പൊന്നാനി ബലാത്സംഗ പരാതി: മൂന്ന് പൊലീസ് ഉദ്യോഗസ്ഥർക്കെതിരെ കേസ് രജിസ്റ്റർ ചെയ്യാൻ കോടതി ഉത്തരവ്

JULY 9, 2026, 6:34 AM

മലപ്പുറം: പൊന്നാനി ബലാത്സംഗ പരാതിയുമായി ബന്ധപ്പെട്ട് മൂന്ന് മുതിർന്ന പൊലീസ് ഉദ്യോഗസ്ഥർക്കെതിരെ കേസ് രജിസ്റ്റർ ചെയ്ത് അന്വേഷണം നടത്താൻ പൊന്നാനി ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി നിർദേശിച്ചു. അതിജീവിത നൽകിയ പരാതിയുടെ അടിസ്ഥാനത്തിലാണ് നടപടി.

മലപ്പുറം മുൻ ജില്ലാ പൊലീസ് മേധാവി സുജിത് ദാസ്, ഡിവൈഎസ്പി വി.വി. ബെന്നി, അന്നത്തെ പൊന്നാനി പൊലീസ് സ്റ്റേഷൻ എസ്‌എച്ച്ഒ വിനോദ് വലിയാറ്റൂർ എന്നിവരാണ് കേസിൽ പ്രതികളാകുന്നത്.

സുപ്രീംകോടതിയുടെ നിർദേശത്തെ തുടർന്നാണ് മജിസ്ട്രേറ്റ് കോടതി എഫ്‌ഐആർ രജിസ്റ്റർ ചെയ്ത് അന്വേഷണം ആരംഭിക്കാൻ ഉത്തരവിട്ടത്.

അതിജീവിതയുടെ പരാതിയിൽ പറയുന്നതനുസരിച്ച്, 2022 ജനുവരിയിലാണ് കേസിന് ആസ്പദമായ സംഭവങ്ങൾ നടന്നത്. സ്വത്ത് തർക്കവുമായി ബന്ധപ്പെട്ട വിഷയത്തിൽ പരാതിയുമായി അവർ പൊന്നാനി പൊലീസിനെ സമീപിച്ചതിനെ തുടർന്നാണ് സംഭവവികാസങ്ങൾ ഉണ്ടായതെന്നാണ് ആരോപണം.

പരാതി പ്രകാരം, പരാതിയുമായി ബന്ധപ്പെട്ട് വീട്ടിലെത്തിയ എസ്‌എച്ച്ഒ വിനോദ് വലിയാറ്റൂർ ലൈംഗികാതിക്രമം നടത്തിയെന്നാണ് ആരോപണം. തുടർന്ന് ഡിവൈഎസ്പി വി.വി. ബെന്നി ശാരീരികമായി ആക്രമിച്ചെന്നും, പരാതി നൽകാൻ എത്തിയപ്പോൾ അന്നത്തെ ജില്ലാ പൊലീസ് മേധാവി സുജിത് ദാസും ലൈംഗികാതിക്രമം നടത്തിയെന്നുമാണ് അതിജീവിതയുടെ ആരോപണം.

കോടതി ഉത്തരവിന്റെ അടിസ്ഥാനത്തിൽ കേസിൽ എഫ്‌ഐആർ രജിസ്റ്റർ ചെയ്ത് തുടർ അന്വേഷണം ആരംഭിക്കും.