കടുത്ത ദൂരപരിധി! ദേശീയപാതയോരത്ത് വീടുപണിയാൻ 40 മീറ്റർ മാറണം, സുപ്രീംകോടതി ഉത്തരവിൽ ആശങ്ക

AUGUST 8, 2026, 9:59 PM

ഹരിപ്പാട്: ദേശീയപാതയുടെ മധ്യഭാഗത്തുനിന്ന് 40 മീറ്ററിനുള്ളിൽ വീടുകൾക്കും 75 മീറ്ററിനുള്ളിൽ കച്ചവട സ്ഥാപനങ്ങൾക്കും അനുമതി നൽകരുതെന്ന സുപ്രീം കോടതിയുടെ ഇടക്കാല ഉത്തരവ് കേരളത്തിൽ വലിയ പ്രതിസന്ധി സൃഷ്ടിക്കുന്നു. സംസ്ഥാനത്ത് ദേശീയപാതയുടെ വീതി 45 മീറ്ററാണ്.

മധ്യഭാഗത്തുനിന്നു വശങ്ങളിലേക്ക് 22.5 മീറ്റർ ദൂരമുള്ളതിനാൽ പുതിയ ഉത്തരവനുസരിച്ച് അതിനുപുറമെ 17.5 മീറ്റർ കൂടിയെങ്കിലും മാറിയേ വീടുകൾ പണിയാനാകൂ. കച്ചവട സ്ഥാപനങ്ങൾക്ക് 52.5 മീറ്റർ വരെ അകലം പാലിക്കേണ്ടിവരും. നിലവിൽ കെട്ടിടങ്ങൾക്ക് ലൈസൻസ് പുതുക്കുമ്പോഴും പുതിയവയ്ക്ക് അനുമതി നൽകുമ്പോഴും ഇത് ബാധകമാകുന്നതോടെ സംസ്ഥാനത്ത് പാതയോരങ്ങളിലെ നിർമ്മാണ പ്രവർത്തനങ്ങൾ പൂർണ്ണമായും സ്തംഭിക്കുന്ന അവസ്ഥയിലാണ്.

മറ്റ് സംസ്ഥാനങ്ങളിൽ ദേശീയപാതയ്ക്ക് 60 മീറ്റർ വീതിയുള്ളതിനാൽ മധ്യഭാഗത്തുനിന്ന് 10 മീറ്റർ മാത്രം മാറി വീടുകൾ നിർമ്മിക്കാൻ സാധിക്കും. എന്നാൽ കേരളത്തിൽ പാതയോരങ്ങളിൽ നിന്ന് വെറും ഏഴ് മീറ്റർ മാറിയാണ് നിലവിൽ നിർമ്മാണാനുമതി നൽകുന്നത്.

സംസ്ഥാനത്തെ വീതികുറഞ്ഞ സാഹചര്യം കണക്കിലെടുത്ത് ദൂരപരിധിയിൽ ആവശ്യമായ ഇളവുകൾ ലഭിക്കുമെന്ന പ്രതീക്ഷയിലാണ് ജനങ്ങൾ. ഈ ഉത്തരവിന്റെ പകർപ്പ് സംസ്ഥാന ചീഫ് സെക്രട്ടറി ഉൾപ്പെടെയുള്ള ഭരണാധികാരികൾക്ക് കോടതി കൈമാറുകയും ആക്ഷേപങ്ങൾ അറിയിക്കാൻ നിർദ്ദേശിക്കുകയും ചെയ്തിട്ടുണ്ട്.

രാജസ്ഥാനിലും തെലങ്കാനയിലും എക്സ്പ്രസ് പാതകളിലുണ്ടായ ദാരുണമായ വാഹനാപകടങ്ങളെ തുടർന്ന് സുപ്രീം കോടതി സ്വമേധയാ എടുത്ത കേസിലാണ് ഈ നിർണ്ണായക ഇടക്കാല ഉത്തരവ് ഉണ്ടായിരിക്കുന്നത്. പാതയോരങ്ങളിലെ അടിസ്ഥാന സൗകര്യങ്ങളുടെ പോരായ്മയും അധികൃതരുടെ അശ്രദ്ധയുമാണ് അപകടങ്ങൾക്ക് കാരണമെന്ന് വിലയിരുത്തിയാണ് കോടതി ഈ സുരക്ഷാ നിർദ്ദേശങ്ങൾ മുന്നോട്ടുവെച്ചത്.

കേസിൽ നിയോഗിക്കപ്പെട്ട അമിക്കസ് ക്യൂറിയുടെ ശുപാർശകളും ദേശീയപാത അതോറിറ്റിയുടെ സത്യവാങ്മൂലവും പരിഗണിച്ചാണ് നിർമ്മാണ പ്രവർത്തനങ്ങൾക്ക് കർശന നിയന്ത്രണം ഏർപ്പെടുത്തിക്കൊണ്ടുള്ള ഉത്തരവ് പുറപ്പെടുവിച്ചത്.