ലോകപ്രശസ്ത ഫുട്ബോള്‍ താരം ഡേവിഡ് ബെക്ക്ഹാം തന്റെ മകന്‍ ബ്രൂക്ക്ലിന്‍ ബെക്ക്ഹാമിന്റെ വിവാദ സോഷ്യല്‍ മീഡിയ കുറിപ്പിനെക്കുറിച്ച് ആദ്യമായി പ്രതികരിച്ചു. മാതാപിതാക്കള്‍ “കണ്ട്രോള്‍ ചെയ്യുന്നവരാണെന്ന” ബ്രൂക്ക്ലിന്റെ പരാമര്‍ശമാണ് സോഷ്യൽ മീഡിയയിൽ വലിയ ചര്‍ച്ചകള്‍ക്ക് വഴിവെച്ചത്.

ബ്രൂക്ക്ലിന്‍ ബെക്ക്ഹാം അടുത്തിടെ സോഷ്യല്‍ മീഡിയയില്‍ പങ്കുവച്ച ഒരു കുറിപ്പില്‍, തന്റെ ജീവിതത്തിലും വിവാഹത്തിലും കുടുംബത്തിന്റെ ചില ഇടപെടലുകള്‍ ഉണ്ടായതായി സൂചിപ്പിച്ചിരുന്നു. ഈ കുറിപ്പ് പുറത്ത് വന്നതോടെ ഡേവിഡ് ബെക്ക്ഹാം–വിക്ടോറിയ ബെക്ക്ഹാം ദമ്പതികളെ ലക്ഷ്യമാക്കി നിരവധി വിമര്‍ശനങ്ങളും അഭ്യൂഹങ്ങളും ഉയര്‍ന്നിരുന്നു.

തന്റെ വ്യക്തിജീവിതത്തില്‍ മാതാപിതാക്കള്‍ തന്റെ തീരുമാനങ്ങളില്‍ അമിതമായി ഇടപെട്ടുവെന്ന രീതിയിലുള്ള ബ്രൂക്ക്ലിന്റെ വാക്കുകളാണ് ശ്രദ്ധ നേടിയത്. തന്റെ സോഷ്യൽ മീഡിയ പോസ്റ്റിലൂടെ ബ്രൂക്ക്ലിൻ കുടുംബം തന്നെ അമിതമായി നിയന്ത്രിച്ചു എന്നുംവ്യക്തമാക്കിയിരുന്നു. ഇതോടെ ബെക്ക്ഹാം കുടുംബത്തിനുള്ളില്‍ പ്രശ്നങ്ങളുണ്ടോ എന്ന സംശയം ശക്തമായിരുന്നു.

ഈ വിവാദങ്ങള്‍ക്കിടെ ആണ് ഡേവിഡ് ബെക്ക്ഹാം ഒരു അഭിമുഖത്തില്‍ വിഷയം പരോക്ഷമായി പരാമര്‍ശിച്ചത്. മകന്റെ പേരെടുത്ത് കുറ്റപ്പെടുത്തുകയോ വിശദീകരണം നല്‍കുകയോ ചെയ്തില്ലെങ്കിലും, സോഷ്യല്‍ മീഡിയയുടെ സ്വാധീനത്തെക്കുറിച്ച് അദ്ദേഹം തുറന്നുപറഞ്ഞു.

“സോഷ്യല്‍ മീഡിയ ചിലപ്പോള്‍ അപകടകരമായേക്കാം. പ്രത്യേകിച്ച് യുവാക്കള്‍ക്ക്. എല്ലാവര്‍ക്കും പിഴവുകള്‍ ചെയ്യാനുള്ള അവകാശമുണ്ട്. മക്കള്‍ക്ക് സ്വന്തം അനുഭവങ്ങളിലൂടെ പഠിക്കാനുള്ള അവസരം നല്‍കണം,” എന്നാണ് ഡേവിഡ് ബെക്ക്ഹാം പറഞ്ഞത്.

അതേസമയം മക്കള്‍ തെറ്റുകള്‍ ചെയ്യുന്നത് സ്വാഭാവികമാണെന്നും, അതിലൂടെയാണ് അവർ വളരുന്നതെന്നും ഡേവിഡ് വ്യക്തമാക്കി. മാതാപിതാക്കളെന്ന നിലയില്‍ എല്ലായ്പ്പോഴും ഇടപെട്ട് നിയന്ത്രിക്കുന്നതിന് പകരം, അവര്‍ക്ക് സ്വയം തീരുമാനങ്ങള്‍ എടുക്കാന്‍ അവസരം നല്‍കേണ്ടതുണ്ടെന്നും അദ്ദേഹം കൂട്ടിച്ചേർത്തു.

സോഷ്യല്‍ മീഡിയയില്‍ പറയുന്ന കാര്യങ്ങള്‍ പലപ്പോഴും തെറ്റായി വ്യാഖ്യാനിക്കപ്പെടുമെന്നും, ഒരു നിമിഷത്തെ വികാരത്തില്‍ എഴുതുന്ന വാക്കുകള്‍ വലിയ പ്രശ്നങ്ങളിലേക്ക് നയിക്കാമെന്നും ഡേവിഡ് പറഞ്ഞു. അതുകൊണ്ടുതന്നെ ഇത്തരം കാര്യങ്ങളില്‍ കൂടുതല്‍ ജാഗ്രത ആവശ്യമാണെന്നും അദ്ദേഹം ഓര്‍മിപ്പിച്ചു.

എന്നാൽ വിവാദങ്ങള്‍ നിലനില്‍ക്കുന്നുവെങ്കിലും, ബെക്ക്ഹാം കുടുംബം തകരാറിലാണെന്ന തരത്തിലുള്ള വാര്‍ത്തകള്‍ അംഗീകരിക്കാന്‍ ഡേവിഡ് തയ്യാറായില്ല. കുടുംബബന്ധങ്ങള്‍ ശക്തമാണെന്നും, വ്യക്തിപരമായ അഭിപ്രായവ്യത്യാസങ്ങള്‍ എല്ലാ കുടുംബങ്ങളിലും ഉണ്ടാകാമെന്നുമായിരുന്നു അദ്ദേഹത്തിന്റെ നിലപാട്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

വാട്സ്ആപ്പ്:ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്