അഹമ്മദാബാദിൽ നടന്ന ആവേശകരമായ മത്സരത്തിന് പിന്നാലെ ഐപിഎൽ റൺവേട്ടക്കാർക്കുള്ള ഓറഞ്ച് ക്യാപ് പോരാട്ടം മുറുകുന്നു. ഗുജറാത്ത് ടൈറ്റൻസ് ഓപ്പണർ സായ് സുദർശൻ കൈക്കലാക്കിയ ഓറഞ്ച് ക്യാപ് മണിക്കൂറുകൾക്കകം സൺറൈസേഴ്സ് ഹൈദരാബാദിന്റെ ഹെൻറിച്ച് ക്ലാസൻ തിരിച്ചുപിടിച്ചു. 12 മത്സരങ്ങളിൽ നിന്ന് 508 റൺസുമായി ക്ലാസൻ ഇപ്പോൾ പട്ടികയിൽ ഒന്നാമതാണ്.
സൺറൈസേഴ്സിനെതിരായ മത്സരത്തിൽ 62 റൺസ് അടിച്ചുകൂട്ടിയതോടെയാണ് ഈ സീസണിൽ 500 റൺസ് പിന്നിടുന്ന ആദ്യ ബാറ്ററായി സായ് സുദർശൻ മാറിയത്. എന്നാൽ ഹൈദരാബാദിന്റെ മറുപടി ബാറ്റിംഗിൽ 14 റൺസ് നേടിയതോടെ ക്ലാസൻ സുദർശനെ മറികടന്ന് വീണ്ടും ഒന്നാമതെത്തി. 501 റൺസുമായി സായ് സുദർശൻ രണ്ടാം സ്ഥാനത്താണ്.
മത്സരത്തിൽ ഹൈദരാബാദ് പരാജയപ്പെട്ടെങ്കിലും വ്യക്തിഗത നേട്ടത്തിൽ ക്ലാസൻ കരുത്തുകാട്ടി. അതേസമയം, വലിയ സ്കോർ കണ്ടെത്താൻ കഴിയാതിരുന്ന അഭിഷേക് ശർമ്മ (481 റൺസ്) മൂന്നാം സ്ഥാനത്തേക്ക് പിന്തള്ളപ്പെട്ടു.
മലയാളി താരം സഞ്ജു സാംസൺ 430 റൺസുമായി പട്ടികയിൽ ഏഴാം സ്ഥാനത്ത് തുടരുന്നു. എന്നാൽ മുൻ ഇന്ത്യൻ നായകൻ വിരാട് കോലിക്ക് ഈ സീസൺ അത്ര ശുഭകരമല്ല. കഴിഞ്ഞ രണ്ട് മത്സരങ്ങളിലും പൂജ്യത്തിന് പുറത്തായ കോലി 379 റൺസുമായി ആദ്യ പത്തിൽ നിന്ന് പുറത്തായി 13-ാം സ്ഥാനത്തേക്ക് താഴ്ന്നു. ഗുജറാത്ത് നായകൻ ശുഭ്മാൻ ഗില്ലിനും ഇന്നലത്തെ മത്സരത്തിൽ തിളങ്ങാൻ കഴിയാത്തത് തിരിച്ചടിയായി.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20260612011402.jpg){kind=spacer}
