ഹാരിയോടും മേഗനോടും അകലം പാലിക്കാൻ പ്രിൻസ് വില്യവും കാതറിനും!

SEPTEMBER 15, 2026, 10:35 PM

ബ്രിട്ടീഷ് രാജകുടുംബത്തിൽ നിന്നും മാറി യുഎസിൽ താമസമാക്കിയിരുന്ന പ്രിൻസ് ഹാരിയും മേഗൻ മാർക്കിളും യുകെയിലേക്ക് തിരിച്ചെത്തിയതോടെ രാജകുടുംബത്തിലെ വരുംനാളുകളിലെ നിലപാടുകളെക്കുറിച്ചുള്ള ചർച്ചകൾ സജീവമാകുന്നു.

ഹാരിയുടെ സഹോദരനും വെയിൽസ് രാജകുമാരനുമായ പ്രിൻസ് വില്യവും കാതറിൻ മിഡിൽട്ടണും (കേറ്റ്) ഈ മാറ്റങ്ങളെ എങ്ങനെ നേരിടുമെന്നാണ് അന്താരാഷ്ട്ര മാധ്യമങ്ങൾ ഉറ്റുനോക്കുന്നത്. കാലിഫോർണിയയിലായിരുന്നപ്പോൾ ഈ വിഷയങ്ങൾ അകലെയായിരുന്നെങ്കിലും, ഇപ്പോഴത് നേരിട്ട് അഭിമുഖീകരിക്കേണ്ട സാഹചര്യമാണെന്ന് വിദേശ മാധ്യമങ്ങൾ റിപ്പോർട്ട് ചെയ്യുന്നു.

വില്യമും കേറ്റും നിലവിൽ സ്വന്തം കുടുംബ കാര്യങ്ങളിലാണ് പൂർണ്ണ ശ്രദ്ധ കേന്ദ്രീകരിക്കുന്നതെങ്കിലും, ഭാവിയിൽ ഹാരിയോടും മേഗനോടും അവർ എങ്ങനെ ഇടപെടും എന്നതിൽ പൊതുസമൂഹത്തിൽ നിന്നും സമ്മർദ്ദമുണ്ടാകാൻ സാധ്യതയുണ്ടെന്ന് 'വില്യം ആൻഡ് കാതറിൻ' എന്ന പുസ്തകത്തിന്റെ രചയിതാവ് റസ്സൽ മേയേഴ്സ് വ്യക്തമാക്കി.

ഹാരിയുടെ രാജകുടുംബത്തിലേക്കുള്ള തിരിച്ചുവരവിനെപ്പറ്റി കിംഗ് ചാൾസിനും പ്രിൻസ് വില്യമിനും വ്യത്യസ്ത അഭിപ്രായങ്ങളുണ്ടെങ്കിലും, ഹാരിയും മേഗനും ഇനി രാജകുടുംബത്തെ ഔദ്യോഗികമായി പ്രതിനിധീകരിക്കേണ്ടതില്ലെന്ന കാര്യത്തിൽ ഇരുവരും ഒരേ നിലപാടിലാണ്.

ഹാരിയുമായി ഇനി ഔദ്യോഗികമായോ വ്യക്തിപരമായോ യാതൊരുവിധ ബന്ധവും പുലർത്താൻ പ്രിൻസ് വില്യം ആഗ്രഹിക്കുന്നില്ലെന്നും റിപ്പോർട്ടുകൾ സൂചിപ്പിക്കുന്നു. അതേസമയം, ഹാരിയും മേഗനും തങ്ങളുടെ മക്കളായ ആർച്ചിക്കും ലിലിബെറ്റിനുമൊപ്പം ഓഗസ്റ്റ് 26-നാണ് യുകെയിൽ എത്തിയത്.

ഇരുവരും ഇനി 'നോൺ-വർക്കിംഗ് റോയൽസ്' അഥവാ സാധാരണ പൗരന്മാരായി മാത്രം പ്രവർത്തിക്കുമെന്ന് കിംഗ് ചാൾസ് ഔദ്യോഗിക കത്തിലൂടെ അറിയിച്ചിരുന്നു. കാലിഫോർണിയയിലെ മോണ്ടെസിറ്റോയിലുള്ള വീട് സ്വന്തമായി നിലനിർത്തിക്കൊണ്ടുതന്നെ കുടുംബം ഇനി അനിശ്ചിതകാലത്തേക്ക് യുകെയിൽ തുടരുമെന്നാണ് വിവരങ്ങൾ.