പഹല്‍ഗാം ഭീകരാക്രമണം നടത്തിയ മൂന്ന് പേരെയും വധിച്ചെന്ന് വ്യക്തമാക്കി അമിത്ഷാ

JULY 29, 2025, 4:52 AM

ഡൽഹി: പഹല്‍ഗാം ഭീകരാക്രമണം നടത്തിയ മൂന്ന് പേരെയും വധിച്ചെന്ന് വ്യക്തമാക്കി അമിത്ഷാ. ലോക്സഭയിൽ ആണ് ആഭ്യന്തര മന്ത്രി അമിത് ഷാ ഇക്കാര്യം വ്യക്തമാക്കിയത്. കൊല്ലപ്പെട്ട മൂന്ന് ഭീകരരും പാകിസ്താനികളാണെന്നും പാകിസ്താനിലെ വോട്ടര്‍ ഐഡി വരെ കിട്ടിയിട്ടുണ്ടെന്നും അമിത് ഷാ പറഞ്ഞു.

ഓപ്പറേഷന്‍ സിന്ദൂര്‍ വിഷയത്തില്‍ ലോക്‌സഭയില്‍ നടന്ന ചര്‍ച്ചയില്‍ പങ്കെടുക്കവെയാണ് അമിത് ഷാ ഇത് വ്യക്തമാക്കിയത്. ഭീകരർ കാശ്മീരിൽ എത്തിയ ടൂറിസ്റ്റുകളെ നേരിട്ട് ആക്രമിച്ചിരുന്നു. വെടിവെപ്പ് ഉണ്ടായപ്പോൾ 26 പേരാണ് കൊല്ലപ്പെട്ടത്. ഇവരിൽ കൂടുതലും ഇന്ത്യയിലെ വിവിധ ഭാഗങ്ങളിൽ നിന്നുള്ള വിനോദസഞ്ചാരികളായിരുന്നു. ഈ സംഭവത്തിൽ ഇന്ത്യയിൽ അതീവ ഭീതിയും ദുഃഖവും ഉണ്ടായിരുന്നു. പിന്നാലെ പാകിസ്ഥാനും ഇന്ത്യയും തമ്മിൽ തർക്കം രൂക്ഷമായി. അതിർത്തിയിൽ യുദ്ധസമാനമായ സംഘർഷവും ഉണ്ടായി.

ഇന്ത്യൻ സൈന്യവും സി.ആർ.പി.എഫും ജമ്മു കാശ്മീർ പോലീസും ചേർന്നാണ് 'ഓപ്പറേഷൻ മഹാദേവ്' എന്ന പേരിൽ ഈ ഭീകരവിരുദ്ധ പ്രവർത്തനം നടത്തിയത്. ആക്രമണത്തിൽ പങ്കെടുത്ത മൂന്നു ഭീകരരെയും തിങ്കളാഴ്ചത്തെ ആക്രമണത്തിൽ വധിച്ചു എന്നാണ് അമിത്ഷാ വ്യക്തമാക്കിയത്. ആ മൂവരും പാകിസ്ഥാൻ പൗരന്മാരാണെന്ന് ഇന്ത്യ വ്യക്തമാക്കി. ഈ വിവരങ്ങൾ ഇന്ത്യൻ ആഭ്യന്തര മന്ത്രി അമിത് ഷാ പാർലമെന്റിൽ ഔദ്യോഗികമായി അറിയിച്ചു.