അവസാന വീഡിയോ പോസ്റ്റ് ചെയ്ത് മണിക്കൂറുകൾക്കകം മരണം; നടി സഞ്ചിത ഉഗാലെയുടെ മരണത്തിൽ ദുരൂഹത?

JUNE 16, 2026, 1:05 AM

മുംബൈ: നടി സഞ്ചിത ഉഗാലെയുടെ ആത്മഹത്യ സിനിമാ ലോകത്തെ ഒന്നടങ്കം ഞെട്ടിച്ചിരിക്കുകയാണ്. വെറും 22 വയസ്സിനിടെ അഭിനയരംഗത്ത് ശ്രദ്ധേയമായ മുന്നേറ്റം നടത്തിക്കൊണ്ടിരുന്ന സഞ്ചിതയുടെ അപ്രതീക്ഷിത മരണം ആരാധകരെയും സഹപ്രവർത്തകരെയും അക്ഷരാർത്ഥത്തിൽ ദുഃഖത്തിലാഴ്ത്തി.

ഞായറാഴ്ച വൈകിട്ട് ഏഴ് മുതൽ ഏഴര മണിക്ക് ഇടയിലാണ് സഞ്ചിതയെ സ്വന്തം വീട്ടിലെ കിടപ്പുമുറിയിൽ തൂങ്ങി മരിച്ച നിലയിൽ കണ്ടെത്തിയത്. സംഭവത്തിൽ പൊലീസ് അന്വേഷണം പുരോഗമിക്കുകയാണ്.

മരണത്തിന് തൊട്ടുമുമ്പും സമൂഹമാധ്യമങ്ങളിൽ സജീവമായിരുന്നു സഞ്ചിത. അവസാന വീഡിയോ പോസ്റ്റ് ചെയ്തതിന് 24 മണിക്കൂർ പോലും തികയുന്നതിന് മുൻപാണ് മരണവാർത്ത പുറത്തുവന്നത്. ഒരു ഹിന്ദി ഗാനത്തിനൊപ്പം ചുണ്ടനക്കി അഭിനയിക്കുന്ന വീഡിയോയായിരുന്നു താരം അവസാനമായി പങ്കുവെച്ചത്. വീഡിയോയിൽ സന്തോഷവതിയും ഊർജസ്വലയുമായാണ് സഞ്ചിതയെ കാണാൻ കഴിയുന്നത്.

ഇതോടെ സഞ്ചിതയുടെ മരണവാർത്ത ആരാധകർക്കിടയിലും സോഷ്യൽ മീഡിയയിലും വലിയ ഞെട്ടലുണ്ടാക്കി. അവസാന വീഡിയോയ്ക്ക് താഴെ അനുശോചന സന്ദേശങ്ങളുമായി നിരവധി പേരാണ് എത്തുന്നത്. വീഡിയോ കണ്ടാൽ താരം ആത്മഹത്യ ചെയ്യുമെന്നോ ഗുരുതര മാനസിക സമ്മർദ്ദത്തിലാണെന്നോ യാതൊരു സൂചനയും ലഭിച്ചിരുന്നില്ലെന്നാണ് പലരും കുറിക്കുന്നത്.

അതേസമയം, സംഭവത്തിൽ ദുരൂഹത നീക്കാൻ സമഗ്ര അന്വേഷണം വേണമെന്ന ആവശ്യവും ഉയരുന്നുണ്ട്. ഓൾ ഇന്ത്യ സിനി വർക്കേഴ്‌സ് അസോസിയേഷൻ സഞ്ചിത ഉഗാലെയുടെ മരണത്തിൽ ഉന്നതതല അന്വേഷണം ആവശ്യപ്പെട്ട് മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസിന് കത്ത് നൽകിയതായാണ് റിപ്പോർട്ടുകൾ.

സഞ്ചിതയുടെ മരണത്തിലേക്ക് നയിച്ച സാഹചര്യങ്ങൾ എന്താണെന്ന് കണ്ടെത്താൻ പൊലീസ് അന്വേഷണം തുടരുകയാണ്. യുവതാരത്തിന്റെ അപ്രതീക്ഷിത വേർപാട് സിനിമാ ലോകത്തിനും ആരാധകർക്കും ഇപ്പോഴും വിശ്വസിക്കാനാകാത്ത വേദനയായി തുടരുകയാണ്.