ഇന്ത്യൻ ചിത്രങ്ങളിൽ അഭിനയിക്കാൻ ആഗ്രഹം പ്രകടിപ്പിച്ച് മില്ലി ബോബി ബ്രൗൺ

JUNE 28, 2026, 1:06 AM

ഹോളിവുഡ് സൂപ്പർതാരം മില്ലി ബോബി ബ്രൗൺ ഡിറ്റക്ടീവ് വേഷത്തിലേക്ക് തിരിച്ചെത്തുന്ന 'എനോള ഹോംസ് 3' റിലീസിന് ഒരുങ്ങുന്നു. ചിത്രത്തിന്റെ പ്രമോഷൻ പരിപാടികളുടെ ഭാഗമായി നടത്തിയ അഭിമുഖത്തിൽ, ഭാവിയിൽ ഒരു ബോളിവുഡ് പ്രോജക്റ്റിന്റെ ഭാഗമാകാനുള്ള തന്റെ താല്പര്യം താരം തുറന്നുപറഞ്ഞു.

ആക്ഷൻ, പ്രണയം, ഡ്രാമ, കോമഡി തുടങ്ങി വൈവിധ്യമാർന്ന അനേകം ഘടകങ്ങൾ ഒരുമിച്ച് ചേർന്നതാണ് 'എനോള ഹോംസ്' സിനിമകളെന്നും, ഇത്തരം വൈവിധ്യങ്ങൾ കൈകാര്യം ചെയ്യാൻ തനിക്ക് സാധിക്കുന്നത് കൊണ്ട് തന്നെ ഇന്ത്യൻ സിനിമയ്ക്ക് താൻ ഏറെ അനുയോജ്യയായിരിക്കുമെന്നും മില്ലി കൂട്ടിച്ചേർത്തു.

വെറൈറ്റി ഇന്ത്യയ്ക്ക് നൽകിയ പ്രത്യേക അഭിമുഖത്തിലാണ് മില്ലി ബോബി ബ്രൗൺ ബോളിവുഡ് ചിത്രങ്ങളിൽ അഭിനയിക്കാനുള്ള തന്റെ ആഗ്രഹം വ്യക്തമാക്കിയത്. യഥാർത്ഥ ജീവിതത്തിൽ താനൊരു തമാശക്കാരിയായതിനാൽ ഒരു ബോളിവുഡ് കോമഡി ചിത്രത്തിന്റെ ഭാഗമാകാനാണ് കൂടുതൽ താല്പര്യമെന്ന് താരം വെളിപ്പെടുത്തി.

"തീർച്ചയായും, ബോളിവുഡ് അവസരങ്ങളെ ഞാൻ ഒരിക്കലും വേണ്ടെന്ന് പറയില്ല. ഇന്ത്യ സന്ദർശിക്കുക എന്നത് എന്റെ ബക്കറ്റ് ലിസ്റ്റിലുള്ള പ്രധാന കാര്യമാണ്. എനിക്ക് അവിടെ പോകാൻ വലിയ ആഗ്രഹമുണ്ട്. കോമഡി ചിത്രങ്ങളാണെങ്കിൽ ഞാൻ അതിനും തയ്യാറാണ്," മില്ലി പറഞ്ഞു. ബോളിവുഡ് സിനിമകളിൽ നൃത്തം ചെയ്യാൻ താല്പര്യമുണ്ടോ എന്ന ചോദ്യത്തിന്, "എനിക്ക് നൃത്തം ചെയ്യാൻ ഒരുപാട് ഇഷ്ടമാണ്" എന്നായിരുന്നു താരത്തിന്റെ ആവേശത്തോടെയുള്ള മറുപടി.

2020-ലാണ് നെറ്റ്ഫ്ലിക്സിൽ 'എനോള ഹോംസ്' ഫ്രാഞ്ചൈസിക്ക് തുടക്കം കുറിക്കുന്നത്. ഇതിഹാസ ഡിറ്റക്ടീവ് ഷെർലക് ഹോംസിന്റെ അനിയത്തിയായ എനോള ഹോംസ് എന്ന കൗമാരക്കാരിയുടെ സാഹസികതകളാണ് സിനിമയുടെ പ്രമേയം. നാൻസി സ്പ്രിംഗറുടെ പ്രശസ്തമായ നോവലുകളെ ആസ്പദമാക്കി ഒരുക്കിയ ചിത്രത്തിന്റെ രണ്ടാം ഭാഗം 2022-ലാണ് പുറത്തിറങ്ങിയത്. ആരാധകർ ഏറെ കാത്തിരിക്കുന്ന ചിത്രത്തിന്റെ മൂന്നാം ഭാഗം ജൂലൈ 1-ന് നെറ്റ്ഫ്ലിക്സ് വഴി ആഗോളതലത്തിൽ സ്ട്രീമിങ് ആരംഭിക്കും.