മെലാനിയയുടെ 'ജാക്കറ്റ്' വിവാദം വീണ്ടും ഉയർത്തി മെറിൽ സ്ട്രീപ്പ്; ഫാഷൻ വെറും സൗന്ദര്യമല്ലെന്ന് താരം

APRIL 8, 2026, 10:41 PM

യുഎസ് പ്രഥമ വനിത മെലാനിയ ട്രംപിന്റെ ഫാഷൻ തിരഞ്ഞെടുപ്പുകളെക്കുറിച്ച് കൗതുകകരമായ നിരീക്ഷണവുമായി വോഗ് മാഗസിൻ ഗ്ലോബൽ എഡിറ്റോറിയൽ ഡയറക്ടർ അന്ന വിന്റർ.

മെലാനിയ എപ്പോഴും "അവരവരായി തന്നെ ഇരിക്കാൻ" ശ്രമിക്കാറുണ്ടെന്നാണ് വിന്ററിന്റെ പരാമർശം. 'ദി ഡെവിൾ വിയേഴ്‌സ് പ്രാഡ 2' എന്ന ചിത്രത്തിന്റെ പ്രചരണാർത്ഥം നടി മെറിൽ സ്ട്രീപ്പിനൊപ്പം വോഗ് മാഗസിനിൽ നൽകിയ അഭിമുഖത്തിലാണ് അവർ ഇക്കാര്യം പറഞ്ഞത്. മിഷേൽ ഒബാമയെപ്പോലുള്ളവർ തങ്ങളുടെ വസ്ത്രധാരണത്തിലൂടെ വ്യക്തിത്വം പ്രകടിപ്പിക്കുന്നതുപോലെ, മെലാനിയയും സ്വന്തം ശൈലി പിന്തുടരുന്നതായി അവർ കൂട്ടിച്ചേർത്തു.

എന്നാൽ, മെലാനിയയുടെ ഫാഷൻ നിലപാടുകളെ ഹോളിവുഡ് താരം മെറിൽ സ്ട്രീപ്പ് രൂക്ഷമായി വിമർശിച്ചു. 2018-ൽ തടങ്കലിലായ കുടിയേറ്റ കുട്ടികളെ സന്ദർശിക്കാൻ പോയപ്പോൾ മെലാനിയ ധരിച്ച I Really Don’t Care, Do U? എന്നെഴുതിയ ജാക്കറ്റിനെക്കുറിച്ചാണ് സ്ട്രീപ്പ് പരാമർശിച്ചത്. വസ്ത്രധാരണം എന്നത് കേവലം ഭംഗിയല്ലെന്നും അത് വലിയ ചരിത്രപരവും രാഷ്ട്രീയവുമായ സന്ദേശങ്ങൾ നൽകുന്നതാണെന്നും സ്ട്രീപ്പ് ഓർമ്മിപ്പിച്ചു. ആ ജാക്കറ്റ് അന്ന് വലിയ വിവാദങ്ങൾക്ക് വഴിമാറിയിരുന്നു.

റിപ്പബ്ലിക്കൻ പ്രഥമ വനിതകളെ വോഗ് മാഗസിൻ അവഗണിക്കുന്നുവെന്ന ആരോപണങ്ങൾക്കിടയിലാണ് പുതിയ ചർച്ചകൾ വരുന്നത്. നേരത്തെ മിഷേൽ ഒബാമയെ പലതവണ കവർ പേജിൽ ഉൾപ്പെടുത്തിയ വോഗ്, മെലാനിയ ട്രംപിനെ പ്രഥമ വനിതയായിരുന്ന കാലത്ത് ഒരിക്കൽ പോലും ഫീച്ചർ ചെയ്തിരുന്നില്ല.

മാഗസിൻ പിന്തുണയ്ക്കുന്ന മൂല്യങ്ങളോട് യോജിക്കുന്നവരെ മാത്രമേ കവർ പേജിൽ ഉൾപ്പെടുത്തുകയുള്ളൂ എന്നതായിരുന്നു വിന്ററിന്റെ മുൻ നിലപാട്. എന്നാൽ, തനിക്ക് വോഗിന്റെ കവർ പേജിൽ വരുന്നത് അത്ര വലിയ കാര്യമല്ലെന്നും ഇത്തരം മാധ്യമങ്ങൾ പക്ഷപാതപരമാണെന്നുമാണ് മെലാനിയയുടെ വക്താക്കൾ ഇതിനോട് പ്രതികരിച്ചത്.