ഭാര്യയുടെ രോഗവിവരം മാനസികമായി തകർത്തു, വീണ്ടും ലഹരി ഉപയോഗിക്കാൻ തോന്നിയിരുന്നെന്ന് സഞ്ജയ് ദത്ത്!

SEPTEMBER 16, 2026, 4:41 AM

കരിയറിന്റെ തുടക്കത്തിൽ ലഹരിമരുന്നിന് അടിമപ്പെടുകയും പിന്നീട് അതിൽ നിന്ന് പൂർണ്ണമായി മുക്തനായി സിനിമയിലേക്ക് ശക്തമായി തിരിച്ചെത്തുകയും ചെയ്ത ബോളിവുഡ് താരമാണ് സഞ്ജയ് ദത്ത്. എന്നാൽ, ജീവിതത്തിലെ ഏറ്റവും ദുർബലമായ ഒരു ഘട്ടത്തിൽ വീണ്ടും ലഹരി ഉപയോഗിക്കാൻ തനിക്ക് തോന്നിയിരുന്നതായി സഞ്ജയ് ദത്ത് വെളിപ്പെടുത്തിയ അനുഭവം പങ്കുവെക്കുകയാണ് തിരക്കഥാകൃത്ത് രൺബീർ പുഷ്പ്. 1992-ൽ 'സാഹിബ്‌സാദേ' എന്ന ചിത്രത്തിന്റെ കുളു-മണാലി ഷൂട്ടിങ് നടക്കുമ്പോഴാണ് സഞ്ജയ് ദത്ത് ഈ വിഷയം തന്നോട് തുറന്നുപറഞ്ഞതെന്ന് പുഷ്പ് വ്യക്തമാക്കുന്നു.

ആദ്യഭാര്യ റിച്ച ശർമ്മയ്ക്ക് ബ്രെയിൻ ട്യൂമർ സ്ഥിരീകരിക്കുകയും ശസ്ത്രക്രിയയ്ക്കായി ആശുപത്രിയിലേക്ക് കൊണ്ടുപോവുകയും ചെയ്ത സമയത്താണ് വീണ്ടും ലഹരി ഉപയോഗിച്ചാലോ എന്ന് ഏതാനും സെക്കൻഡുകളിലേക്ക് തോന്നിയിരുന്നതെന്ന് സഞ്ജയ് ദത്ത് പറഞ്ഞതായി രൺബീർ പുഷ്പ് ഓർത്തെടുത്തു.

"മനസ്സ് പൂർണ്ണമായി തകർന്നുപോയ ആ നിമിഷത്തിൽ ശരീരം വിറയ്ക്കുകയായിരുന്നു. എന്നാൽ തൊട്ടടുത്ത നിമിഷം തന്നെ അച്ഛന്റെ മുഖവും കുടുംബവും ജീവിതവും മനസ്സിലേക്ക് വരികയും ആ ചിന്ത അപ്രത്യക്ഷമാവുകയും ചെയ്തു," എന്ന് സഞ്ജയ് ദത്ത് പറഞ്ഞതായി അദ്ദേഹം വെളിപ്പെടുത്തി. ലോകത്തിലെ ഒരു ശക്തിക്കും ഇനി തന്നെ ആ വഴിയിലേക്ക് തിരികെ കൊണ്ടുപോകാനാവില്ലത്രയും മാനസികമായി താൻ ശക്തനായിരുന്നുവെന്നും സഞ്ജയ് കൂട്ടിച്ചേർത്തു.

1985-ൽ 'ഹം നൗജവാൻ' എന്ന ചിത്രത്തിലൂടെ അഭിനയരംഗത്തെത്തിയ റിച്ച ശർമ്മ 1987-ലാണ് സഞ്ജയ് ദത്തിനെ വിവാഹം കഴിക്കുന്നത്. വിവാഹം കഴിഞ്ഞ് രണ്ട് വർഷത്തിനുള്ളിൽ രോഗബാധിതയായ റിച്ച 1996-ൽ ന്യൂയോർക്കിൽ വെച്ചാണ് അന്തരിച്ചത്.

ആ കാലയളവിൽ ഭീകരവാദ വിരുദ്ധ പ്രവർത്തന നിയമപ്രകാരം സഞ്ജയ് ദത്ത് അറസ്റ്റിലായതിനാൽ റിച്ചയുടെ അവസാന നാളുകളിൽ അദ്ദേഹത്തിന് ഒപ്പമുണ്ടാകാൻ സാധിച്ചിരുന്നില്ല. ദമ്പതികളുടെ മകൾ ത്രിഷാലയെ പിന്നീട് യു.എസിലെ മുത്തശ്ശനും മുത്തശ്ശിയുമാണ് വളർത്തിയത്.