യാൻ ഡിയോമാഡെയെ സ്വന്തമാക്കാൻ 100 മില്യൺ യൂറോയുടെ വമ്പൻ പാക്കേജുമായി ലിവർപൂൾ

JUNE 19, 2026, 9:17 AM

ഐവറി കോസ്റ്റിന്റെ 19കാരനായ യുവ ഫോർവേഡ് യാൻ ഡിയോമാൻഡെയെ സ്വന്തമാക്കാനുള്ള ശ്രമത്തിലാണ് ലിവർപൂൾ. ആർബി ലെയ്പ്‌സിഗിന്റെ വിസ്മയ താരമായ ഡിയോമാൻഡെയ്ക്കായി ഏകദേശം 100 മില്യൺ യൂറോയുടെ വമ്പൻ പാക്കേജാണ് പ്രീമിയർ ലീഗ് ക്ലബ്ബ് ഒരുക്കുന്നത്. നേരത്തെ നൽകിയ ഓഫർ പുതുക്കിയാണ് ലിവർപൂൾ താരത്തെ സ്വന്തമാക്കാനുള്ള ശ്രമത്തിൽ ഫ്രഞ്ച് ക്ലബ്ബായ പി.എസ്.ജിയെ മറികടന്ന് നിലവിൽ മുന്നിലെത്തിയിരിക്കുകയാണ്. പി.എസ്.ജി ഇപ്പോഴും ഇതുവരെ ഔദ്യോഗികമായി ബിഡ് സമർപ്പിച്ചിട്ടില്ല.

വെറും 18 മാസങ്ങൾക്ക് മുമ്പ് ഫ്‌ളോറിഡയിലെ ഡി.എം.ഇ സ്‌പോർട്‌സ് അക്കാദമിയിൽ കളിച്ചിരുന്ന താരം, കഴിഞ്ഞ വർഷം ലെഗാനെസിൽ നിന്ന് 20 മില്യൺ യൂറോയ്ക്ക് ലെയ്പ്‌സിഗിൽ എത്തിയ യാൻ ഈ സീസണിൽ ബുണ്ടസ്ലിഗയിൽ ലെയ്പ്‌സിഗിനായി 33 മത്സരങ്ങളിൽ നിന്ന് 12 ഗോളുകളും 9 അസിസ്റ്റുകളും നേടി കളം നിറഞ്ഞു. നിലവിലെ ലോകകപ്പിൽ ഇക്വഡോറിനെതിരെ നടന്ന മത്സരത്തിലും ഡിയോമാൻഡെ തകർപ്പൻ പ്രകടനമാണ് പുറത്തെടുത്തത്.

വ്യക്തിഗത കരാറുകളുടെ കാര്യത്തിൽ ലിവർപൂൾ മുന്നിലാണെങ്കിലും താരത്തെ വിൽക്കാൻ ലെയ്പ്‌സിഗിന് താല്പര്യമില്ലെന്നാണ് റിപ്പോർട്ടുകൾ. ഡിയോമാൻഡെയുടെ കരാർ നീട്ടാനാണ് ജർമ്മൻ ക്ലബ്ബിന്റെ തീരുമാനം. ക്ലബ്ബിന്റെ മനസ്സ് മാറ്റണമെങ്കിൽ 130 മില്യൺ യൂറോയ്ക്ക് മുകളിലുള്ള തുക നൽകേണ്ടി വരുമെന്നാണ് ഫുട്‌ബോൾ വൃത്തങ്ങൾ സൂചിപ്പിക്കുന്നത്. നിലവിൽ ലോകകപ്പിൽ ഐവറി കോസ്റ്റിന്റെ ആദ്യ മത്സരത്തിൽ സ്റ്റാർട്ടിംഗ് ഇലവനിൽ ഇറങ്ങിയ ഈ 19കാരൻ ഇപ്പോൾ ലോക ഫുട്‌ബോളിലെ തന്നെ ഏറ്റവും ഡിമാൻഡുള്ള യുവ പ്രതിഭകളിൽ ഒരാളാണ്.