മഹേഷ് ബാബു ബോളിവുഡിലേക്ക്? സഞ്ജയ് ലീലാ ബൻസാലിയുമായി പുതിയ പ്രൊജക്റ്റ്

SEPTEMBER 17, 2026, 9:46 AM

എസ്.എസ്. രാജമൗലി ചിത്രം 'വാരാണസി'യുടെ തിരക്കുകൾക്കിടയിലും തെലുങ്ക് സൂപ്പർസ്റ്റാർ മഹേഷ് ബാബുവിന്റെ അടുത്ത പ്രൊജക്റ്റിനെക്കുറിച്ചുള്ള ഊഹാപോഹങ്ങൾ സിനിമാ ലോകത്ത് സജീവമാകുന്നു.

പ്രശസ്ത ബോളിവുഡ് സംവിധായകൻ സഞ്ജയ് ലീലാ ബൻസാലിയുമായി മഹേഷ് ബാബു കൈകോർക്കുന്നു എന്നതാണ് പുതിയ റിപ്പോർട്ടുകൾ. മുൻപ് അല്ലു അർജുൻ, ജൂനിയർ എൻ.ടി.ആർ, രാം ചരൺ തുടങ്ങിയ ദക്ഷിണേന്ത്യൻ താരങ്ങളുടെ പേരുകൾ ബൻസാലി ചിത്രങ്ങളുമായി ബന്ധപ്പെട്ട് ഉയർന്നു കേട്ടിരുന്നെങ്കിലും, നിലവിൽ മഹേഷ് ബാബുവിലേക്ക് കാര്യങ്ങളെത്തിയെന്നാണ് വിവരം.

സഞ്ജയ് ലീലാ ബൻസാലി അടുത്തിടെ മഹേഷ് ബാബുവുമായി കൂടിക്കാഴ്ച നടത്തുകയും കഥ ചർച്ച ചെയ്യുകയും ചെയ്തതായി 'തെലുങ്ക് നൗ' റിപ്പോർട്ട് ചെയ്യുന്നു. ബൻസാലി സിനിമകളുടെ സവിശേഷതയായ വലിയ സെറ്റുകളും ദൃശ്യഭംഗിയും വൈകാരിക മുഹൂർത്തങ്ങളും നിറഞ്ഞ ചിത്രമായിരിക്കും ഇതെന്നാണ് സൂചന.

എന്നാൽ ഈ വിഷയത്തിൽ ഇതുവരെ ഔദ്യോഗിക സ്ഥിരീകരണങ്ങൾ ഒന്നും തന്നെ വന്നിട്ടില്ല. 'വാരാണസി'യുടെ റിലീസിന് ശേഷമേ മഹേഷ് ബാബു അടുത്ത പ്രൊജക്റ്റ് പ്രഖ്യാപിക്കൂ.

അതേസമയം, 'വാരാണസി'യുടെ ചിത്രീകരണം അവസാന ഘട്ടത്തിലാണെന്ന് റിപ്പോർട്ടുകളുണ്ട്. മഹേഷ് ബാബു തന്റെ ഭാഗങ്ങളുടെ പ്രധാന ഭാഗങ്ങൾ പൂർത്തിയാക്കി ഡബ്ബിംഗ് ആരംഭിച്ചു കഴിഞ്ഞു.

പ്രിയങ്ക ചോപ്രയും ചിത്രത്തിലെ പ്രധാന ഭാഗങ്ങൾ പൂർത്തിയാക്കി. പ്രിഥ്വിരാജ് സുകുമാരനും അഭിനയിക്കുന്ന ഈ ബ്രഹ്മാണ്ഡ ചിത്രം 2027 ഏപ്രിൽ 7-ന് തിയേറ്ററുകളിൽ റിലീസ് ചെയ്യാനാണ് പദ്ധതിയിടുന്നത്.