ന്യൂഡെല്‍ഹി: ജൂണ്‍ 25 ഭരണഘടന ഹത്യാ ദിനം ആയി ആചരിക്കാനുള്ള കേന്ദ്ര സര്‍ക്കാരിന്റെ തീരുമാനത്തിനെതിരെ രൂക്ഷമായി പ്രതികരിച്ച് കോണ്‍ഗ്രസ്. പ്രധാനമന്ത്രി നരേന്ദ്ര മോദിയുടെ ധാര്‍മ്മിക പരാജയം സംഭവിച്ച ദിവസമായതിനാല്‍ ജൂണ്‍ 4 'മോദിമുക്തി ദിവസ്' ആയി ആചരിക്കണമെന്ന് കോണ്‍ഗ്രസ് പ്രതികരിച്ചു.

ജൂണ്‍ നാലിന് ഫലം പ്രഖ്യാപിച്ച ലോക്സഭാ തെരഞ്ഞെടുപ്പില്‍ കേവലഭൂരിപക്ഷത്തിന് 32 സീറ്റുകളുടെ കുറവുമായി ബിജെപിക്ക് 240 സീറ്റുകള്‍ മാത്രമാണ് നേടാനായത്. എന്നാല്‍, പ്രധാനമന്ത്രി നരേന്ദ്രമോദി തന്റെ എന്‍ഡിഎ സഖ്യകക്ഷികളുടെ പിന്തുണയോടെ തുടര്‍ച്ചയായി മൂന്നാം സര്‍ക്കാര്‍ രൂപീകരിച്ചു. സീറ്റുകള്‍ നഷ്ടപ്പെട്ടത് പ്രധാനമന്ത്രി മോദിയുടെ ധാര്‍മിക പരാജയമാണെന്ന് കോണ്‍ഗ്രസ് ജനറല്‍ സെക്രട്ടറി ജയറാം രമേശ് പറഞ്ഞു.

'2024 ജൂണ്‍ 4-ന് ഇന്ത്യയിലെ ജനങ്ങള്‍ അദ്ദേഹത്തിന് നിര്‍ണായകവും വ്യക്തിപരവും രാഷ്ട്രീയവും ധാര്‍മ്മികവുമായ പരാജയം ഏല്‍പ്പിക്കുന്നതിന് മുമ്പ് പത്ത് വര്‍ഷക്കാലം അപ്രഖ്യാപിത അടിയന്തരാവസ്ഥ ഏര്‍പ്പെടുത്തിയ പ്രധാനമന്ത്രിയുടെ കാപട്യത്തിന്റെ മറ്റൊരു പത്ര തലക്കെട്ട് പിടിച്ചെടുക്കല്‍ വ്യായാമമാണിത്. അന്നേ ദിവസം മോദിമുക്തി ദിവസ് എന്ന പേരില്‍ ചരിത്രത്തില്‍ ഇടംനേടും,'' അദ്ദേഹം എക്സില്‍ എഴുതി.

ഇന്ത്യന്‍ ഭരണഘടനയെയും അതിന്റെ തത്വങ്ങളെയും മൂല്യങ്ങളെയും സ്ഥാപനങ്ങളെയും വ്യവസ്ഥാപിതമായ ആക്രമണത്തിന് വിധേയമാക്കിയ പ്രധാനമന്ത്രിയാണ് മോദിയെന്ന് ജയ്‌റാം രമേശ് ആരോപിച്ചു.  മനുസ്മൃതിയില്‍ നിന്ന് പ്രചോദനം ഉള്‍ക്കൊണ്ടില്ല എന്നതിന് 1949 നവംബറില്‍ ഇന്ത്യന്‍ ഭരണഘടനയെ തള്ളിക്കളഞ്ഞ പാരമ്പര്യമാണ് സംഘപരിവാറിനെന്നും രമേശ് കൂട്ടിച്ചേര്‍ത്തു.

1975 ജൂണ്‍ 25ന് ഇന്ദിരാഗാന്ധി സര്‍ക്കാര്‍ അടിയന്തരാവസ്ഥ ഏര്‍പ്പെടുത്തിയത് ചൂണ്ടിക്കാട്ടിയാണ് എല്ലാ വര്‍ഷവും ജൂണ്‍ 25 ഭരണഘടന ഹത്യാ ദിനമായി ആചരിക്കുമെന്ന് കേന്ദ്ര സര്‍ക്കാര്‍ പ്രഖ്യാപിച്ചത്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്