ബംഗ്ലാദേശ് ടീം മാനേജ്‌മെന്റിൽ കുത്തിത്തിരിപ്പുണ്ടാക്കിയതും ഇന്ത്യയിലേക്ക് ഇല്ലെന്ന നിലപാടിൽ എത്തിച്ചതും പാകിസ്താൻ ക്രിക്കറ്റ് ബോർഡ് മേധാവിയാണെന്ന് ഗുരുതര ആരോണം.കൊൽക്കത്ത നൈറ്റ് റൈഡേഴ്‌സ് തങ്ങളുടെ ടീമിൽ നിന്ന് മുസ്തഫിസുർ റഹ്മാനെ നീക്കം ചെയ്യണമെന്ന് ബി.സി.സി.ഐ ആവശ്യപ്പെട്ടതിന് പിന്നാലെയാണ് ബംഗ്ലാദേശ് ഇത്തരമൊരു തീരുമാനമെടുത്തത്. ബംഗ്ലാദേശിനെ ഒഴിവാക്കിയപ്പോൾ, ഐ.സി.സി അംഗരാജ്യങ്ങളിൽ പാകിസ്ഥാൻ മാത്രമാണ് അവർക്ക് പിന്തുണ അറിയിച്ചത്. ഇന്ത്യക്കെതിരായ മത്സരം ബഹിഷ്‌കരിക്കുമെന്ന് അവർ വ്യാജമായി ഭീഷണി മുഴക്കിയെങ്കിലും പിന്നീട് ആ തീരുമാനത്തിൽ നിന്ന് പിന്നോട്ട് പോയി. ഇപ്പോൾ, ബംഗ്ലാദേശിന്റെ ഈ അവസ്ഥയ്ക്ക് കാരണം പാകിസ്ഥാൻ ക്രിക്കറ്റ് ബോർഡ് മേധാവി മുഹ്‌സിൻ നഖ്വിയാണെന്ന് മുൻ ബി.സി.ബി ജനറൽ സെക്രട്ടറിയും ഏഷ്യൻ ക്രിക്കറ്റ് കൗൺസിൽ സി.ഇ.ഒയുമായ സയ്യിദ് അഷ്‌റഫുൾ ഹഖ് കുറ്റപ്പെടുത്തി.

നിലവിലെ ബി.സി.ബി ചെയർമാൻ അമിനുൽ ഇസ്ലാമിനെ മുഹ്‌സിൻ നഖ്വി സ്വാധീനിച്ചുവെന്നും, ഇന്ത്യയിലേക്ക് യാത്ര ചെയ്യില്ലെന്ന വലിയ തീരുമാനമെടുക്കാൻ പ്രേരിപ്പിച്ചത് അദ്ദേഹമാണെന്നും റെവ്‌സ്‌പോർട്‌സിന് നൽകിയ അഭിമുഖത്തിൽ അഷ്‌റഫുൾ ഹഖ് പറഞ്ഞു.

ഒരു ക്രിക്കറ്റ് അഡ്മിനിസ്‌ട്രേറ്റർ എന്ന നിലയിൽ ഞാൻ സത്യസന്ധതയ്ക്കും പ്രതിബദ്ധതയ്ക്കുമാണ് മുൻഗണന നൽകുന്നത്. അമിനുൽ ഇസ്ലാം ഒരുപക്ഷേ നിഷ്‌കളങ്കനായതുകൊണ്ടാകാം നിലവിലെ ഐ.സി.സി പ്രസിഡന്റ് മുഹ്‌സിൻ നഖ്വിയുടെ സ്വാധീനത്തിൽപെട്ടുപോയത്. നഖ്വിയാണ് അദ്ദേഹത്തെ ഇതിന് പ്രേരിപ്പിച്ചത്. ഒടുവിൽ ആർക്കാണ് ഇതിൽ ലാഭമുണ്ടായത്? മുൻ ബി.സി.ബി ജനറൽ സെക്രട്ടറി ചോദിച്ചു.

ബംഗ്ലാദേശ് സർക്കാർ എടുത്ത തീരുമാനം അനവസരത്തിലുള്ളതാണെന്നും അഷ്‌റഫുൾ ഹഖ് പറഞ്ഞു. സെപ്തംബറിൽ ഇന്ത്യ ബംഗ്ലാദേശിൽ പര്യടനം നടത്തിയില്ലെങ്കിൽ രാജ്യത്തെ ക്രിക്കറ്റ് അഞ്ചോ പത്തോ വർഷം പിന്നോട്ട് പോകുമെന്നും അദ്ദേഹം മുന്നറിയിപ്പ് നൽകി.

ആരംഭം മുതൽ തന്നെ എന്റെ നിലപാട് വ്യക്തമായിരുന്നു. അന്നത്തെ ബംഗ്ലാദേശ് സർക്കാർ, പ്രത്യേകിച്ച് സ്‌പോർട്‌സ് അഡൈ്വസർ എടുത്ത തീരുമാനം തിടുക്കത്തിലുള്ളതായിരുന്നു എന്ന് ഞാൻ വിശ്വസിക്കുന്നു. മുസ്തഫിസുർ റഹ്മാനെ ഐ.പി.എല്ലിൽ കളിക്കാൻ അനുവദിച്ചില്ല എന്നതുകൊണ്ട് മാത്രം ഇത്രയും കടുത്ത തീരുമാനമെടുക്കേണ്ട ഒരു സാഹചര്യവും അവിടെയുണ്ടായിരുന്നില്ല.

തീർച്ചയായും, ഇന്ത്യ പര്യടനം നടത്തിയില്ലെങ്കിൽ ബംഗ്ലാദേശ് ക്രിക്കറ്റ് 5 മുതൽ 10 വർഷമോ അതിൽ കൂടുതലോ പിന്നോട്ട് പോകും. പര്യടനം നടക്കുന്നുണ്ടെന്ന് ഉറപ്പാക്കേണ്ടത് നിലവിലെ സർക്കാരിന്റെ കടമയാണ്. ഈ ബന്ധം നിലനിർത്തേണ്ടതിന്റെ പ്രാധാന്യം അവർ തിരിച്ചറിയണം. ഇന്ത്യൻ മാധ്യമങ്ങൾ ചരിത്രപരമായി ഞങ്ങളെ പിന്തുണച്ചിട്ടുണ്ട്, അവർ അത് വീണ്ടും ചെയ്യുമെന്ന് ഞാൻ പ്രതീക്ഷിക്കുന്നു, അദ്ദേഹം കൂട്ടിച്ചേർത്തു.