‘വ്യാജ ദൃശ്യങ്ങൾ സൃഷ്ടിച്ച് പ്രചരിപ്പിച്ചു’; മേജർ രവിക്കെതിരെ പരാതിയുമായി പിണറായി വിജയൻ

JUNE 12, 2026, 7:05 AM

തിരുവനന്തപുരം: സംവിധായകനും മുൻ സൈനിക ഉദ്യോഗസ്ഥനുമായ മേജർ രവിക്കെതിരെ അന്വേഷണം ആവശ്യപ്പെട്ട് ആഭ്യന്തര മന്ത്രി രമേശ് ചെന്നിത്തലയ്ക്ക് പരാതി നൽകി പ്രതിപക്ഷ നേതാവ് പിണറായി വിജയൻ.

നടൻ ഇന്നസെന്റിന് അന്തിമോപചാരം അർപ്പിക്കാൻ എത്തിയപ്പോൾ താൻ വലിയ വാഹന-പോലീസ് അകമ്പടിയോടെയായിരുന്നു എത്തിയതെന്ന മേജർ രവിയുടെ പരാമർശം തെറ്റായതാണെന്നും, അതിന്റെ അടിസ്ഥാനത്തിൽ കൃത്രിമ ദൃശ്യങ്ങൾ സൃഷ്ടിച്ച് സാമൂഹിക മാധ്യമങ്ങളിൽ പ്രചരിപ്പിച്ചുവെന്നുമാണ് പരാതിയിൽ പറയുന്നത്.

“അന്നത്തെ മുഖ്യമന്ത്രി 56 കാറുകളുടെയും 560 പോലീസുകാരുടെയും 10 ഫയർ എഞ്ചിനുകളുടെയും അകമ്പടിയോടെയാണ് ഇന്നസെന്റിന് ആദരാഞ്ജലി അർപ്പിക്കാൻ എത്തിയത്” എന്നായിരുന്നു മേജർ രവിയുടെ പരാമർശം. ഈ പ്രസ്താവനയ്ക്ക് പിന്നാലെ നിരവധി സോഷ്യൽ മീഡിയ അക്കൗണ്ടുകൾ വ്യാജ ദൃശ്യങ്ങളും പോസ്റ്റുകളും പ്രചരിപ്പിച്ചതായി പിണറായി വിജയൻ ആരോപിച്ചു.

സംഭവദിവസത്തെ യഥാർഥ ദൃശ്യങ്ങളും പിന്നീട് പ്രചരിപ്പിച്ച കൃത്രിമ പോസ്റ്റുകളുടെയും ലിങ്കുകൾ പരാതിക്കൊപ്പം നൽകിയിട്ടുണ്ടെന്ന് പ്രതിപക്ഷ നേതാവിന്റെ ഓഫീസ് അറിയിച്ചു.

കുറ്റകരവും അപകീർത്തികരവുമായ നവമാധ്യമ പ്രചാരണത്തിന് പിന്നിൽ ഗൂഢാലോചനയുണ്ടെന്നും, സംഭവത്തിൽ ശാസ്ത്രീയ അന്വേഷണം നടത്തി ഉത്തരവാദികൾക്കെതിരെ നിയമനടപടി സ്വീകരിക്കണമെന്നും പരാതിയിൽ ആവശ്യപ്പെട്ടിട്ടുണ്ട്.

മേജർ രവിയുടെ പരാമർശവും അതിനെ തുടർന്നുണ്ടായ സോഷ്യൽ മീഡിയ പ്രചാരണവും രാഷ്ട്രീയ വിവാദത്തിന് വഴിവെച്ചിരിക്കുകയാണ്.