കുടകിന്റെ മരുമകനായി വിജയ് ദേവരകൊണ്ട; രശ്മികയുടെ നാട്ടിൽ വിരുന്ന്

APRIL 7, 2026, 4:36 AM

കുടക്: തെന്നിന്ത്യൻ താരദമ്പതികളായ വിജയ് ദേവരകൊണ്ടയുടെയും രശ്മിക മന്ദാനയുടെയും വിവാഹ സൽക്കാരം രശ്മികയുടെ ജന്മനാടായ കൊടഗിൽ (കുടക്) വർണ്ണാഭമായി നടന്നു. ഏപ്രിൽ 6-ന് നടന്ന ചടങ്ങിൽ കുടകിലെ ജനങ്ങളെയും അവിടുത്തെ സംസ്കാരത്തെയും പുകഴ്ത്തി വിജയ് നടത്തിയ പ്രസംഗം ഇതിനകം ശ്രദ്ധേയമായിക്കഴിഞ്ഞു.

ഫെബ്രുവരി 26-ന് ഉദയ്പൂരിൽ വെച്ചായിരുന്നു ഇവരുടെ വിവാഹം. വിവാഹശേഷം ആദ്യമായാണ് ഇരുവരും കുടകിലെത്തുന്നത്. രശ്മികയുടെ മുപ്പതാം ജന്മദിനാഘോഷത്തിന്റെ ഭാഗം കൂടിയായിരുന്നു ഈ സന്ദർശനം.

കുടകിനോടുള്ള തന്റെ പഴയകാല ബന്ധത്തെക്കുറിച്ച് വിജയ് മനസ്സ് തുറന്നു. "ഇത് മൂന്നാം തവണയാണ് ഞാൻ കുടകിൽ വരുന്നത്. രശ്മികയെ പരിചയപ്പെടുന്നതിനും എത്രയോ മുമ്പ് സ്കൂൾ സുഹൃത്തുക്കളോടൊപ്പം ആദ്യമായി വിനോദയാത്ര വന്നത് ഇവിടേക്കായിരുന്നു. അന്ന് താമസിച്ചത് രശ്മികയുടെ ഒരു സുഹൃത്തിന്റെ വീട്ടിലായിരുന്നു എന്ന് പിന്നീടാണ് തിരിച്ചറിഞ്ഞത്," വിജയ് പറഞ്ഞു.

കുടകിലെ സ്ത്രീകൾ അതീവ സുന്ദരികളാണെന്ന് താൻ പണ്ടേ കരുതിയിരുന്നെന്നും, ഇപ്പോൾ അവിടുത്തെ ഒരു പെൺകുട്ടിയെ തന്നെ വിവാഹം കഴിക്കാൻ സാധിച്ചതിൽ വലിയ സന്തോഷമുണ്ടെന്നും വിജയ് കൂട്ടിച്ചേർത്തു. അടുത്ത തവണ വരുമ്പോൾ രശ്മികയുടെ കുട്ടിക്കാലം ചെലവഴിച്ച സ്ഥലങ്ങളെല്ലാം ചുറ്റിക്കാണണമെന്നും അദ്ദേഹം ആഗ്രഹം പ്രകടിപ്പിച്ചു.

പരമ്പരാഗത കൊടവ ശൈലിയിലുള്ള സിൽക്ക് സാരി ധരിച്ചാണ് രശ്മിക ചടങ്ങിൽ എത്തിയത്. ബ്ലാക്ക് ബ്ലേസറും വൈറ്റ് ഷർട്ടും ധരിച്ച് വിജയ് ദേവരകൊണ്ടയും തിളങ്ങി. സൽക്കാരത്തിന് മുന്നോടിയായി ഇരുവരും കർണാടകയിലെ പ്രശസ്തമായ ഇഗ്ഗുതപ്പ ക്ഷേത്രത്തിൽ ദർശനം നടത്തിയിരുന്നു.

രാഹുൽ സങ്കൃത്യൻ സംവിധാനം ചെയ്യുന്ന 'രണബാലി' എന്ന ചിത്രത്തിലൂടെ വിജയും രശ്മികയും വീണ്ടും സ്ക്രീനിൽ ഒന്നിക്കുകയാണ്. സെപ്റ്റംബർ 11-നാണ് ചിത്രം റിലീസ് ചെയ്യുന്നത്. അവസാന ഘട്ട ചിത്രീകരണത്തിനായി ഇരുവരും ഉടൻ സെറ്റിൽ ജോയിൻ ചെയ്യും.