രവീന്ദ്ര ജഡേജ @350 വിക്കറ്റ്

AUGUST 18, 2026, 10:28 AM

ടെസ്റ്റ് ക്രിക്കറ്റിൽ 350 വിക്കറ്റ് എന്ന നാഴികക്കല്ല് പിന്നിട്ട് ഇന്ത്യൻ ഓൾറൗണ്ടർ രവീന്ദ്ര ജഡേജ. ശ്രീലങ്കയ്‌ക്കെതിരായ ഒന്നാം ടെസ്റ്റിന്റെ മൂന്നാം ദിനത്തിലാണ് ജഡേജ അപൂർവ്വ നേട്ടം സ്വന്തമാക്കിയത്. ഇതോടെ ടെസ്റ്റിൽ 350 വിക്കറ്റ് നേടുന്ന അഞ്ചാമത്തെ ഇന്ത്യൻ ബൗളറായി ജഡേജ മാറി. അനിൽ കുംബ്ലെ (619), രവിചന്ദ്രൻ അശ്വിൻ (537), കപിൽ ദേവ് (434), ഹർഭജൻ സിംഗ് (417) എന്നിവരാണ് ജഡേജയ്ക്ക് മുമ്പ് ഈ നേട്ടത്തിലെത്തിയ ഇന്ത്യൻ താരങ്ങൾ.

ഇടംകൈയ്യൻ സ്പിന്നർമാരുടെ പട്ടികയിലും ജഡേജയ്ക്ക് ശ്രദ്ധേയമായ നേട്ടമുണ്ട്. ടെസ്റ്റ് വിക്കറ്റുകളുടെ എണ്ണത്തിൽ ന്യൂസിലൻഡിന്റെ ഡാനിയൽ വെട്ടോറി (362), ശ്രീലങ്കയുടെ രംഗണ ഹെറാത്ത് (433) എന്നിവർക്ക് പിന്നിൽ മൂന്നാം സ്ഥാനത്താണ് ജഡേജ. കേശര നുവാന്തയെ പുറത്താക്കിയാണ് ജഡേജ 350-ാം ടെസ്റ്റ് വിക്കറ്റ് സ്വന്തമാക്കിയത്. ശ്രീലങ്കയുടെ ഒന്നാം ഇന്നിംഗ്‌സിൽ മൂന്ന് വിക്കറ്റാണ് ജഡേജ നേടിയത്.

ടെസ്റ്റ് ക്രിക്കറ്റിൽ 4,000ലേറെ റൺസും 350 വിക്കറ്റും നേടുന്ന രണ്ടാമത്തെ ഇന്ത്യൻ താരമെന്ന നേട്ടവും ജഡേജ സ്വന്തമാക്കി. മുൻ ഇന്ത്യൻ നായകൻ കപിൽ ദേവാണ് നേരത്തെ ഈ നേട്ടത്തിലെത്തിയത്. മത്സരത്തിന് മുമ്പ് 89 ടെസ്റ്റുകളിൽ നിന്ന് 4,095 റൺസും 348 വിക്കറ്റുമായിരുന്നു ജഡേജയുടെ സമ്പാദ്യം. 350 വിക്കറ്റ് പിന്നിട്ടതോടെ ഈ അപൂർവ നേട്ടത്തിലെത്തിയ താരങ്ങളുടെ ആഗോള പട്ടികയിൽ ജഡേജ നാലാമനായി. ഇംഗ്ലണ്ടിന്റെ ഇയാൻ ബോതം (5,200 റൺസ്, 383 വിക്കറ്റ്), ന്യൂസിലൻഡിന്റെ ഡാനിയൽ വെട്ടോറി (4,531 റൺസ്, 362 വിക്കറ്റ്) എന്നിവരാണ് കപിൽ ദേവിനൊപ്പം ഈ നേട്ടം സ്വന്തമാക്കിയ മറ്റ് താരങ്ങൾ.