അന്താരാഷ്ട്ര റേസിങ് ട്രാക്കിൽ ഇന്ത്യൻ കരുത്തായി അജിത്; ബെൽജിയത്തിൽ പോഡിയം ഫിനിഷുമായി റേസിങ് ടീം

APRIL 19, 2026, 10:38 PM

തമിഴ് സൂപ്പർ താരം അജിത് കുമാറും അദ്ദേഹത്തിന്റെ റേസിങ് ടീമും അന്താരാഷ്ട്ര തലത്തിൽ വീണ്ടും ഇന്ത്യയുടെ അഭിമാനം ഉയർത്തി. ബെൽജിയത്തിലെ ഇതിഹാസ റേസിങ് ട്രാക്കായ സർക്യൂട്ട് ഡി സ്പാ-ഫ്രാങ്കോർഷാംപ്‌സിൽ നടന്ന 24 എച്ച് സീരീസ് (24H Series) മത്സരത്തിൽ അജിത്തിന്റെ ടീം രണ്ടാം സ്ഥാനം കരസ്ഥമാക്കി.

വിജയത്തിന് പിന്നാലെ വേദിയിൽ ഇന്ത്യൻ ദേശീയ പതാക ഉയർത്തിപ്പിടിച്ച് അജിത് കുമാറും സഹതാരങ്ങളും വിജയം ആഘോഷിച്ചു. അജിത് കുമാർ റേസിങ് ടീമിന്റെ ഈ ചരിത്ര നിമിഷം അദ്ദേഹത്തിന്റെ മാനേജർ സുരേഷ് ചന്ദ്ര സമൂഹമാധ്യമങ്ങളിലൂടെ പങ്കുവെച്ചു. ആഗോള വേദിയിൽ ഇന്ത്യൻ പതാക ഉയരത്തിൽ പറന്ന നിമിഷം അഭിമാനകരമാണെന്ന് അദ്ദേഹം കുറിച്ചു.

റേസിങ് തിരക്കുകൾ വർദ്ധിച്ചതോടെ അജിത്തിന്റെ സിനിമാ പ്രോജക്റ്റുകൾക്ക് ചെറിയ ഇടവേള സംഭവിച്ചിരിക്കുകയാണ്. 2025-ൽ പുറത്തിറങ്ങിയ 'ഗുഡ് ബാഡ് അഗ്ലി' (Good Bad Ugly) ആണ് അദ്ദേഹത്തിന്റെ അവസാനമായി പുറത്തിറങ്ങിയ ചിത്രം.

ഈ ചിത്രത്തിന്റെ സംവിധായകൻ അധിക രവിചന്ദ്രനുമായി ചേർന്ന് ഫെബ്രുവരിയിൽ പുതിയ സിനിമ ആരംഭിക്കേണ്ടതായിരുന്നുവെങ്കിലും റേസിങ് മത്സരങ്ങൾക്കായി അത് മാറ്റിവെച്ചതായാണ് റിപ്പോർട്ട്.

2026-ലെ റേസിങ് കലണ്ടർ അനുസരിച്ച് ഫ്രാൻസ്, ജർമ്മനി, സ്പെയിൻ, ഇറ്റലി, യുകെ, പോർച്ചുഗൽ എന്നിവിടങ്ങളിലെ ചാമ്പ്യൻഷിപ്പുകളിൽ താരം പങ്കെടുക്കുന്നുണ്ട്. അജിത്തിന്റെ അടുത്ത ചിത്രത്തിന്റെ ഷൂട്ടിംഗ് എന്നാരംഭിക്കുമെന്ന കാര്യത്തിൽ ഔദ്യോഗിക പ്രഖ്യാപനങ്ങൾ ഒന്നും തന്നെ ഇതുവരെ വന്നിട്ടില്ല.