ലോക ഫുട്ബോൾ ഭരണസമിതിയായ ഫിഫയ്ക്കും അതിന്റെ പ്രസിഡന്റ് ജിയാനി ഇൻഫാന്റീനോയ്ക്കുമെതിരെ ഗുരുതരമായ ആരോപണങ്ങളുമായി ജോർദാൻ ഫുട്ബോൾ അസോസിയേഷൻ പ്രസിഡന്റ് പ്രിൻസ് അലി ബിൻ ഹുസൈൻ രംഗത്ത്. ഫിഫ തങ്ങൾക്ക് നൽകാനുള്ള സമ്മാനത്തുക തടഞ്ഞുവെച്ചിരിക്കുകയാണെന്നും, ഇൻഫാന്റീനോയ്ക്ക് പിന്തുണ പ്രഖ്യാപിച്ചാൽ മാത്രം തുക നൽകാം എന്ന തരത്തിൽ ഭീഷണിപ്പെടുത്തിയെന്നുമാണ് പ്രിൻസ് അലിയുടെ വെളിപ്പെടുത്തൽ. ഫിഫ ലോകകപ്പിലേക്ക് സ്വകാര്യ നിക്ഷേപം കൊണ്ടുവരാനുള്ള പദ്ധതി പരാജയപ്പെട്ടതിന് പിന്നാലെ വരാനിരിക്കുന്ന തിരഞ്ഞെടുപ്പിൽ ഇൻഫാന്റീനോയുടെ നേതൃത്വം ചോദ്യം ചെയ്യപ്പെടുന്ന സാഹചര്യത്തിലാണ് ഈ ആരോപണങ്ങളും പുറത്തുവന്നിരിക്കുന്നത്.
ഖത്തറിൽ നടന്ന ഫിഫ അറബ് കപ്പിൽ രണ്ടാം സ്ഥാനം നേടിയ ജോർദാൻ ടീമിന് അർഹതപ്പെട്ട സമ്മാനത്തുക ഇതുവരെ ഫിഫ കൈമാറിയിട്ടില്ലെന്ന് മുൻ ഫിഫ വൈസ് പ്രസിഡന്റ് കൂടിയായ പ്രിൻസ് അലി സാമൂഹിക മാധ്യമങ്ങളിലൂടെ വ്യക്തമാക്കി. കോടിക്കണക്കിന് പണം കൈവശമുണ്ടെന്ന് അവകാശപ്പെടുമ്പോഴാണ് കളിക്കാർക്കുള്ള തുക ഫിഫ തടഞ്ഞുവെച്ചിരിക്കുന്നത്. കൂടാതെ അമേരിക്കയിൽ നടന്ന ലോകകപ്പിൽ കൃത്യമായ ടിക്കറ്റ് ഉണ്ടായിട്ടും നിരവധി ജോർദാൻ ആരാധകർക്ക് വിസ നിഷേധിക്കപ്പെട്ടതിലും, ജോർദാന്റെ ലോകകപ്പ് വരുമാനത്തിന് അമേരിക്കൻ സർക്കാർ നികുതി ചുമത്തുന്നതിലും അദ്ദേഹം അമർഷം രേഖപ്പെടുത്തി.
തങ്ങളുടെ ആവശ്യങ്ങളിൽ സഹായിക്കണമെങ്കിൽ ഇൻഫാന്റീനോയ്ക്ക് വരാനിരിക്കുന്ന തിരഞ്ഞെടുപ്പിൽ പിന്തുണ നൽകണമെന്ന് വാക്കാൽ ആവശ്യപ്പെട്ടതായും പ്രിൻസ് അലി വെളിപ്പെടുത്തി. ഇത് വ്യക്തമായ ബ്ലാക്ക്മെയിലിങ് ആണെന്നും തങ്ങൾ ഇതിന് വഴങ്ങില്ലെന്നും അദ്ദേഹം കൂട്ടിച്ചേർത്തു. മുൻപ് നടന്ന തിരഞ്ഞെടുപ്പുകളിൽ സെപ് ബ്ലാറ്ററിനെതിരെ മത്സരിച്ച് പരാജയപ്പെട്ട പ്രിൻസ് അലി, പിന്നീട് ഇൻഫാന്റീനോയ്ക്കും സൽമാൻ ബിൻ ഇബ്രാഹിം അൽ ഖലീഫയ്ക്കും പിന്നിൽ മൂന്നാമതായാണ് ഫിനിഷ് ചെയ്തത്.
തന്റെ നാലാം ഊഴത്തിനായി തയ്യാറെടുക്കുന്ന ഇൻഫാന്റീനോയ്ക്ക് യൂറോപ്യൻ രാജ്യങ്ങളിൽ നിന്നും ശക്തമായ എതിർപ്പാണ് നേരിടുന്നത്. യൂറോപ്യൻ ഫുട്ബോൾ സംഘടനയിലെ അംഗങ്ങളായ വെയിൽസ്, ഫിൻലൻഡ്, സ്വീഡൻ, സെർബിയ എന്നീ രാജ്യങ്ങൾ ഇൻഫാന്റീനോയ്ക്ക് നൽകിയിരുന്ന പിന്തുണക്കത്തുകൾ തിരികെ വിളിച്ചുകഴിഞ്ഞു. ഇംഗ്ലീഷ് ഫുട്ബോൾ അസോസിയേഷനും സമാനമായ നീക്കത്തിന് ഒരുങ്ങുന്നതായാണ് സൂചനകൾ. ഇതോടെ വരാനിരിക്കുന്ന തിരഞ്ഞെടുപ്പിൽ ഫിഫ അധ്യക്ഷന്റെ ഭാവി വലിയ അനിശ്ചിതത്വത്തിലായിരിക്കുകയാണ്.
വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ
ഇവിടെ ക്ലിക്ക് ചെയ്യുക
.
വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .
ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.
യൂട്യൂബ് ചാനൽ:വാചകം ന്യൂസ്
-20201019105233.jpg)
