അഭിനയത്തിന് അപ്പുറം സിനിമാ സാമ്രാജ്യം; വിശാഖപട്ടണത്ത് പുതിയ AAA മൾട്ടിപ്ലക്സ് തുറന്ന് അല്ലു അർജുൻ

AUGUST 10, 2026, 10:52 PM

വിശാഖപട്ടണം: അഭിനേതാവ് എന്ന നിലയിൽ നിന്ന് വിനോദ വ്യവസായരംഗത്തേക്കും ബിസിനസ് സാമ്രാജ്യം വ്യാപിപ്പിച്ച് തെലുങ്ക് സൂപ്പർ താരം അല്ലു അർജുൻ. അല്ലു അർജുന്റെ ഉടമസ്ഥതയിലുള്ള AAA സിനിമാസിന്റെ പുതിയ മൾട്ടിപ്ലക്സ് തിയേറ്റർ വിശാഖപട്ടണത്ത് പ്രൗഢഗംഭീരമായി ഉദ്ഘാടനം ചെയ്തു.

പുതിയ തിയേറ്ററിലെ പ്രധാന ആകർഷണം ഇന്ത്യയിൽ ആദ്യമായി അവതരിപ്പിക്കുന്ന 'LED Projection Q-Luxon Screen' ആണ്. 70 അടി നീളവും 30 അടി വീതിയുമുള്ള സ്‌ക്രീൻ ആന്ധ്രാപ്രദേശിലെ ഏറ്റവും വലിയ എൽഇഡി സിനിമാ സ്‌ക്രീനാണെന്നും അവകാശപ്പെടുന്നു. അത്യാധുനിക സാങ്കേതികവിദ്യയിലൂടെ പ്രേക്ഷകർക്ക് പുതിയ തലത്തിലുള്ള സിനിമാ കാഴ്ചാനുഭവം സമ്മാനിക്കുകയാണ് ലക്ഷ്യം.

സാങ്കേതികവിദ്യ, പ്രീമിയം അടിസ്ഥാന സൗകര്യങ്ങൾ, മികച്ച സൗകര്യങ്ങൾ എന്നിവയ്ക്ക് പ്രാധാന്യം നൽകിയാണ് AAA സിനിമാസ് പുതിയ തലമുറയിലെ പ്രീമിയം സിനിമാ അനുഭവം ഒരുക്കുന്നത്. ലോകോത്തര ഹോസ്പിറ്റാലിറ്റിയും അത്യാധുനിക സാങ്കേതികവിദ്യയും സംയോജിപ്പിക്കുന്ന മൾട്ടിപ്ലക്സ് വിശാഖപട്ടണത്തെ വിനോദമേഖലയ്ക്ക് പുതിയ ഉണർവ് നൽകുമെന്നാണ് വിലയിരുത്തൽ.

റീക്ലൈനർ ടിക്കറ്റ് ഉടമകൾക്കായി പ്രത്യേക ഐക്കൺ സ്റ്റാർ ലോഞ്ച്, വിഐപി എൻട്രൻസ്, പ്രീമിയം സീറ്റിങ് തുടങ്ങിയ സൗകര്യങ്ങളും പുതിയ മൾട്ടിപ്ലക്സിലുണ്ട്. സ്‌ക്രീനിലെ സിനിമയ്ക്ക് പുറമെ പ്രേക്ഷകർക്ക് കൂടുതൽ സൗകര്യപ്രദവും ഓർമയിൽ നിൽക്കുന്നതുമായ അനുഭവം സമ്മാനിക്കുകയാണ് ഇതിലൂടെ ലക്ഷ്യമിടുന്നത്.

അഭിനയത്തിനപ്പുറം സിനിമാ വ്യവസായത്തിന്റെ വിവിധ മേഖലകളിലേക്ക് ചുവടുവയ്ക്കുന്ന അല്ലു അർജുന്റെ പദ്ധതികളിലെ മറ്റൊരു പ്രധാന നീക്കമായാണ് AAA സിനിമാസിന്റെ പുതിയ മൾട്ടിപ്ലക്സ് വിലയിരുത്തപ്പെടുന്നത്. പ്രേക്ഷകർക്ക് മികച്ച സിനിമാനുഭവം സമ്മാനിക്കുക എന്ന ലക്ഷ്യത്തോടെയാണ് ബ്രാൻഡ് മുന്നോട്ടുപോകുന്നതെന്നാണ് അധികൃതർ വ്യക്തമാക്കുന്നത്.