻ കേന്ദ്ര സർക്കാർ ഊർജിതമായ നീക്കങ്ങൾ നടത്തുന്നതായി കായിക മന്ത്രി മൻസുഖ് മാണ്ഡവ്യ അറിയിച്ചു. ഗ്രേറ്റർ നോയിഡയിലെ ബുദ്ധ് ഇന്റർനാഷണൽ സർക്യൂട്ട് പ്രവർത്തനസജ്ജമാക്കാൻ മൂന്ന് പ്രമുഖ കമ്പനികൾ താല്പര്യം പ്രകടിപ്പിച്ചിട്ടുണ്ടെന്നും അദ്ദേഹം മാധ്യമങ്ങളോട് വ്യക്തമാക്കി. 2013-ന് ശേഷം നിന്നുപോയ ഈ ലോകോത്തര കായിക മാമാങ്കത്തെ ഇന്ത്യയിലേക്ക് തിരികെ കൊണ്ടുവരികയാണ് സർക്കാരിന്റെ ലക്ഷ്യം.

നികുതി സംബന്ധമായ പ്രശ്നങ്ങളും ഉദ്യോഗസ്ഥ തലത്തിലുള്ള തടസ്സങ്ങളും കാരണമാണ് 2013-ലെ മൂന്നാം പതിപ്പിന് ശേഷം ഇന്ത്യൻ ഗ്രാൻഡ് പ്രി ഉപേക്ഷിക്കേണ്ടി വന്നത്. എന്നാൽ പുതിയ സാഹചര്യത്തിൽ അദാനി ഗ്രൂപ്പ് ഉൾപ്പെടെയുള്ള വമ്പൻമാർ റേസിംഗ് ട്രാക്ക് ഏറ്റെടുക്കാൻ മുന്നോട്ടുവന്നിട്ടുണ്ട്.

കടക്കെണിയിലായ ജെപി ഗ്രൂപ്പിന്റെ ആസ്തികൾ ഏറ്റെടുക്കുന്നതിന്റെ ഭാഗമായി ഈ സർക്യൂട്ടും അദാനി ഗ്രൂപ്പിന്റെ കൈകളിലെത്തും. ഇന്ത്യയിൽ ഹൈ-പ്രൊഫൈൽ റേസുകൾ പുനരുജ്ജീവിപ്പിക്കാനുള്ള താല്പര്യം കമ്പനി പ്രകടിപ്പിച്ചിട്ടുണ്ട്.

കായിക മന്ത്രാലയം ഇതിനോടകം തന്നെ ഫെഡറേഷൻ ഓഫ് മോട്ടോർ സ്പോർട്സ് ക്ലബ്ബ്സ് ഓഫ് ഇന്ത്യയുമായി ചർച്ചകൾ പൂർത്തിയാക്കി. ഇന്ത്യയുടെ സാങ്കേതിക മുന്നേറ്റം കണക്കിലെടുക്കുമ്പോൾ ഫോർമുല വൺ, മോട്ടോ ജിപി തുടങ്ങിയ മികച്ച കായിക മത്സരങ്ങൾ രാജ്യത്തിന് അർഹതപ്പെട്ടതാണെന്ന് മന്ത്രി വ്യക്തമാക്കി. നിലവിൽ ലിബർട്ടി മീഡിയയുടെ ഉടമസ്ഥതയിലുള്ള ഫോർമുല വണ്ണിന് ആഗോളതലത്തിൽ വലിയ സ്വീകാര്യതയാണ് ലഭിച്ചുകൊണ്ടിരിക്കുന്നത്.

ഫോർമുല വൺ സംഘടിപ്പിക്കുന്നതിലെ വെല്ലുവിളികളും ഇന്ത്യയുടെ സംഘാടന ശേഷിയും കായിക മന്ത്രാലയം വിലയിരുത്തിയിട്ടുണ്ട്. നിലവിൽ വർഷത്തിൽ 24 റേസുകൾ എന്ന റെക്കോർഡ് കലണ്ടറാണ് എഫ് വണ്ണിനുള്ളത്.

പശ്ചിമേഷ്യൻ സംഘർഷം കാരണം സൗദി അറേബ്യ, ബഹ്‌റൈൻ റേസുകൾ റദ്ദാക്കിയ സാഹചര്യത്തിൽ പുതിയ വേദികൾക്കായുള്ള അന്വേഷണത്തിലാണ് അധികൃതർ. ഈ സാഹചര്യത്തിൽ 2027-ൽ ഇന്ത്യ വീണ്ടും ട്രാക്കിലിറങ്ങുന്നത് കായിക പ്രേമികൾക്ക് വലിയ ആവേശമാകും നൽകുക.