ലക്‌നൗ : സെയ്ദ് മുഷ്താഖ് ട്രോഫി ക്രിക്കറ്റിലെ ആദ്യ മത്സരത്തിൽ ഒഡീഷയെ 10 വിക്കറ്റിന് തോൽപ്പിച്ചിരുന്ന കേരളത്തിന് റെയിൽവേയ്‌സിന് എതിരായ രണ്ടാം മത്സരത്തിൽ തിരിച്ചടി. ഇന്നലെ 32 റൺസിന് റെയിൽവേയ്‌സ് സഞ്ജു സാംസണിനെയും സംഘത്തെയും തോൽപ്പിച്ചു.

ടോസ് നഷ്ടപ്പെട്ട് ആദ്യബാറ്റിംഗിനിറങ്ങിയ റെയിൽവേയ്‌സ് നിശ്ചിത 20 ഓവറിൽ ഏഴുവിക്കറ്റ് നഷ്ടത്തിൽ 149 റൺസാണ് നേടിയത്. പക്ഷേ മറുപടിക്കിറങ്ങിയ കേരളത്തിന് 117/8ൽ ഒതുങ്ങേണ്ടിവന്നു. നവനീത് വിർക് (32), രവി സിംഗ് (25), ശിവം ചൗധരി (24), സുരാജ് അഹൂജ (17) എന്നിവരുടെ പോരാട്ടമാണ് റെയിൽവേയ്‌സിനെ 149ലെത്തിച്ചത്. കേരളത്തിനായി കെ.എം ആസിഫ് മൂന്ന് വിക്കറ്റ് വീഴ്ത്തിയപ്പോൾ അഖിൽ സ്‌കറിയയും ഷറഫുദ്ദീനും രണ്ട് വിക്കറ്റ് വീതം വീഴ്ത്തി.

മറുപടിക്കിറങ്ങിയ കേരളത്തിന് തുടക്കത്തിലേ തിരിച്ചടിയേറ്റു. കഴിഞ്ഞകളിയിൽ തകർത്താടിയ രോഹൻ കുന്നുമ്മലും (8), സഞ്ജു സാംസണും (19), യുവതാരം അഹമ്മദ് ഇമ്രാനും(12), വിഷ്ണു വിനോദും (7), ബാസിത്തും (7) പുറത്തായതോടെ കേരളം 13 -ാം ഓവറിൽ 58/5 എന്ന നിലയിലായി. തുടർന്ന് സൽമാൻ നിസാറും (18), അഖിൽ സ്‌കറിയയും (16), അങ്കിത് ശർമ്മയും (15*) പൊരുതാൻ ശ്രമിച്ചെങ്കിലും വിജയലക്ഷ്യം അകന്നുനിന്നു. റെയിൽവേയ്‌സിനായി  അടൽ ബിഹാരി റായ് മൂന്ന് വിക്കറ്റും ശിവം ചൗധരി രണ്ടുവിക്കറ്റും വീഴ്ത്തി. ബാറ്റിംഗിലും ബൗളിംഗിലും തിളങ്ങിയ ശിവം ചൗധരിയാണ് പ്‌ളേയർ ഒഫ് ദ മാച്ച്.

ഞായറാഴ്ച ഛത്തിസ്ഗഡിനെതിരെയാണ് കേരളത്തിന്റെ അടുത്ത മത്സരം.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്