19-ാം വയസ്സിലെ ഒളിച്ചോട്ടം, വിവാഹങ്ങൾ! മനസ്സ് തുറന്ന് രാംചരണിന്റെ സഹോദരി

JUNE 9, 2026, 10:45 PM

ജീവിതത്തിൽ നേരിടേണ്ടി വന്ന കഠിനമായ പ്രതിസന്ധികളെയും അതിൽ നിന്നും നേടിയെടുത്ത ആത്മവിശ്വാസത്തെയും കുറിച്ച് മനസ്സ് തുറന്ന് മെഗാസ്റ്റാർ ചിരഞ്ജീവിയുടെ മകളും നടൻ രാം ചരണിന്റെ സഹോദരിയുമായ ശ്രീജ കൊനിഡേല. കടന്നുപോയ മോശം അവസ്ഥകളാണ് തന്റെ വ്യക്തിത്വത്തെ പരുവപ്പെടുത്തിയതെന്ന് വ്യക്തമാക്കിയ ശ്രീജ, തിങ്കളാഴ്ച ഇൻസ്റ്റാഗ്രാമിൽ പങ്കുവെച്ച ഒരു വീഡിയോയിലൂടെയാണ് തന്റെ വികാരങ്ങൾ ആരാധകരുമായി പങ്കുവെച്ചത്.

ജീവിതത്തിൽ തുടർച്ചയായി ഇത്രയധികം ദുരിതങ്ങൾ ഉണ്ടാകാൻ കാരണം എന്താണെന്ന് ചിന്തിച്ച് നിസ്സഹായയായി ഇരുന്ന ഒരു ഭൂതകാലം തനിക്കുണ്ടായിരുന്നുവെന്ന് അവർ തുറന്നു സമ്മതിച്ചു.കഷ്ടപ്പാടുകളിൽ തളർന്നിരിക്കാതെ ജീവിതത്തെ തിരിച്ചുപിടിച്ചതിനെക്കുറിച്ച് ശ്രീജ വീഡിയോയിൽ സംസാരിച്ചു:

"എന്തുകൊണ്ടാണ് ഇതെല്ലാം എനിക്ക് മാത്രം സംഭവിക്കുന്നത്, ഞാൻ എന്തിനാണ് ഇത്രയധികം വേദന അനുഭവിക്കുന്നത്? തുടർച്ചയായ കഷ്ടപ്പാടുകൾ ഉണ്ടാവാൻ ഞാനെന്തു തെറ്റ് ചെയ്തു? എന്ന് ചിന്തിച്ചിരുന്ന ഒരു അവസ്ഥ എനിക്കുണ്ടായിരുന്നു. എന്നാൽ, ആ ഇരയാക്കപ്പെടൽ മനോഭാവത്തിൽ നിന്നും ജീവിതം വെറുതെ സംഭവിക്കുകയല്ല, മറിച്ച് അത് സ്വന്തമായി സൃഷ്ടിക്കാനുള്ള ശക്തി എനിക്കുണ്ട് എന്ന തിരിച്ചറിവിലേക്ക് ഞാൻ എത്തിച്ചേർന്നു. എന്റെ ജീവിതത്തിന്റെ ഭൂരിഭാഗവും ഞാൻ എന്നെത്തന്നെ തിരിച്ചറിഞ്ഞത് വേദനയിലൂടെയും കഷ്ടപ്പാടുകളിലൂടെയുമാണ്. ആ വേദന ഇപ്പോഴും എന്റെ ഭാഗമാണ്, പക്ഷേ അതുമാത്രമല്ല ഞാൻ."

ഏറെ പ്രതിസന്ധികൾ നിറഞ്ഞതായിരുന്നു ശ്രീജ കൊനിഡേലയുടെ വ്യക്തിജീവിതം. 2007-ൽ തന്റെ 19-ാം വയസ്സിൽ കാമുകനായ ശിരീഷ് ഭരദ്വാജിനൊപ്പം ഒളിച്ചോടി വിവാഹം കഴിച്ചപ്പോഴാണ് ശ്രീജ ആദ്യമായി വാർത്തകളിൽ നിറയുന്നത്. അക്കാലത്ത് വലിയ ദേശീയ പ്രാധാന്യം നേടിയ ഈ ആര്യസമാജ് വിവാഹത്തിന് ശേഷം, കുടുംബത്തിൽ നിന്ന് ഭീഷണിയുണ്ടെന്ന് ആരോപിച്ച് ഇവർ പോലീസിന്റെയും മാധ്യമങ്ങളുടെയും സംരക്ഷണം തേടിയിരുന്നു.

2008-ൽ ഇവർക്കൊരു മകൾ ജനിച്ചു. എന്നാൽ 2011-ൽ ശിരീഷിനും കുടുംബത്തിനുമെതിരെ സ്ത്രീധന പീഡനക്കേസ് ഫയൽ ചെയ്ത ശ്രീജ, സ്വന്തം കുടുംബത്തിലേക്ക് മടങ്ങിയെത്തുകയും 2014-ൽ ഔദ്യോഗികമായി വിവാഹമോചനം നേടുകയും ചെയ്തു. പിന്നീട് 2016-ൽ തന്റെ ബാല്യകാല സുഹൃത്തും വ്യവസായിയുമായ കല്യാൺ ദേവിനെ ശ്രീജ വിവാഹം കഴിച്ചു. ഈ ബന്ധത്തിലും ഇവർക്കൊരു മകൾ ജനിച്ചുവെങ്കിലും 2022-ൽ കൃത്യമായ കാരണങ്ങൾ വെളിപ്പെടുത്താതെ ഇരുവരും വേർപിരിഞ്ഞു. ചിരഞ്ജീവിയുടെ മറ്റ് മക്കളായ സുഷ്മിത കൊനിഡേല 2006-ൽ വ്യവസായി എൽ.വി. വിഷ്ണു പ്രസാദിനെ വിവാഹം കഴിച്ച് രണ്ട് മക്കളോടൊപ്പം ജീവിക്കുന്നു. മകൻ രാം ചരൺ ഉപാസനയെയാണ് വിവാഹം കഴിച്ചിരിക്കുന്നത്.