രൺവീർ സിംഗ് എന്റെ 'ലക്കി ചാം'; കരിയറിലെ വഴിത്തിരിവിനെക്കുറിച്ച് മൃണാൾ താക്കൂർ

APRIL 7, 2026, 9:13 PM

ബോളിവുഡ് താരം രൺവീർ സിംഗിന്റെ കടുത്ത ആരാധകിയാണെന്ന് തുറന്നുപറഞ്ഞ് നടി മൃണാൾ താക്കൂർ. രൺവീർ അല്ലാബാദിയയുടെ പോഡ്‌കാസ്റ്റിൽ സംസാരിക്കവെയാണ് തന്റെ കരിയറിൽ രൺവീർ വഹിച്ച പങ്കിനെക്കുറിച്ചും അദ്ദേഹത്തിന്റെ പുതിയ ചിത്രമായ 'ധുരന്ധർ 2' നേടിയ ചരിത്രവിജയത്തെക്കുറിച്ചും മൃണാൾ വാചാലയായത്.

താൻ ഇന്ന് സിനിമ ഇൻഡസ്ട്രിയിൽ നിൽക്കാൻ കാരണം രൺവീർ സിംഗ് ആണെന്ന് മൃണാൾ പറയുന്നു. "എന്റെ കരിയറിലെ ലക്കി ചാം ആണ് അദ്ദേഹം. തുടക്കകാലത്ത് ഒരു ഹെയർ ബ്രാൻഡിന്റെ പരസ്യത്തിൽ ഞാൻ രൺവീറിനൊപ്പം മോഡലായി അഭിനയിച്ചിരുന്നു. ആ പരസ്യം ശ്രദ്ധിക്കപ്പെട്ടതോടെയാണ് ചലച്ചിത്ര പ്രവർത്തകർ എന്നെ തിരിച്ചറിഞ്ഞു തുടങ്ങിയത്. ആ ക്രെഡിറ്റ് മുഴുവൻ അദ്ദേഹത്തിനുള്ളതാണ്," മൃണാൾ പറഞ്ഞു. അദ്ദേഹത്തിന്റെ പോസിറ്റീവ് എനർജിയും കഠിനാധ്വാനവും തനിക്ക് എപ്പോഴും പ്രചോദനമാണെന്നും താരം കൂട്ടിച്ചേർത്തു.

ബോളിവുഡിൽ ആദ്യമായി 1000 കോടി രൂപ ആഗോള കളക്ഷൻ നേടുന്ന ചിത്രം എന്ന റെക്കോർഡ് 'ധുരന്ധർ 2' സ്വന്തമാക്കിയിരിക്കുകയാണ്. ചിത്രത്തിലെ രൺവീറിന്റെ 'ഹംസ' എന്ന കഥാപാത്രത്തെ മൃണാൾ പ്രശംസിച്ചു. "സിനിമ കാണുമ്പോൾ എനിക്ക് രൺവീറിനെയല്ല, ഹംസ എന്ന കഥാപാത്രത്തെ മാത്രമാണ് കാണാൻ കഴിഞ്ഞത്. അഭിനയത്തിൽ അദ്ദേഹം പുലർത്തുന്ന ആഴം അത്ഭുതപ്പെടുത്തുന്നതാണ്. അദ്ദേഹം ചെയ്യുന്ന എല്ലാ സിനിമകളും ബ്ലോക്ക്ബസ്റ്ററുകൾ ആകട്ടെ എന്ന് ഞാൻ ആഗ്രഹിക്കുന്നു," മൃണാൾ പറഞ്ഞു.

മാർച്ച് 19-ന് തിയേറ്ററുകളിലെത്തിയ 'ധുരന്ധർ 2' ഒരു സ്പൈ ത്രില്ലറാണ്. പാകിസ്ഥാനിലെ ലിയാരിയിലെ അധോലോക സംഘങ്ങൾക്കിടയിൽ നുഴഞ്ഞുകയറുന്ന ഒരു ഇന്ത്യൻ ചാരന്റെ കഥയാണ് ചിത്രം പറയുന്നത്.

രണ്ടാം ഭാഗത്തിൽ രൺവീർ അവതരിപ്പിക്കുന്ന ഹംസ അലി മസാരി എന്ന കഥാപാത്രത്തിന്റെ പരിശീലനവും തുടർന്നുണ്ടാകുന്ന സംഭവവികാസങ്ങളുമാണ് പ്രമേയം. അർജുൻ രാംപാൽ, ആർ. മാധവൻ, സഞ്ജയ് ദത്ത്, രാകേഷ് ബേദി എന്നിവരും പ്രധാന വേഷങ്ങളിൽ എത്തുന്നു.