ഹാസന്‍: ലൈംഗിക കുറ്റാരോപിതനായ മുന്‍ എംപി പ്രജ്വല്‍ രേവണ്ണയുടെ സഹോദരനും ജെഡി (എസ്) എംഎല്‍സിയുമായ സൂരജ് രേവണ്ണയെ ബ്ലാക്ക് മെയില്‍ ചെയ്തതിന് രണ്ട് വ്യക്തികള്‍ക്കെതിരെ കേസ്. വ്യാജ ലൈംഗിക പീഡന ആരോപണത്തില്‍ രേവണ്ണയെ കുടുക്കാന്‍ ശ്രമിച്ചതിനാണ് കേസെടുത്തിരിക്കുന്നത്. 

രേവണ്ണയെ അപകീര്‍ത്തിപ്പെടുത്താതിരിക്കാന്‍ പണം ആവശ്യപ്പെട്ടാണ് പ്രതികളായ ചേതനും ഭാര്യാസഹോദരനും സൂരജ് രേവണ്ണയെയും പരിചയക്കാരനായയ ശിവകുമാറിനെയും സമീപിച്ചത്. 

പ്രതിയായ ചേതന്‍ ആദ്യം ശിവകുമാറുമായി സൗഹൃദം സ്ഥാപിക്കുകയും സാമ്പത്തിക ബുദ്ധിമുട്ട് ചൂണ്ടിക്കാട്ടി ജോലി ഉറപ്പാക്കാന്‍ സഹായം അഭ്യര്‍ത്ഥിക്കുകയും ചെയ്തു. ഇക്കഴിഞ്ഞ ലോക്സഭാ തിരഞ്ഞെടുപ്പ് കാലത്ത് ചേതനെ രേവണ്ണയ്ക്ക് പരിചയപ്പെടുത്താമെന്ന് ശിവകുമാര്‍ സമ്മതിച്ചിരുന്നു.

പിന്നീട് രേവണ്ണയെയും കുടുംബത്തെയും അപകീര്‍ത്തിപ്പെടുത്തുമെന്ന് ചേതന്‍ ഭീഷണിപ്പെടുത്തി. അഞ്ച് കോടി രൂപ നല്‍കണമെന്ന തന്റെ ആവശ്യം അംഗീകരിച്ചില്ലെങ്കില്‍ ലൈംഗികാതിക്രമം ആരോപിച്ച് പോലീസില്‍ പരാതി നല്‍കുമെന്നും പറഞ്ഞു.

ചേതന്‍ ശിവകുമാറിനെ ബ്ലാക്ക്മെയില്‍ ചെയ്യുന്നത് തുടര്‍ന്നു, അദ്ദേഹത്തിന്റെ ആവശ്യം 3 കോടി രൂപയായും ഒടുവില്‍ 2.5 കോടിയായും കുറച്ചു. ചേതന്റെ ഫോണില്‍ നിന്ന് സന്ദേശങ്ങള്‍ അയച്ച് ബ്ലാക്ക്മെയിലിംഗില്‍ ഭാര്യാസഹോദരനും പങ്കെടുത്തിരുന്നു.

ജൂണ്‍ 19 ന് ചേതന്‍ വീണ്ടും ശിവകുമാറിനെ വിളിച്ചു, പണം നല്‍കിയില്ലെങ്കില്‍ രേവണ്ണയുടെ കുടുംബത്തെ അപകീര്‍ത്തിപ്പെടുത്തുമെന്ന് ഭീഷണിപ്പെടുത്തി. പിന്നാലെ ശിവകുമാറും രേവണ്ണയും ചേതനും ഭാര്യാസഹോദരനുമെതിരെ പരാതി നല്‍കുകയായിരുന്നു.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്