‘രാക്ക’ ചിത്രത്തിന് അല്ലു അര്‍ജുന് 175 കോടി?; പ്രതിഫലം കേട്ട് ഞെട്ടി ആരാധകർ

APRIL 11, 2026, 12:53 AM

ആരാധകര്‍ ഏറെ കാത്തിരുന്ന ‘രാക്ക’ എന്ന ചിത്രത്തിന്റെ ഒഫീഷ്യല്‍ പോസ്റ്റര്‍ അടുത്തിടെ പുറത്തുവന്നിരുന്നു. മൊട്ടത്തല, ശരീരമൊട്ടാകെ രോമം, കൂര്‍ത്ത നഖങ്ങള്‍, ഭീകരമായ മുഖഭാവം എന്നിവയോടെ അല്ലു അര്‍ജുന് എത്തുന്ന പോസ്റ്റര്‍ സോഷ്യല്‍ മീഡിയയില്‍ വലിയ ചര്‍ച്ചയ്ക്ക് വഴിവെച്ചിട്ടുണ്ട്.

ഇപ്പോള്‍ ചിത്രവുമായി ബന്ധപ്പെട്ട് പ്രധാന ചര്‍ച്ചയാകുന്നത് പ്രതിഫലമാണ്. റിപ്പോര്‍ട്ടുകള്‍ പ്രകാരം, ഈ സിനിമയ്ക്കായി അല്ലു അര്‍ജുന് ഏകദേശം 175 കോടി രൂപയാണ് വാങ്ങുന്നത്. ഇതോടെ അദ്ദേഹത്തിന്റെ കരിയറിലെ ഏറ്റവും വലിയ പ്രതിഫലവും വലിയ ബജറ്റുമുള്ള ചിത്രമായി ഇത് മാറും.

നായികയായ ദീപിക പദുകോണിന് ഏകദേശം 25 കോടി രൂപ ലഭിക്കുന്നുവെന്നാണ് റിപ്പോര്‍ട്ട്. ഇതോടെ അല്ലു അര്‍ജുനിന്റെ പ്രതിഫലം ദീപികയുടേതിനേക്കാള്‍ പലമടങ്ങ് കൂടുതലാണെന്ന ചര്‍ച്ചകളും ശക്തമാകുന്നു. കൂടാതെ രശ്മിക മന്ദാനയും ചിത്രത്തില്‍ പ്രധാന വേഷത്തില്‍ എത്തുന്നുണ്ട്. അവര്‍ക്ക് ഏകദേശം 5 മുതല്‍ 7 കോടി രൂപവരെ പ്രതിഫലം ലഭിക്കുമെന്നാണ് വിവരം.

സണ്‍ പിക്ചേഴ്സ് നിര്‍മ്മിക്കുന്ന ഈ ചിത്രം വമ്പന്‍ ബജറ്റില്‍ ഒരുങ്ങുന്ന വലിയ പ്രോജക്ടായി കണക്കാക്കപ്പെടുന്നു. കഥാപറച്ചിലും സാങ്കേതികവിദ്യയിലും പുതുമകള്‍ ഉള്‍പ്പെടുത്താന്‍ ശ്രമിക്കുന്ന സിനിമയായിരിക്കും ഇത്.

സംവിധായകന്‍ അറ്റ്‌ലീ ഒരുക്കുന്ന ഈ ചിത്രം ഇന്ത്യന്‍ സിനിമയിലെ ശ്രദ്ധേയമായ കൂട്ടുകെട്ടുകളിലൊന്നാണ്. മുന്‍പ് രാജാ റാണി, തെരി, മെര്‍സല്‍, ബിഗില്‍, ജവാന്‍ തുടങ്ങിയ ഹിറ്റ് ചിത്രങ്ങള്‍ സംവിധാനം ചെയ്ത അനുഭവം അറ്റ്‌ലിക്കുണ്ട്.